¹ Seudah kami ngelalu e dengan selamat, ayuk kami ngentau e pulo nyak benama Malta. ² Pendudok asli pulo nyak bait ati semua. Bante, sidak ngidup api nyamut kami datakng kiak bante waktu nyak ari nak ujatn tamah hawa colap gak. ³ Waktu Paulus ngumpul bala rango nak ngelotak ke atas api, sikong ular murak keluar bante angat lalu ngolut jari Paulus. ⁴ Waktu bala pendudok asli monto binatakng nyak begantokng di jari Paulus, sidak ngomong ke bala pangan e, "Adak salah agik, iyakng tuk adalah pemunuh. Biar inyie selamat dari laut, keadilan adak nyojuk inyie idup. ⁵ Tapi, Paulus ngibas e ke dalapm api dan inyie adak ope-ope. ⁶ Bala iyakng ngira Paulus akan komakng dan mati kala nyak gak. Sedakng lamak sidak nunguk adis perubah ke inyie, lalu berubah pemiker sidak lalu sidak madah Paulus dewa. ⁷ Kala nyak, di somak bongkah nyak, ada tanah umpuk Publius pemimpitn di pulo nyak, nang nyamut tamah nyamu kami dengan kebait e selama tiga ari. ⁸ Waktu nyak, apakng Publius tegale di bongkah ketidi bante domum tamah konak penyakit tongat. Paulus datakng nyongok lalu semayakng, nacu jari ke atas iyakng tua nyak lalu nyomuh e. ⁹ Seudah jolu nyak tejadi, bala ensia nang sakit di pulo nyak datakng semua ke Paulus lalu somuh. ¹⁰ Sidak makin ngeromat kami waktu kami nak belayar sidak morik semua keperolu kami. Paulus Ke Kota Roma ¹¹ Seudah tiga bulatn, kami belayar dalapm kapal dari Aleksandria, nang singah di pulo nyak selama musipm colap make Dioskuri ke lamakng e. ¹² Seudah datakng ke Sirakusa, kami diapm diak selamak tiga ari. ¹³ Dari nyak, kami belayar nyusor pante lalu datakng ke Regium. Engkolapm e, angin selatan betiup, ari sutik e agik, kami datakng ke Putioli. ¹⁴ Diak, kami betomu tamah bala mianak seiman lalu di suruh diapm tamah sidak selama semingu. Lalu, kami turun ke Roma. ¹⁵ Bala mianak seiman diak, waktu ninga berita kami, sidak di nyun sampe ka Forum Apius tamah Tres Taberne datakng magak kami. waktu Paulus nonsit sidak, inyie besukor ke Allah tamah atie dikuatkan. Paulus di Kota Roma ¹⁶ Waktu kami datakng ke Roma, Paulus di sojuk diapm soyskng, tamah soyakng prajurit nang ngawale. ¹⁷ Tiga ari seudah nyak, Paulus ngumpul bala pemimpitn diak, seudah sidak bekumpul, lalu inyie ngomong, "Bala mianak, walau pun aku adak ngelaku ope-ope nang ngelawatn bangsa kite, atau adat istiadat inik atok kite, tapi aku diserah sebagai seoyakng tahanan dari Yerusalem ke bala iyakng Roma. ¹⁸ Waktu sidak merisa aku, sidak ingin ngemebas aku bante adis alasan nak ngukupm mati aku. ¹⁹ Tapi, bala iyakng Yahudi bolek, aku terpaksa ngelanyut e ke kaisar, bukatn aku ada tuduhan ke ngelawatn bangsa aku. ²⁰ Jadi, nyak am sebab e, aku udah mintak pake nalomat ikapm lalu ngomong tamah kapm bante aku di kobat make rante tuk demi pengarap Israel." ²¹ Sidak ngomong ke Paulus, "Kami adak nerimak surat tentang ko dari Yudea, adih sikong soyakng dari mianak seiman madah kabar berita nang jaek tentang ko. ²² Tapi, kami ingin ninga dari ko pendapat tentang sekte tuk, kami tau kalau done-done iyakng nantakng e." ²³ Waktu sidak udah nontu ari ke Paulus, sidak magak Paulus dibongkah inyie diapm, tamah romokng iyakng banyak. Dari lolapm sampe pemari, Paulus nyelas e ke sidak dengan bersaksi tentang Kerajaan Allah ngeyaketn sidak tentakng Yesus, bait dari Ukupm Taurat Musa, maok pun dari kitab bala nabi. ²⁴ Duak tiga oyakng yaketn ninga kata Paulus, tapi nang laitn masih adak pecayak. ²⁵ Waktu sidak adak setuju sikong soyakng, sidak pun pogi seudah Paulus madah pernyataan tuk, "Memang bonar ope nang dipadah Roh Kudus ke inik moyang kam ngelalu Nabi Yesaya, ²⁶ 'Pogi ke bangsa tuk lalu padah: Kapm ninga tapi adak tepahapm tamah kam monto tapi adak taroti. ²⁷ Sebab, bangsa tuk atie dah melulakng kelinakng e dah tobal. Sidak dah nutup mata e. Sak inang, sidak monto make mata, ninga make kelunakng, ngeroti make ati sidak lalu bebalit. Abis nyak, aku datakng nyomuh sidak.' Yesaya 6:9-10 ²⁸ Bante nyak, sak am hal tuk kapm ketau kalau keselamatan dari Allah tuk udah di padah ke bangsa laitn sidak pun ninga gak." ²⁹ [Seudah Paulus madah kata nyak, bala iyakng Yahudi pogi dengan banyak pebeda pendapat antara sidak.] ³⁰ Paulus diapm selamak duak tautn di rumah sewa e kinik lalu nyamut semua iyakng nang datakng ke inyie, ³¹ samil madah Kerajaan Allah langsokng ngajar tentang Tuhatn Yesus Kristus dengan berani adis ngaco ngerau agik.