¹ Abengi balibulile umulimo uwakubeka ifintu pamo ifyakichilwe ifibonekele muli fwebo. ² Kwati fyenka fyaishile kuli fwebo nabo abakulilapo imboni ababomfi ba shiwa. ³ Kashi kyalibonekele kuli nemo, pantu nalifwailishe fyonse bwino ukufuma kukutanga, ukumilembeleni bwino mwebo, ukucila makosa Teofila, ⁴ Ukwebati mwingeshiba bwino ifintu ifyo bamisambilisheni. ⁵ Mushiku sha mfumu Helodi waku Yuda kwali umupapatilishi uwe shina lyakwe Zakaliya ukufuma ku Abiya. Ne mukashi wakwe Elizabeti wamukifyashi kya kwa Aroni. ⁶ Bonse bali abalingeme kuli Lesa, balukwenda abakubula umulandu mumafunde onse abaShikulu. ⁷ Lomba takwetepo umwana pantu Elizabati ali ningumba, kabili bonse babakulu mu myaka. ⁸ Kyalibonekele ati Zakaliya aliku menso aba Lesa ili alupyunga umulimo wabupapatilishi uyo apelwe. ⁹ Ukulingana ne kifyalilwa musala wisa mupapatilishi ufwile ukupyunga afwile ukusalwa nobubale mukwingila mwitempele lya baShikulu mukocha ifyakufutumana. ¹⁰ Ibumba lyonse lyalibele pesonde mukutembela papindi balukocha ifya kufutumuna. ¹¹ Penka inkalamba yaba Shikulu yalibonekele kuli ye ne kwimakana kululyo kwa kyonto. ¹² Ili Zakaliya amubwene, alikatashiwe, kabili alifwile umwenso. ¹³ Lomba inkalamba kailabila kuliye ati, ''Wiufwa umwenso, Zakaliya pakuti itembelo lyobe lyaufwika. Umukashi wobe Elizabeti ali nokufyala umwana umalalume, mukamwita inshina ati Yoane. ¹⁴ Mukaba ne kusangalala kabili nabengi bali ne kusangalala pakufyalwa kwakwe. ¹⁵ Ali ne kuba umukulu pa menso abaShikulu. Ekanwapo ifisunga ifibilile makosa, kabili ali ne kwisushiwa ne mupashi uswetele ukufuma mumala muli nyina. ¹⁶ Abengi abamukifyashi kyakwa Isaeli bali ne kwalulucila kuli Shikulu Lesa wako. ¹⁷ Ali ne kuya kumenso aba Shikulu mumupashi ne makosa akwa Elaijah mukupilibula imitima yaba wishabo kubana babo naba kulengulula amano abalungeme ukuba abantu abalibambile ukwisa kwaba Shikulu.'' ¹⁸ Eli Zakaliya alabile ku ba malaika ati, ''kuti naishiba shani"Pantu ndimukulu kabili ne mukashi wangi pamo naye'' ¹⁹ Penka ba malaika nkayasuka ne kulabila kuliye ati,' ''Ninemo Gabulyelo uwimakaninako kumenso aba Lesa nalituminwe mukulabila kabili mwebo, mukumileteleni amashiwi ayaweme. ²⁰ Mona! uli ne kubacibulu, ukufilwa ukulabila, ukufikile kasuba ifi fintu fikaboneke. Pamulandu wakwebati tamwasumine amashiwi yangi, ali ne kufikilishiwa papindi iyiweme.'' ²¹ Lomba abantu balukupembelela Zakaliya kakumya pakuti aliposele impindi itali mwitempele. ²² Pakuti ili afuminemo talukulabilapo kulibo. Kabanukisha ati abona ikimonwa ili ali mwitempele katwalilila mufyakubwonako kulibo kabili ne kushala kibulu. ²³ Kyalibonekele ukwebati ili inshiku shakwe shapwile isha mulimo, alifumine muñanda. ²⁴ Panuma yashilye nshiku, umukashi wakwe Elizabeti