¹ Sombi panshiku, isho palibele ifunde ilya fumine kuli Kaisa Ogusito alitumine imbila ikulu ati ukulilembesha kubebo kubantu bonse abekala mu kyalo. ² Ukulembwa ku ekwakutanga ilyo Kulenyo ali mukulu wa mupunda waku Silya. ³ Penka bonse balile mwabo mumishi mukulilembesha ukupendwa. ⁴ Na Jesfi naye alile ukufuma ku Ngalili, ufuma kumushi wa ku Nasaleti, ukuya ku Judiya, kumushi wakwe Dafidi, uyo uwitwa Betelemi, pakuti ye ali wa muñganda na mukiloto kya kwe Dafidi. ⁵ Alile kulya mukulilembesha pamo na Maliya, uyo aambishe kabili ali ne pafu. ⁶ Penka ili bali kupele uko, ne mpindi yalifikile iya kufyala umwana wakwe. ⁷ Penka alifyele umwana umwalalume, umubele umwana wakwe, kabili alimufimbilishe mungubo ili ali nekumulalika mu kipaka umwakulala iñgombe, pakuti tamwalipo umupunda muñganda mukati mulya. ⁸ Mwali abalembeshi muli kilye kyalo abali kwikala pa kyembelelo, balikulonda imbelele shabo ubushiku. ⁹ Inkalamba yaba Shikulu kaiboneka kulibo, ne buleme bwa ab Shikulu bwali boneka pakuti kabo, kabili baliswile ne mwenso uwukulu. ¹⁰ Lomba inkalamba yalilabila kulibo ati, ''Mwitina, pakuti naleta ikyebo ikiweme ikyo ikikaleta ukusemba ukukulu kubantu bonse. ¹¹ Pakuti lelo abe Wakupulusha afyalwa kulimwebo mumushi wakwe Dafidi! Eba Kilishitu ba Shikulu! ¹² Aka ekeshibilo aka kapelwa kuli mwebo: Mwakusanga ukeke ulupambilwe mu Ngubo ulele mu kipaka kya ñgombe.'' ¹³ Penka pamo ne nkalamba ibumba ilikulu ukufuma kwiulu, ukulukulemya ba Lesa ne kulabila ati, ¹⁴ ''Ubuleme kwi ba Lesa kwiulu kwankimbe, napanshi napabe umutende na mubantu abo mulibo emo balukutemwa.'' ¹⁵ Penkapo iyo inkalamba shabwele ukufuma kulibo ne kuya kwiulu, abembeshi bali kulibilishanya umo ne mubyakwe, ''Ngatuye bukumo ku Betelemi tukabone iki ikintu ikya kita, ikyo ikyalenga ba Shikulu kishibanikwe kuli fwebo.'' ¹⁶ Nabo kababutukilako kulya ne kusanga Maliya, Jesefi, ne lukeke, lulilele mukipaka kya ngomba. ¹⁷ Panuma yakumubona ye, balitulishe ifya labilwe kulibo pafyamwano yu. ¹⁸ Nabo bonse abaumfwile fyo balikankamene pafintu babebelebo kubembeshi. ¹⁹ Sombi Maliya alitwalilile ukulanguluka pafyo aumfwile, ne yalama mumutima wakwe. ²⁰ Penka abembeshi balibwelele, ili bakindika ne kulemya ba Lesa pafintu fyonse ifyo ba umfwile ne kubona, kuti nifyopelefyo fyalabilwe kulibo. ²¹ Panuma yakupitapo inshiku shi sanu na shitafu, ili akupwelwe, bali mwinike ati Yesu, ishina ilyo ba mupele ku nkalamba ilyo tamgemitwa munda. ²² Penkapo ilyo inshiku shakuliswesha ishelelwe shafikile, kuti lifunde lya kwe Mose, balimutwele kwi tempele mu Jelusalemi mukumupela kuli ba Shikulu. ²³ Kuti nifyopele ifi kilembelwe mwi funde lya ba Shikulu,''Abalalume bonse ababeli bakekalikwa ba swetelele ba ba Shikulu.'' ²⁴ Penka bali peleumulambu ukulingana ne fyalabilwe mwifunde lya ba Shikulu, ''ba shikapele babili neli twana nkulimba tubili.'' ²⁵ Moneni, kwali umuntu mu Jelusalemi ni neshina lyakwe ni Simoni, uyo muntu ali mulungeme ne kulipelesha. Ali kupembela ukutubishiwa kwa Isilaeli, ne mupashi uswatelele wali pali ye. ²⁶ Nakabili fya limonekele ati tukabonapo imfwaili taungababona ba Shikulu baba Kilishitu. ²⁷ Naye