¹ Udah nyak, Paulus ningal Atena lari ke Korintus. ² Lalu, Paulus bulih iyankng Yahudi benama Akwila, keturutn Pontus, ayuk jak datankng dari Italia tamah binie, Priskila, bante Klaudius udah merintah iyankng Yahudi ningal Roma. Paulus datankng ke sidak, ³ bante sidak ada kereja nang sama, Paulus diapm tamah sidak lalu kereja bante kereja sidak mulah tenda. ⁴ Lalu, Paulus tukar piker di sinagoge tiap ari sabat lalu usaha pecayak ke iyankng Yahudi tamah Yunani. ⁵ Abis nyak, Silas tamah Timotius turuntn dari Makedonia, Paulus mulai nyembah idike seponuhe morik firman, samil besaksi bonar ke iyankng Yahudi kalau Yesus adalah Kristus. ⁶ Tapi, sidak nantankng lalu memaki Paulus, inyie ngobas pake lalu ngomong ke sidak, "Darah ko ada di atas kepala ko soyankng! Aku bereseh. Mulai tuk lalu setoruse, aku lari ke bangsa laitn." ⁷ Lalu, inyie ningal bongkah nyak lalu lari ke rumah iyankng nang benana Titius Yustus, seiyankng ukantn Yahudi nang nyemah Allah, nang rumahe ada di sepiak sinagoge. ⁸ Krispus, ke sinagoge jadi pecayak di dalapm Tuhan tamah semua iyankng nang diapm di rumahe, lalu banyak iyankng Korintus nang udah ninga Paulus jadi pecayak lalu dibaptis. ⁹ Lalu, Tuhan ngomong ke Paulus di suatu malapm dalapm ngelomatne, "Usah golak, usah togak ngomong usah diapm, ¹⁰ bante Aku tamah iko lalu usah ada seikonkng pun nang nyorankng ko ke jadi kuliko bante ada banyak umat Aku di kota tuk." ¹¹ Nyak am, Paulus ningal di nyun selamak 1 tauntn 6 bulantn, samil ngajare firman Allah di tongah sidak. ¹² Lalu, Galio jadi prokonsul Akhaya, iyankng Yahudi tamah seati bangkit melawatn Paulus lalu maike di adap bangku pengadile, ¹³ lalu ngomong, "iyankng tuk agik ngasut banyak iyankng nyembah Allah nang belawatn tamah Ukupm Taurat." ¹⁴ Tapi, Paulus nyarih dam mukak mulute, Galio ngomong ke iyankng Yahudi nyak, "Kalau tuk suatu soal alanknge atau kejaat nang keji, hai iyankng Yahudi, aku pantas betanggonkng jawab atas perkarako. ¹⁵ Tapi, kalau tuk masalah tentakng omong, lalu nama, tamah ukupm ko soyankng, urus soyankng. Aku bolek jadi akipm atas nyak." ¹⁶ Lalu, Galio nguser sidak dari ruankng pengadilan. ¹⁷ Udah nyak, sidak semuae nangkap Sostenes, kepala sinagoge, lalu mangkonknge di adap ruankng pengadilan. Tapi, Galio adak meratie nyak. ¹⁸ Abis nyak, Paulus tingal berope ari agik, lalu bepamit tamah meyedike seiman lalu meroyo ke Siria, besama tamah Priskila tamah Akwila. Di kengkrea, Paulus nguntitn ramutne bante inyie udah mulah sebuah nazar. ¹⁹ Lalu, sidak sampe di Efesus lalu Paulus ningal Priskila tamah Akwila di nyun, tapi inyie soyankng tamak ke sinagoge lalu betukar piker tamah iyankng Yahudi. ²⁰ Tapi sidak nyuruh Paulus tingal lobih lamak, Paulus adak setujue, ²¹ tapi bepamit tamah sidak lalu ngomong, "Aku pasti kituk agik kalau Allah melinoknge." Lalu, inyie meroyo dari Efesus. ²² Udah inyie turutn di Kaisarea, inyie naitn lalu morik salapm ke para jemaat, lalu turutn ke Antiokhia. ²³ Lalu, udah ngabis berope waktu dinyun, inyie ningal bongkah nyak lalu ngelilitn sutik bongkah ke bongkah laintne di wilayah Galatia tamah Frigia, samil nguat semua muride. ²⁴ Satu saat, ada iyankng Yahudi benama Apolos, keturutn Aleksandria, datankng ke Efesus. inyie iyankng nang tepelajar lalu maher dalapm hal Kitab Suci. ²⁵ Iyankng tuk udah di ajar tentakng jalatn Tuhan lalu semangat di dalapm roh. Inyie ngomong lalu ngajare tamah teliti hal tentakng Yesus, tapi inyie anya ngentaue babtis Yohanes. ²⁶ Inyie mulai berani ngomong di dalapm sinagoge, tapi Priskila tamah Akwila ningae, sidak narit ke sepiak lalu nyelase ke Jalatn Allah lobih topat. ²⁷ Waktu, Apolos nak nyemorakng ke Akhaya, meyedik seiman nguate lalu nulis ke muride supaya nyamut kedatanknge, Kalau inyie sampe, inyie banyak nulonkng sidak nang bante anugerah udah jadi pecayak, ²⁸ bante inyie tamah koras ngelawatn iyankng Yahudi di muka umum, samil nunyok dari Kitab Suci kalau Kristus adalah Yesus.