kaimita kabili pamyenshi isanu alifishile alilabile ati,' ²⁵ ''Ífi efyo ba Shikulu bakita kuli nemo ili bandoleshe ne nkumbu pakumfumya insoni ku bantu.'' ²⁶ Mu mwenshi wa busanu ne umo, ba malaika Gabulyele alituminwe kufuma kuli Lesa ku mushi wa Ngalili uwitwa ati Nazarete, ²⁷ Kumwanakashi na kisungu uwakobekelwe kumuntu weshina lya Yosefu, uwamukifyashi kyakwa Dafidi nakisungu weshina lya Maliya. ²⁸ Alishile kuli ye umwanakashi ne kalabila ati, ''Umutende weukebelwe bwino! Shikulu ali na webo.'' ²⁹ Alikatashiwe makosa na ayo mashiwi kabili kakumya umusango wakuposha uyo kwingaba. ³⁰ Malaika kalabila kuli ye, ''wiumfwa umwenso, Maliya, wasanga kukebwa bwino na Lesa. ³¹ Bona, uli ne kwimita ne kufyala umwana umwalalume muli ne kumwita ati, 'Yesu.' ³² Ali ne kuba umukulu kabili aketwa ali umwana wauchilile makosa. Ba Lesa bakamupela ilya kwa Wishi Dafidi. ³³ Ali ne kutangilila abamuñanda yakwa Yakobo inshiku shonse kabili takwakabe mpelo kubufumu bwakwe.'' ³⁴ Maliya kalabila kuli malaika ati,'' ngefi fikakichika shani, ili shishibelepo umwalalume uli onse?'' ³⁵ Penka malaika kayasuka ne kumwebati, ''umupashi wamushilo ali ne kwisa pali webo, kabili ne makosa amwine uchilile akoisa pali webo. Kanshi uswetele uli ne kufyalwa aline kwitwa umwana wakwa Lesa. ³⁶ Mona, umulongo wobe Elizabeti aimita umwana mwalalume mubukote bwakwe. Uyu emwenshi wa busanu na umo kuli ye, pakuti alitilwe ñumba. ³⁷ Pakuti tapalipo ichikosele kuli ba Lesa. ³⁸ Maliya kalabila ati, ''Mona, ninemo kana kashi umusha wa ba Shikulu, kakibe fyenkefyo ukulingana ne mashiwi enu.'' Penka ne malaika kaiya ne kumusha umwanakashi. ³⁹ Penka Maliya kaima muli shilye nshiku kabili ne kubutukila ku kyalo kyampili, umushi uwa mu Yuda. ⁴⁰ Kaya muñanda yakwa Zakaliya ne kumuposha Elizabeti. ⁴¹ Kabili kyalibonekele ati ili Elizabeti aumfwile ukuposha kwakwe Maliya, umwana mwipafu lyakwe kafunka, kabili Elizabeti aliswilwe ne mupashi uswetele. ⁴² Penka kaimya ishiwi lyakwe ne kubilika ati, ''ulishukile mubanakashi bonse, kabili fishukile ifitwalo ifya mwifumo lyobe. ⁴³ Mbanindo kyabonekela ikyakwebati nyina ba Shikulu bengesa kuli nemo. ⁴⁴ Pakuti bona ili kilulumu kya ufwanikile kya kuposa ukwisa mumatwi angi, umwana mwipafu lyangi kafunka. ⁴⁵ Alishukile umwanakashi uwasumine ukwebati kuli ne kufikilishiwa ifintu ifya labilwe kuli ye kufuma kuli ba Shikulu. ⁴⁶ Maliya kalabila ati umweo wangi alimya ba Shikulu. ⁴⁷ Ne mupashi wangi asangalala muli ba Lesa umupusushi wangi. ⁴⁸ Pakuti alolesha ubwikoshi bwa mwanakashi uwamulimo ubunini. Lomba moneni, kufuma luno abantu abengi bbangita ushukile. ⁴⁹ Pantu uwamakosa akita ifikulu kuli webo ne shina lyakwe uswetele. ⁵⁰ Inkumbu shakwe shafuma kukifyashi na kukifyashi kuli babo abamuchina. ⁵¹ Alangisha