alitangililwe ne Mupashi, Simoni alishile mwi tempele. Ilyo a bafyashi ba muletele kuntashi Yesu, muku mukitila kuti kisho kya funde, ²⁸ ali mupokele mumaboko yakwe ne kulemya ba Lesa, ne kulabila ati, ²⁹ ''Bukumo lekeni umusha wenu ngaoyo mumutende, ba Shikulu, ukulingana ne mashiwi yenu. ³⁰ Pakuti amenso yangi ya bona ukupulusha kwenu, ³¹ Uko mwanshikile pamenso abantu bonse: ³² Ekutuba ukwa ku Fisulula ku bena fyalo ne buleme ku bantu benu aba Isilaeli.'' ³³ Lomba ba wishi na ba nyina balikankamane pakuti pafintu ifyo ifya lukulabilwa pali ye. ³⁴ Simoni ali bapalile ne kulabila kuli Maliya inakwe, ''Moneni, uyu mwana ali sontelwe mukulengesha ukuwa nekwima kwa bantu abengi mu Isilaeli ne keshibilo aka lendululwa- ³⁵ Ikine ni mpoko nayo ikakulasa mumutima- abe wemwine mukweba bati ifyakwa lakanya mumitima iingi fikafisuluka.'' ³⁶ Kabili ne wakushimika umwanakashi uweshina lyakwe Ana eko ali kulya. Ali mwana wakwe Fanweli ukufuma mukoka wakwe Asyali. Opele uyo alikekwile mumunshiku shakwe. Alikele imyaka isanu na ibili ne mulume wakwe ukufuma kubushiku bwakwe, ³⁷ kabili bumukamfwilwa imyaka amakumi- asanu naatatu naimbi ine peulu. Taalukufuma ku kwitempele alukupyunga ne kukano kulya ne kutembela, ubushiku ne kasuba. ³⁸ Pali yopele yo impindi alipalamine kulibo ne kutatika ukubatota ba Lesa, kabili ne kulabila pa mwana yo bonse abalukupembelela ukulubulelwa kwa Jelusalemi. ³⁹ Popele pa kupwisha fyonse ifyo baelelwe ukukita ukulinganya ne funde lya ba Shikulu,bali bwelele ku Ngalili, ku mushi wabo ku Nasaleti. ⁴⁰ Ne mwana yo alikulile ne kuba ne makosa, ne kwisula amano, ne nkubu ya ba Lesa yali pali ye. ⁴¹ Lomba ba wishi na ba nyina balukuya imyaka yonse ku Jelusalemi pampindi ya kitenge kyamuchiluku. ⁴² Penka ilyo yakumene imyaka yakwe ikumi na ibili yakukula, balibweleleko kuti umubela wa mpindi ya kitenge. ⁴³ Lomba ilyo ba kumanishe inshiku shonse isha kulila, batatikile ukubwela ku mushi. Penka ba Yesu umwanike ali shele mu Jelusalemi bawishi naba inakwe tabafishibilepo ifi fintu. ⁴⁴ Bali kuketekela ati emo ali mwibumba ilyo balukuya nalyo, lomba ba lyendele. Ati umusinso wakasuba kamo penka kabatatika ukumufwayafwaya pakuti pabakwabo napababyabo. ⁴⁵ Penka pakubulo kumubona, balibwelele ku Jelusalemi ne kutatika ukumufwaya fwaya kulya. ⁴⁶ Lomba ili shapitile inshiku shitatu balimusangile mwitempele, aliikele pakati kabasambishi, alikubonfwa ne kulukubepusha ifya kwipusha. ⁴⁷ Penka bonse abamumfwile balikankamene pakuti pakalango kakwe ne kwasuka kwakwe. ⁴⁸ Nabo pakumumona, balikankamene. Nabanyina bali mwebele ati, ''wemwana, mba nindo watukitile fi ? Bona, bawiso nanebo twalukuku fwaya fwaya nekukabila ukukulu.'' ⁴⁹ Naye alibasukile ati, ''Mbanindo mwalukumfwaya fwaila? Kanshi tamwaishibele ati ndyelelwe nebo ukuli mufya kukita kita ifya ba Tata? ⁵⁰ Sombi bo tabaumfwilishe bwino amashiwi ayo alabile kulibo. ⁵¹ Penka alikumbukile ne kuya nabo kumushi ne kufika ku Nasaleti kabili ali kubankakila bo. Nabanyina nabo balukufilama ifi fintu fyonse mu mutima wabo. ⁵² Lomba ba Yesu batwalilile ukekela ne mano ne fumbi, ne kufulilako ukubonwa bwino kuli ba Lesa na bantu.