¹ Yesu yaasoha oakahitira Yeriko gati. ² Na yaaringaho omuntu yabhirikirwanga Zakayo. Unu yaaringa omukuru owa abhatobhya bha erigooti na omwaami. ³ Yanga arasagya okumurora Yesu ega mumuntu wa egaki, nawe atatura okumurora kwa ekisigo kya omuganda gwa abhantu, na kwa okubha yaaringa mwengi bhukong'u. ⁴ Kwa ego, akakangata akakenya embere akatanguura abhantu, akaruna kumukuyu naho ature okumurora, kwa okubha Yesu yaringa hangi okuhita kunjira iyo. ⁵ Eribhaga rinu Yesu yaahika ahasi arya, akamaha eguru akamukeerya, Zkayo, ituuma bhwangu, kwa okubha reero ndeenda okuho yeera iika ewaaho! ⁶ Akakora bhwangu aketuuma akamugenihya kwa okujomerwa. ⁷ Abhantu bhonsego hanu bharora gayo bhakenge heerya, bhakagamba ega, agiiri okugeniha owa omuntu omusarya.' ⁸ Zakayo akeemirira akamukeerya omukuru, maaha omukuru etwaagati erya ebhuntu bhyaani ndahaana abhataka, nyoore namuruusya omuntu wonse wonse ekintu, ndamuhunjukirya mara kane. ⁹ Yesu akabhakeerya, reero obhuhuurya bhukikiri munyuumba inu, kwa okubha wonse aringi omwaana wa Abrahamu. ¹⁰ Kwa okubha omwaana owa omuntu yaajiri okutuna na okutuurya bhanu bhaabhura. ¹¹ Hanu bheegwa gaya, yagendererya okuhahira na akaruusya ekireengyo, kwa okubha yaaringa hangi na Yerusalemu, bheeki bhakamanya ega obhukama bhwa Waryubha bhwanga bhureyorokya rumwi ego. ¹² Ego akabhakeerya, omukama oumwi yaagya mukyaaro kya hare naho anyoore obhukama amare ahunjuke. ¹³ Akabharikira abhagaya bhaaye ekumi, akabha haana amafungu ekumi, akabhakeerya ega mukore ebhyaasara mpaka hanu ndihunjuka. ¹⁴ Nawe abhantu abha ekyaro kiyo bhakamubhihirirwa, kweego bhakatuma abhachaama bhamugiire bhakagamba tutakwenda abhe omukama weetu. ¹⁵ Hanu yaahunjuka iika amariri okuhanwa obhukama, akabhabhirikira abhagaya bhanu yaringa atigiri egimbirya bhamugyeko, amanye bhaanyoora obhweeraki hanu bhaakora ebhya asara. ¹⁶ Owa embere akagamba, omukuru, omugabho gwao kukoreri emigabho ekumi na egisaagu. ¹⁷ Omunene uyo akamukeerya, mbwahene, omugaya owaheene. Kyeego waabha wahene kumang'ana amake, arabhe na obhuturo kumigi ekumi. ¹⁸ Owakabhiri akagamba, omukuru, omukabho gwao gurusirye emigabho etanu. ¹⁹ Omunene uyo akamukeerya, obhe na obhuturo kumigi etanu. ²⁰ Oundi akaaja akagamba, omukuru ng'inu hanu embirya yao, nabhika bhwahene mukitambara, ²¹ Noobhoha kwa okubha oringi mururu, orarusyaho kinu otatuuraho na okugesa kinu otahamba. ²² Omunene uyo akamukeerya, kwa amang'ana gaho omwene ndikujibhya, uwe omugaya omubhibhi. Okamanya ega oni ndimuntu omururu, ndagega kinu ntatuuraho na okugesa kinu ntahamba. ²³ Bhono ndarora otahuura embirya gyaani mubheenki, hanu nkahunjukiri ngigege hamwi na obweera? ²⁴ Omunene akakeerya abhantu bhanu bharinga bhemiriri hayo, mumurusye omugabho gwaye guyo muhaane owa emigabho ekumi.' ²⁵ Bhakamukeerya omukuru, weeki yaana migabho ekumi.' ²⁶ Ndabhakeerya,omuntu wonse wonse unu yaanabhyo, aryongeribhwa, nawe unu atanabhyo, nabhinu yanabhyo bhirigegwa. ²⁷ Nawe abhasigu bhaani, bhanu bhateendanga mbe omukama waabho, mubhareete embere waani mubheete.' ²⁸ Hanu yaamara okugamba gayo, yagendererya embere akuriina okugya Yerusalemu. ²⁹ Hanu yaahika hangi na Bhetifage na Bethania, hang'i na enkuku eya emijaituni, akabhatuma abhehigira bhaye abhabhiri, ³⁰ Akagamba mugende mukijiji kya hang'i hanu murasohe muranyoore omwaana owa entikiri unu akyaari okuriinwako. Mumusibhike, mumurete kuwoni. ³¹ Nyoore omuntu arabhurye, kwaaki muraisibhura? mugambe ega omukuru arayeenda." ³² Bhanu bhaatumwa bhagya bharora omwaana owa entikiri kyeego Yesu yaringa abhakererye. ³³ Hanu bhasibhuranga omwaana owa entikiri abheene ntinkiri bhakabhabhuurya, nkwaki murasibhura omwaana owa entikiri uyo?' ³⁴ Bhakagamba omukuru arayeenda. ³⁵ Mbe bhakamuhirira Yesu, bhakabharya emyenda gyaabho ku omwaana owa entikiri bhakatiiryako Yesu. ³⁶ Hanu yaagyanga abhantu bhakabharya emyenda gyaabho kwibharabhara. ³⁷ Hanu yaahiringitanga munkuku eya emijaituni, omuganda gonsego ogwa abhehigira bhakamba okukiririrya na okumukumya Waryubha kwa eriisi erinene, kwa amang'ana omanene ganu bhaarora, ³⁸ Bhakagamba ega ng'o omunonkwa omukama una araaje ku eriina eyrya omukuru omurembe murwire eyo obhuhoru eguru! ³⁹ Abhandi abha omuganda guyo bhakamukeerya omwihigirya, obhakirye abhehigira bhaaho. ⁴⁰ Yesu akabhakyukya ega, akagamba, ndabhakeerya, nyoore bhayo bharaakire amagina garijirira. ⁴¹ Yesu hanu yaahika hang'i kumugi akagukurira, ⁴² akagamba, okamanyiri wonse, kurusiku orwa reero amang'ana ganu garatuhana omurembe newe bhoono gebhisa mumeeso gaaho. ⁴³ Kwa okubha eginsiku giriija abhasigu bhaaho bharihagaja orubhago hangi na uwe, na okukwinaara na okukubhandirirya mbaara gyonsego. ⁴⁴ Bharikugwisya hansi uwe, na abhaana bhaaho. Bhatarikutigira egina rimwi eguru kuriindi, kwa okubha bhatamanya eribhaga rinu Waryubha yanga arasagya okukutuurya. ⁴⁵ Yesu hanu yaasoha mwisyengerero ambha okubhakenya bhanu bhaaguryanga, ⁴⁶ akabhakeerya, "Yang'orwa ega, enyuumba yaani eribha enyumba eya okusabhiramo, nawe bheenyu mwaikoreri erisana erya abheebhi." ⁴⁷ Yesu yaaringa arehigirya nsiku gyonsego mwisyengerero. Abhakuru abha erisyengerero na abhehigirya abha amaragiriryo na abharokya abha abhantu bhakatuna oku mwiita, ⁴⁸ nawe bhatanyoora omweya, omweeya ogwa okukora ego, kwa okubha abhantu bhonsego bharinga bhamwitegereri bwaheene.