¹ Abis nyak, Imam Bosar nanyak, "Ope kah bonar pinyak?" ² Lalu, Stefanus ngomong, "Bala Mianak bala iyakng Tua, dinga aku. Allah Nang Mahamulia madah ke inik atuk kite, Abraham, waktu inyie agik diapm di Mesopotamia, seopatn inyie diapm di Haran, ³ lalu ngomong ke inyie, 'Lar'i dar'i tanah ko tamah dar'i anak meyanak ko, lalu datakng ke tanah nang Aku tunyok ke iko nanak. ⁴ Abis nyak, Abraham ningal tanah iyakng Kasdim lalu diamp di Haran. Lalu dar'i nyun, seudah apaknge mati, Allah nyuruhe pinah ke tanah nyak, bongkah tuk iko diapm. ⁵ Tapi, Allah adak morik kekaya ke inyie, sikit pun adak, tapi bejanji morik ke turutn ke Abraham ke pengantie sampe ke anak ucuke, biyar pun Abraham opatn bebini. ⁶ Lalu, Allah ngomong pituk, ke turutne pasti jadi iyakng nyaruh di tanah nang ayuk di roncak sidak di suruh jadi kuli lansokng di peraka selamak empat ratus tautn. ⁷ Abis nyak, Aku nak ngukupm bangsa nang nguli sidak tadik, 'Allah ngomong, 'lalu, seudah nyak sidak nak keluar dar'i nyun lalu semayakng ke pada-Ku di bongkah tuk.' ⁸ Lalu, Allah morik ke Abraham janji ngenyunat e , lalu Abraham jadi apakng Isak langsokng nyunante dah berumur lapatn ari, lalu Isak jadi apakng Yakup, lalu Yakup, lansokng jadi duak blas inik moyang. ⁹ Bante iri monto Yusup, inik moyang kite lansokng nyual'e ke Mesir. Tapi, Allah morik berokat ke Yusuf, ¹⁰ lalu nyelamat'e dari sengsara, lalu morik'e anugrah keberanian di adap Firaun, Raja Mesir, nang nyuruh'e jadi pemimpitn atas Mesir tamah istana'e. ¹¹ Kala nyak, musipm lapar tejadi di Mesir tamah Kanaan, melar'at, lalu inik moyang kite adak tetomu ke pemakatn. ¹² tapi Yakub dah ninga kalau di Mesir ada ganupm, inyie lansokng nyuruh inik moyang kinyun nang ayuk sekali ngeroncake. ¹³ ke dataknge nang ke duak, Yusuf mpulah idike di ponto segala meyadik'e, lalu keluarga Yusuf diketau Firaun. ¹⁴ Udah nyak, Yusuf be posatn lalu madah Yakub, apaknge, tamah semua meyedike, semuae ada 75 oyakng. ¹⁵ Lalu, Yakub lansokng ke Mesir mati dinyun tamah inik moyang kite. ¹⁶ Di nyun, sidak di pinah ke Sikhem lalu di lotak di kubure nang udah Abraham boli make semua duet dari anak Heron di Sikhem. ¹⁷ Lalu, udah somak janyi kala nyak, nang udah Allah borik ke Abraham, bangsa nyak betamah di Mesir, ¹⁸ sampe ada raja laitn bangkit atas semua Mesir, nang adak tau cerita Yusuf. ¹⁹ Raja nyun nyuruh inik moyang kite muankng bala anak sampe sidak pun adak ulih beta'atn idup. ²⁰ Pada kala nyak, Musa laher lalu inyie bagos di mata Allah. Lalu, Musa di kerintu di rumah apaknge selamak tiga bulatn. ²¹ Lalu, inyie di buakng, putri Firaun ngamike lalu ngerintue osa anake soyakng. ²² Lalu, Musa di ajar dalapm semua pelajar iyakng Mesir lalu inyie tau pelajare nyak. ²³ Lalu, Musa gonap berumur mpat puluh tautn, keluar dalapm atie ingin betomu tamah meyanake,dari keturutn Israel. ²⁴ Lalu monto sikonkng dari sidak nang mangan di Mesir, Musa lansokng ngemela iyankng nang di peraka nyak lalu inyie malas iyankng Mesir nyun langsokng di bunuh e. ²⁵ Musa kira tik meyadik ngeroti kalau Allah morik pertolongan ke sidak ngelalu idike, tapi sidak nyah adak ngeroti. ²⁶ Pas ari kolapme, Musa monto iyankng Israel nang bekelai, lalu inyie usaha nyadar sidak, lalu ngomong, 'hei, opekah ikapm bemedik, ngompe suka bekelai?' ²⁷ Lalu, iyankng nang suka ngelai meyedike tadik nyiduk Musa ke sisi lansokng ngomong, 'sope nang nyuruh ko nyabar kami? ²⁸ Ope iko tik nak munuh aku upa iko kala nyak munuh iyankng Mesir?' ²⁹ Ninga kata iyankng nyak, Musa lansonkng lari jadi iyankng nyaruh di Midian. Di nyun, inyie jadi apankng ke duak anak lelaki. ³⁰ Udah gonap mpat puluh tautn, soyankng malaikat nang nampak idike ke Musa di tongah rampuk di bukit Sinai, di dalapm lidah api di rampuk durik. ³¹ Waktu Musa montoe, inyie eranh dengan pemonto inyi e. Maktu inyi nyomak e , dayakng ingan Tuhatn, ³² 'Aku am Allah