¹ Omusuuma Teofiro, abhantu abhaaru bhakoreri ekitunyo kya okugang'ora amang'ana garya gaakoreka gati yeetu. ² Bhaang'ora amang'ana ganu twaakeeri bhwana bhanu bheerorera amang'ana gayo kwa ameeso gabho, okurwa ku bhwambiro bhwa emirimu gya Yesu, bhayo mbo, bhaaringa bharanyaraganya amang'ana gayo eguru ya Yesu. ³ Oni nonse neekomerye bhwaheene kya ego gaakoreka okurwa ku bhwambiro. Naruuji mubhujomu nkung'orere naho. ⁴ Uuwe wonse, obhe na obhuheene bhwa amang'ana ganu weehigiribhwa. ⁵ Eribhaga rinu Herode yaaringa omukama wa ekyaro kya Yudea, yoaringaho omusyengeri umwi, eriina ryaye yaabhirikirwanga Zakaria, wa omuganda gwa omusyengeri Abhia mukaaye wonse yaaringa wa oruganda ruyo rwa omusyengeri Haruni, eriina ryaye yabhirikirwanga Elizabheti. ⁶ Bhabhiri bhayo bhaaringa abha heene embere ya omukuru Waryubha. Bhaaringa bharagirata amaragiriryo gyaye gyonsego, bira amasoro. ⁷ Bhataata ringa bheebhwiri, kwa okubha omukari yaaringa mugumba, na bhaaringa bhariri omunyu mwaaru. ⁸ Orusiku rumwi, rwaaringa orwiru rwa omuganda gwa Zakaria okusyengera embere ya Waryubha. ⁹ Kuring'ana na ehimiira kya obhusyengeri Zakaria akasorwa okusoha mu nyumba enkuru ya mu risyengerero rya Waryubha, amutuutire mo enkurusu. ¹⁰ Zakaria hanu yaasoha okutuura ekurusu, abhantu abhaaru bhaaringa bheekumeriye kibhara, bharasabha Waryubha. ¹¹ Rumwi ego, Zakaria akamwiirwa na malaika wa Waryubha, Uuu. Malaika uyo, akeemirira orubhaara rwa okuryo rwa emeja ya okutuutira ekurusu. ¹² Zakaria hanu yaamurora, akeetakya, eee. Akoo bhoha bhukong'u. ¹³ Nawe, malaika uyo, akamukeerya ega uuwe Zakaria, tiga okwobhoha! Ganu waasa bhanga Waryubha, yageegwiri. Mukaaho Elizabheti arikwibhurira omwana wa ekisaaja, ori mutoga Yohana. ¹⁴ Omwana Uyo ng'o arikora mubhe na obhujomerwa bhukong'u na abhantu abhaaru bharijo mererwa okwibhurwa kwaye. ¹⁵ Aribha omukuru, embere ya omukuru Waryubha. Atariija okunywa amarwa gogonse garya. Ariijuribhwa na omutima omurabhu gwa Waryubha, kora akyari muunda ya ng'ina wabho. ¹⁶ Arihindya abhantu abhanu bha Israeli ku omukuru Waryubha wabho. ¹⁷ Arimukangatira Kristu, aseemye abhantu bhanu bhariija okumuturung'ana, aryoro kereribhwa na omutima na eginguru, kya egya Eriya. Aribhagwatanya abhana na bheese wabho, na bhanu bhatana egintungwa ku Waryubha, aribhakora bhabhe nagyo bhwaheene. ¹⁸ Zakaria akamubhurya, Ndegwa oni na mukaani turingi bhagotu! Eribha egaki twibhure omwana? ¹⁹ Maraika akagamba ega, Noni Gabrieli, unu ndeemirira embere ya Waryubha. Yantumiri enu oringi, niije okukukeerya amang'ana amajomu gayo. ²⁰ Nawe, kwa okubha otakwikirirya amang'ana gaani, okwambira bhoono, orabha emuma. Mpaka okuhikya kwa eribhaga rinu amang'ana gayo garikoreka, atakutura okuhaira. Mubhuheene, garikoreka. ²¹ Mbe, abhantu bhanu bhaaringa bharaganyirira Zakaria ahuruke kibhara, bhakaruguura kwa okurora kya ego yaarigita muyo. ²² Yaaja okurwa mo, ataanagya kweki okugamba nabho, akaamba okubhoorokya na amabhoko. Rumwi ego, bhakamanya aruuji obhurooti munyumba enkuru ya murisyengerero rya Waryubha. Wonse akagendererya okubha emumu. ²³ Na eribhaga yaaringa