¹ Emvakwekutsi Jesu atalwe eBhetlehema yaseJudiya ngetikhatsi ta Herodi inkhosi, emadvodza lafundzile achamuka emphumalanga abuya eJerusalema atsi, ² ''Uphi lona lotelwe loyiNkhosi yemaJuda? Sabona inkhanyeti yakhe emphumalanga site kutomkhotsamela.'' ³ Ngesikhatsi iNkhosi Herodi ikuva loku, yakhatsateka , kanye neJerusalema yonkhe. ⁴ Herodi wahlanganisa bapristi labakhulu netati tebantfu, wababuta , ''Utawutalelwa kuphi lo Khristu?'' ⁵ Batsi kuye, ''EBhetlehema yase Judiya, ngoba loku ngulokwabhalwa ngumphrofethi, ⁶ ''Kepha wena, Bhetlehema, live lakaJuda, awumncane kangako kubabusi bemaJuda, ngoba kuwe kuyawuphuma umbusi lotawelusa bantfu bami baka-Israyeli. ⁷ Ngako -ke Herodi wabita lamadvodza lafundzile ngasese kutobabutisisa kutsi lenkhanyeti ivele ngabani sikhatsi. ⁸ Wabatfumela eBhetlehema, utsi, ''Hambani nifunisise lomntfwana lomncane. Uma senimtfolile, nibuyise livi khona nami ngitokuta ngitomkhotsamela. ⁹ Emvakwekuba beve inkhosi, besuka bahamba endleni yabo, nalenkhanyeti lebebayibonile emphumalanga yahamba embikwabo yaze yefika yema lapho bekunalontfwana khona lomncane. ¹⁰ Uma babona lenkhanyeti, bajabula ngentfokoto lenkhulu. ¹¹ Bangena kulendlu babona lontfwana lomncane ana make wakhe Mariya. Baguca phasi bamkhotsamela . Bavula tikhwama tabo bamupha tipho teligolide, nemphepho, nemakha. ¹² Nkulunkulu wabacwayisa ephusheni kutsi bangabuyeli ku Herodi, ngako ke babuyela emuva eveni labo ngalenye indlela. ¹³ Emvakwekuba sebahambile, ingelosi yeNkhosi yavela kuJosefa ephusheni yatsi, ''Vuka, tsatsa lomtfwana lomncane na make wakhe, nibaleke niye eGibhithe. Hlalani lapho ngize ngikutjele, ngoba Herodi utofuna lomntfwana lomncane kutombulala.'' ¹⁴ Josefa wavuka lobo busuku watsatsa lomntfwana lomncane na make wakhe bahamba baya eGibhithe. ¹⁵ Wahla khona waze wafa Herodi. Loku kugcwaliseke lokwakhulunywa yiNkhosi ngemphrofethi, ''Ngayibita indvodzana yami kutsi iphume eGibhithe.'' ¹⁶ Kwatsi kube Herodi abone kutsi uyengwe ngulamadvodza lafundzile, watfukutsela kakhulu. Watfumela kutsi kubulawe bonkhe bantfwana labadvuna baseBhetlehema nakutotonkhe tindzawo labaneminyaka lemibili budzala nalabangaphasi, kwaya ngendlela yesikhatsi labutisise ngaso kulamadvodza lafundzile. ¹⁷ Kwabese kugcwaliseka lokwakukhulunywe ngemphrofethi Jeremiya, ¹⁸ ''Levakala livi eRama, kukhala nekulila lokukhulu, Rakheli akhalela bantfwabakhe, angasafuni nekudvudvutwa, ngoba bebangasekho.'' ¹⁹ Kwatsi kube kufe Herodi, buka, ingelosi yeNkhosi yavela kuJosefa ephusheni eGibhithe yatsi, ²⁰ ''Vuka utsatse lomntfwana na make wakhe uye eveni laka Israyeli, ngoba labo labafuna lemphilo yalomntfwana bafile.'' ²¹ Josefa wavuka, watsatsa lomtfwana na make wakhe, wabuyela endzaweni yaka Israyeli. ²² Kodvwa watsi nakeva kutsi Akhelawusi abesabusa etikwe Judiya endzaweni yababe wakhe Herodi, wesaba kuya khona. Emvakwekutsi Nkulunkulu amucwayise ephusheni, wasishiya lesifundza saseGalile ²³ waya wayohlala edolobheni lelibitwa kutsi iNazaretha. Loku kugcwaliseka lokwakhulunywa ngebaphrofethi, kutsi utawubitwa ngekutsi ngumNazaretha.