inik moyang kam, Allah Ishak , tamah Allah Yakub.' Musa begogar golak lalu adak berani ngelomantne. ³³ Lalu, Tuhan ngomong ke inyie, 'Lopas sandal di kaki ko bante bongkah di one iko bediri tuk tanah suci. ³⁴ Aku dah bonar ngelomatn penyakit murit ku nang ada di Mesir lalu kedinga ke suara sidak nonitn. aku lansokng turtn mantuk sidak. Lalu aboh, aku maik ko ke Mesir.' ³⁵ Musa, nang dah di user sidak ngomong, 'Sope nang nyuruh ko bekuasa atas kami?' Inyie nang di suruh Allah, bait penguasa atau suka mantuk, lalu Malaikat menampak idike ke inyie di semak durik. ³⁶ Iyankng tuk nang mimpitn sidak keluar,Di nyun ada mukjizat lalu ada tanda ajaib di tanah Mesir. di Laut Merah, lalu di padang belantara selamak mpat puluh tauntn. ³⁷ Musa tuk lah nang ngomong ke bangsa Israel, 'Allah bangkit bagi ko se iyankng nabi upa aku di tongah meyedik ko. ³⁸ Tuk iyankng nang ada di tongah jemaat di padang belantara besama malaikat nang ngomong ke inyie di gunung Sinai, tamah inik moyang kite, inyie udah nerimak firman nang idup nang di borik ke kite. ³⁹ Inik moyang kite bolek tunok ke Musa, tapi ngalahe lalu ingin pulankng ke Mesir di dalapm atie, ngomong ke Harun, 'Pulah dewa ke kami nang bejalatn ⁴⁰ di adap bante Musa tuk, nang mimpitn kami ke luar dari Mesir, kami adak ke tau ope nang udah tejadi ke inyie. ⁴¹ Waktu kala nyak, sidak mulah patonkng anak lembu, lalu morik sembah ke berhala nyak, lalu senang tamah hasil kereja jari sidak. ⁴² Tapi, Allah lari dari sidak lalu nojuk sidak nyembah malaikat di langit, upa nang di tulis dalapm kitab para nabi, Ope kah iko maik ke aku pengidup lalu morik selamak mpat puluh tautn di rampuk rinuk, hai umat Israel? ⁴³ Iko maik kemah Molokh lalu bintang dewa ko, Refan, patonkng nang iko pulah pake nyembahe, lalu Aku muankng ko ke seborakng Babel.' Am. 5:25-27 ⁴⁴ Inik moyang kite ada Kemah Kesaksian di padang belantara, upa nang Allah suruh waktu ngomong ke Musa, mpulahe upa gamar nang inyie kelomatn. ⁴⁵ Udah nerimak kemah nyak, inik moyang kite maike tamak tamah Yosua, waktu ngerobut tanah sidak dari bangsa laitn, nang udah Allah user dari adap inik moyang kite, sampe ke zaman Daud. ⁴⁶ Daud dapat kasih karunia di adap Allah lalu mintak bongkah ke diapme ke Allah Yakub. ⁴⁷ Tapi, Salomo nang mpulah sebuah rumah ke Inyie. ⁴⁸ Mungkin, Nang Paling tingik adak tingal dalapm rumah nang di pulah dari jari mensia, upa nang di padah nabi, ⁴⁹ 'Langitn bongkah Ku lalu bumi penumpu kaki Aku. Rumah ope nang ko pulah ke Aku?' Allah berfirman, 'Atau, ope bongkah belopa Aku? ⁵⁰ Adak kah jari Aku nang mpulah semuae tuk?' Yesaya 66:1-2 ⁵¹ Hai, ikapm yankng nang koras kepala, tamah hati lalu kelinakng nang adak ninga, ikapm nang suka nantakng Roh Kudus, upa nang di pulah inik moyang kapm! ⁵² Nabi one nang adak di peraka inik moyang kapm? Lalu, sidak munuh iyankng nang udah ngumum kedatankng sang kebenaran, nang tuk udah jadi idike soyankng jadi penghianat lalu pemunuh. ⁵³ Iko nang udah nerimak Ukupm Taurat upa udah madah para malaikat, tapi iko udah nyagae!" ⁵⁴ Udah sidak ninga hal tuk, ati sidak tetumok lalu ngeret gigi sidak ke Stefanus. ⁵⁵ Tapi, Stefanus nang diponuhe Roh Kudus ngelomatn ke langitn lalu ngelomatn kemuliaan Allah, lalu Yesus bediri di sepiak kanan Allah. ⁵⁶ Stefanus ngomong, "Dinga! Aku ngelomatn langitn tebukak lalu Anak Mensia bediri di sepiak kanan Allah." ⁵⁷ Tapi, sidak mangkas miis make suara nang kuat, lalu nutup kelinankng sidak, Dan sepakat nyorankng Stefanus. ⁵⁸ Lalu, sidak maik'e ke luar dari kota lalu nikapme pake batu. Udah nyak, bala saksi mata ngulih jubah sidak di kaki seikokng lelaki benama Saulus. ⁵⁹ Lalu, sidak terus merajam Stefanus nang agik berseru lalu ngomong, "Tuhan Yesus, terimak roh ku." ⁶⁰ Lalu, udah belutut, inyie berseru dengan suarakut, "Tuhatn inang morik dosa tuk ke sidak!" Dan, seudah mada nyak, inyie pun mati.