¹ Sisebenta ngekuhlanganyela naYe, siyanincenga nani kutsi ningawemukeleli lite umusa waNkulunkulu. ² Ngobe utsi, " Ngesikhatsi lesikahle ngikunakile, nangelusuku lwensindziso ngakusita." Buka ke, Nyalo ke sikhatsi lesikahle. Buka ke, Nyalo lilanga lensindziso. ³ Asibeki sikhubekiso ngaphambi kwanobe ngubani, ngoba asifuni kutsi inkonzo yetfu yenteleke phansi. ⁴ Kunaloko, sitiveta ngako konkhe kwenta kwetfu, kutsi sitikhonti taNkulunkulu. Sitikhonti taKhe ngalokukhulu kubeketela, kucindzetelwa, lusizi, bulukhuni, ⁵ kushaywa, kuboshwa, kususelwa ludwishi, kusebenta kamatima, kucwasha, kulamba, ⁶ bumsulwa, kwati, kubeketela, sihawu, kuMoya Longcwele, kutsandza ngekweliciniso. ⁷ Sitikhonti taKhe evini leliciniso, emandleni aNkulunkulu. Sihlome ngetikhali tekulunga tesandla sekudla netesancele. ⁸ Sisebenta sihlonishwa noma sedzeleleka, sihletjwa noma sidvunyiswa. Sisolwa ngekutsi sibakhohlisi sibe sibeliciniso. ⁹ Sisebenta kube shangatsi asatiwa ibe kani satiwa kakhulu. Sisebenta njengalabafako - buka! -sisaphila. Sisebenta njengalabajeziselwa labakwentile kodvwa njengalabagwetjwe intsambo. ¹⁰ Sisebenta njengalabaselusizini, kodvwa siyatfokota njalo. Sisebenta njengalabaphuyile, kodvwa senta labanyenti babe tinjinga. Sisebenta njengalabangenalutfo ibe kani sibanikati betintfo tonkhe. ¹¹ Silikhulume lonkhe liciniso kini, nine baseKhorinte, futsi inhlitiyo yetfu ivuleke kakhulu. ¹² Akusitsi lesinivimbele, kodvwa nivimbeleke kutenu tinhlitiyo. ¹³ Nyalo ke nakubuyiselwana ngalokulinganako - ngikhuluma njengakubantfwana - nani sivulekeleni kakhulu ngalokunjalo. ¹⁴ Ningabi ngulababoshelwe ndzawonyed nalabangakholwa. Ngobe kunakuhlobana kuni kulunga nekungabi namtsetfo? Kunabudlelwane buni kukhanya nebumnyama? ¹⁵ Kuvumelana kuni Khristu langaba nako naBheliyari? noma ke bangahlephulelana ngani lokholwako nalongakholwa? ¹⁶ Futsi kuvumelana kuni lokukhona emkhatsini welithempeli laNkulunkulu netithico? Ngoba tsine silthempeli laNkulunkulu, Njengaloku Nkulunkulu atsi: "Ngiyawuhlala phakatsi kwabo ngihambe ekhatsi kwabo. Ngiyawuba nguNkulunkulu wabo, bona babe bantfu bami." ¹⁷ Ngako ke, "Phumani kubo, nehlukaniselwe," kusho inkhosi. "Ningakutsintsi lokungcolile, ngiyawubese ngiyanemukela. ¹⁸ Ngiyawuba nguyihlo kini, nine nibe ngemadvodzana nemadvodzakati ami,"kusho Simakadze longuSomandla.