amariri eginsiku gyaye gya okusyengera munyumba enkuru ya murisyengerero rya Waryubha, akagya iika. ²⁴ Eribhaga erindi, mukaaye Elizabheti akagega enda. Akamara myeri etaanu yeebhisiri, akagamba ega. ²⁵ Omukuru Waryubha ng'o yankoreri ego! Nonse yang'itukiri yandusirye enginsoni kuabhantu. ²⁶ Enda iyo, hanu yaahikya myeri esansabha, Waryubha akatuma malaika Gabrieli kumugi gwa Nazareeti mukyaro kya Galilaya. ²⁷ Ahike ku muhara umwi, eriina ryaye yaabhiri kirwanga Mariamu. Muhara uyo yaaringa arombeerwe obhuko na Omusaaja umwi, eriina ryaye yaabhirikirwanga Yusufu, wa oruganda rwa omukama Daudi. ²⁸ Maraika uyo, akagya wa Mariamu, akamukeerya ega, Ndakukeranya, uuwe waanonkwa bhukong'u omukuru Waryubha ari hamwi na uuwe. ²⁹ Hanu Mariamu yeegwa amang'ana ga malaika uyo; yaaye ekeetanduka bhu kong'u, akeebhuurya, Nkeranyaki inu? ³⁰ Nawe malaika uyo, akamukeerya ega, Uuwe Mariamu, tiga okwobhoha, Waano Nkwa ku Waryubha. ³¹ Bhoono, oragega enda, Wibhure omwana wa ekisaaja, omutoge Yesu. ³² Aribha omukuru, aribhirikirwa omwana wa Waryubha wa eguru ya bhyonsego. Omukuru Waryubha arimuhaana kweki obhutungi bhwa Omukama Daudi, jaaji wabho. ³³ Na aribha Omukuru wa abhantu bhonsego bha Israeli, eginsiku gyonsego, Obhukama bhwaye, bhutarihwa kweki. ³⁴ Mariamu akamubhuurya malaika ega, Ganu garibha egaki, enu oni ntamanyiri omusaaja? ³⁵ Maraika akakyukya ega, omutima omurabhu gwa Waryubha gurikujira, na obhuturo bhwa Waryubha wa eguru ya bhyonsego, bhurikukundikirya. Kwa ego, omwana unu oriibhura, aribha omwahurwa na aribhirikirwa omwana wa Waryubha. ³⁶ Na omuhiri wacho Elizabheti, unu bhabhirikiranga mugumba, mu bhugotu bhwaye bhuyo, yagegeri enda, na omweri guni ngwa kasansabha. ³⁷ Yagegeri enda, kwa okubha ku Waryubha, ritariho rinu ritakuturika. ³⁸ Mariamu akakyukya, Ndingi omugaya wa omukuru Waryubha. Ebhe ku oni kya ego ogambiri." Rumwi ego, Uuu, malaika uyo akagya. ³⁹ Ku ginsiku giyogiyo, Mariamu akaseemya orugendo, akagya bhwangu owa Elizabheti, ku mugigumwi gwa ku ginkuku gya Yudea. ⁴⁰ Hanu yaasoha mu nyumba ya Zakaria, akakeranya Elizabheti. ⁴¹ Elizabheti hanu yeegwa enkeranya ya Mariamu, omwana unu yaaringa munda yaaye, akahooya. Hayo hayo, Elizabheti akeejuribhwa na omutima omurabhu gwa Waryubha. ⁴² Akagamba kwa eriisi enene ega, kubhaki bhonsego, Uuwe nuuwe waano Nkwa! Na omwana unu oriibhura, wonse yaanonkwa. ⁴³ Oni niwi, kora ng'ina waabho omukuru wetu ujiri okunkeranya? ⁴⁴ Kya ego nigwiri enkeranya yaaho, hayo hayo omwana unu aringi munda yaani, rumwi ego yaaho oya kwa okujomerwa. ⁴⁵ Uuwe waanonkwa, kwa okubha wiikirirye amang'ana ganu omukuru Waryubha yaakukeerya garikoreka. ⁴⁶ Mariamu akagamba ega, Enkoro yaani, eramukumya omukuru Waryubha, ⁴⁷ eriho erajomererwa Waryubha, omutuurya waani. ⁴⁸ Kwa okubha, yang'itukiri oni, omugaya waaye, kora onyoora ndingi omuntu wa insi. Okurwa bhoono, abhantu bha eginganda na eginganda bharibha bharagamba ega, oni ng'o wa enonkwe. ⁴⁹ Waryubha wa obhuturo, yankoreeri ekika, na eriina ryaye ritakuhunkani bhwa na eriina erindi. ⁵⁰ Aragendererya okwabhira abhantu bha eginganda na