amakosa akwe ne kuboko kwakwe. ⁵² Afumya abana bamafumu pafitibe fyabo kabili ne kwimya abali panshi. ⁵³ Aikutisha abali nensala ne fintu ifiweme pakuti abanoshi abatamfya ne nsala yabo. ⁵⁴ Apela ukofwa kuli Isaeli uwa mulimo wakwe. Kwati ni mukwibukisha mukulangisha inkumbu ⁵⁵ (kwati fintu alabile kuba Wishi) kuli Abulama ne kifyashi kyakwe inshiku shonse. ⁵⁶ Maliya alikele na Elizabet imyeshi itatu kabili eli abwelele kwakwe. ⁵⁷ Kabili ili impindi yafikile kuli Elizabetiiya kufyala umwana wakwe kabili alifyele umwana mwalalume. ⁵⁸ Penka abo ekala nabo ne balongo kobofwa ati ba Shikulu bamukichila nkumbu ishikulu makosa, kabili kabasangalala pmo nakwe. ⁵⁹ Kabili kyalibonekele pa bushiku bwa busanu na atatu kabaya mu kumusembulula umwana. Bali ne kumwita ishina lya Wishi ''Zakaliya,'' ⁶⁰ Lomba nyina kalabila ati, ''Yowo aketwa Yoane.'' ⁶¹ Kabalabila kuli ye ati, ''Takulipo nangu umo mukifyashi kyenu ukwetepo ili shina.'' ⁶² Kabalangisha Wishi ifishibilo ifyo alukufwayo ukumwinika ishina. ⁶³ Penka Wishi kaipusha mulemba pebwe ne kulemba ati, ''Ishina lyakwe ni Yoane.'' Bonse kabakumya pali kiki. ⁶⁴ Penka ne kanwa kakwe kalisukile ne lulimi kalukakulwa. Kalabila ne kutasha ba Lesa. ⁶⁵ Ne mwenso kabekata bonse abo aleikala nabo pamo. Ifi fyonse kafisampukila mukyalo kyonse ikya mpili mu Yuda. ⁶⁶ Bonse aba bofwile kabafilama mu mitima yabo, ne kulabila ati, ''ngo uyu mwana ali ne kuba uwa shani?'' Pantu ukuboko kwaba Shikulu kwali pali ye. ⁶⁷ Wishiye Zakaliya kalisulwe no mupashi uswetele no kusesema, kalabila, ⁶⁸ ''Balemeshiwe ba Shikulu, Lesa wa Isaeli, pakuti aisa mukofwa kabili ne kushilisha ukupususha abantu bakwe. ⁶⁹ Atwimishila ulusengo lwakupulusha munga ya musha wakwe Dafidi. ⁷⁰ (kwati nififi lya alaabile ne kanwa kakwe palwa ba kasesema bakwe kufuma kukale) ⁷¹ Ukupulusha ukufuma kubalwani besu kabili naku maboko abapate besu. ⁷² Ni ulya ulangisha nkumbu kuba fyashi besu ne kwibukisha ukulaya na kwakwe ukuswetele. ⁷³ Ukulapa uko alabile kuli Abulama umufyashi wesu. ⁷⁴ Kalapa ukutupela fwebo ukwebati, ili twapokololwa mu maboko abalwani besu, tukamibombela ukwakubula ukutina. ⁷⁵ Mukusweshiwa ne kulungama kuntanshi yakwe inshiku shesu shonse. ⁷⁶ Ee, na webo, umwana, aketwa kasesema wa ukililepo makosa, pakuti mukaya ku menso akwe Shikulu mukulungika inshila shakwe, ne kupekanya kukwisa kwakwe. ⁷⁷ Mukupela akalango kakupusuka ku bantu bakwe mukufitulukilwa kwa fibipile fyabo. ⁷⁸ Filine ne kucifwa pamulandu wa nkumbu shakwe ishikulu ishaba Lesa wesu. ⁷⁹ Mukutumbisha bonse abali mufifi na mukishingwa kyamfwa, Ali ne kukita fi mukutangilila amolu esu munshila ya mutende. ⁸⁰ Penka umwana alikulile ne kuba ukusele mumupashi, kabili alikele mumpanga ukufika ne mpindi ya kubonekela kuli Isaeli.