eginganda bhanu bharamwigwa. ⁵¹ Akoreri amang'ana amakuru kwa eginguru gyaye, anyaragenye abheekisirani. ⁵² Yetu mirye abhakuru ku bhitumbi bhyabho bhya obhutungi, abhanyohu abheemu kirye. ⁵³ Abha omweko abheegutirye bhujomu, naho abhaami abhakenyerye amabhoko masa. ⁵⁴ Abhasakiirye Abha Israel, abhagaya bhaaye, kwa okuhiituka okubhabhira. ⁵⁵ Yakoreri gayo kya ego yaaringa arageeni na Abrahamu na bhajaaji wetu, kora ku abhantu bhonsego bha oruganda rwaye, eginsiku gyonsego." ⁵⁶ Bhoono, Mariamu akeekara owa Elizabheti myeri esatu, akamara akahinda owaye. ⁵⁷ Orusiku rwa okwibhura kwa Elizabheti rukahika, akeebhura omwana wa ekisaaja. ⁵⁸ Abhahang'i waaye na abhahiiri bhaaye, hanu bheegwa kya rgo omukuru Waryubha amwabhiiri, bhakajomerwa hamwi nawe. ⁵⁹ Omwana uyo, hanu yaahikya orusiku rwa munane, bhakaaja okumusaara. Bhakeenda bhamuhaane eriina rya esewabho Zakaria. ⁶⁰ Kora ego ng'ina waabho akanga, akagamba ega, Hamuna! Abhirikirwe Yohana." ⁶¹ Bhakakyukya ega, Ndegwa atariho omuhiiri weenyu, unu arabhirikirwa erii riyo! ⁶² Bhakabhuurya ese wabho, kwa okumworokya na amabhoko, naho abhakeerye eriina rinu areenda okutoga omwana waaye. ⁶³ Akabhasabha ekibhaau, akaking'ora ega, Eriina ryaye ng'o Yohana." Bhonsego bhakaruguura. ⁶⁴ Rumwi ego, obhuturo bhwa omunwa na orurimi rwaye bhikaamba okuhaira kweki, akamukumya Waryubha. ⁶⁵ Abhahang'i bhonsego bhakaruguura bhukong'u Ering'ana riyo rikamanyikana bhukong'u ku migi gyonsego ginu giringi kuginkuku gya Yudea. ⁶⁶ Bhonsego bhanu bheegwa bhakabha bhareebhurya, omwana uyo aribha omuntu wa egaki? Bhagaamba ega, kwa okubha heene, omukuru Waryubha yaaringa hamwi nawe. ⁶⁷ Zakaria ese wabho omwana uyo, akeejuribhwa na omutima omurabhu gwa Waryubha. Akaruusya obhurooti ega. ⁶⁸ Omukuru Waryubha wetu wa Israeli, akumibhwe! kwa okubha yajiri okutuurya bheetu, abhantu bhaaye. ⁶⁹ Atuheeri omutuurya owa eginguru okurwa ku ruganda rwa omugaya waaye Daudi. ⁷⁰ Kya ego yaaringa amariri okugamba akare, kwa enjira ya abharooti bhaaye bha emitima emirabhu. ⁷¹ Yaatu keerya ega, akatutuurirye okurwa ku bhasigu bheetu na mu mabhoko ga bhanu bharatu bhihirirwa. ⁷² Akagamba ega, arihiituka emuma yaaye endabhu inu yaarya na bhajaaji wetu, na aribha serenya. ⁷³ Eriragano riyo ndyo yaarya na jaaji wetu Abrahamu. ⁷⁴ Atutuurirye okurwa mu mabhoko ga abhasigu bheetu, naho tubhe turamusabha bira obhobha. ⁷⁵ Kweki, tubhe abha egintungwa na abha heene embere waaye, eginsiku gwetu gyonsego. ⁷⁶ Uuwe omwana waani, oribhanga orabhirikirwa omurooti wa Waryubha wa eguru ya bhonsego. Orimukangatira omukuru Waryubha, anyoore omuseemerye enjira. ⁷⁷ Orikeerya abhantu bhaaye ega, bharituuri bhwa kwa okwabhirwa obhusarya bhwabho. ⁷⁸ Kuring'ana na ekyabhira ekihene kya Waryubha wetu. Obhutuurwa bhuyo bhuritujira okurwa mu rwire kya endingasi, ⁷⁹ na bhurimirikira bhanu bharingi mu kisunte, bhanu bharingi mu nyanko na mu ng'anga ya oruku. Aritooro keererya, naho tugendenga kunjira ya omurembe. ⁸⁰ Bhoono, omwana uyo Yohana akakiina, akanyoora eginguru munkoro yaaye. Akagya okwikara kukibhara, mpaka eribhaga rinu yee yorokya ku Abha Israeli