¹ Ngant, tika onu Sabat bulalu, Maria Magdalena, Maria nok Yakobus, serta Salome, jeh mihik rempah-rempah hingga datn depit obu ngant minyaki Yesus. ² Maji-maji kali, pada onu putama minggu hant, tika motihonu terbit, datn monik koni kubur. ³ Datn nyonok nyik sama lain, ''Osiah dik dok ngulinkan botuh sok mit namok kubur hant?'' ⁴ Namun, setelahhonong koni somu, datn honong botuh dik sangat doeh hant ngulinkan. ⁵ Ngant, setelah namok koni wah kubur, datn honong nyo pumuda dik nginyak jubah mopuk gik guhuk nok supiak tauh, ngant datn tukojuat. ⁶ Lalu, diapm nyonok nganu datn, ''Yiak tuj kojuat, muk ngogau Yesus nyo Nazaret dik jeh nisalibkan. Diapm kai biatn nok te. Hanong ahok datm nguhik-N ya. ⁷ Dok tapi, obulah, sanok nganu nabuah-nabuah-Nya ngant nganu Petrus bahwa Diapm gik tiyatn muk koni Galilea. Nok nyih, muk dok budepit Diapm, mah dik Diapm nyonok nganumuk.'' ⁸ Kumudian, datn kuluar ngant obu diapm sok kubur hant karna datn gemetar ngant takjub, ngant datn kai nyonok nya oniah-oniah nganu osiah pun karna datn golak. [Ngant, segala susuatu dik jeh nipihitah agar datn nyonok nganu Petrus ngant kayau-kayaunya, datn sapai samah singkat. Setelah hant, Yesus sendirilah dik ngutus datn sok Timur sapai koni barat, ngadok nyonok cihito dik bohoseh ngant dik kai depit binasa tentang keselamatan kekal. Amin.] ⁹ Tika Yesus bangkit maji-maji pada onu putama wah minggu hant, Diapm putama-tama tumual nganu Maria Magdalena dik soknya Yesus jeh ngosar juk minu bek. ¹⁰ Lalu, diapm obu ngant nyonok nganu datn dik jeh busama samah Yesus, sementara datn gik buduka ngant nongis. ¹¹ Ngant, tika datn ngopink bahwa Yesus midiap ngant jeh honongnya, datn kai pucaya. ¹² Setelah kejadian hant, Yesus gik timual wah bentuk lain nganu du nyo sok datn dik gik bujalatn nuju koni desa. ¹³ Lalu, datn boliak ngant nyonok nganu dik lainnya, tapi dik lainnya hant gik kai pucaya datn. ¹⁴ Setelah hant, Diapm timual tediap nganu kusubolas nabuah-Nya tika datn gik guhuk duak ngatn Diapm negur datn karna ketidakpercayaan ngant kekerasan hati datn. Sebab, datn kai pucaya nganu nyo-nyo jeh hopnong-Nya ¹⁵ jeh Diapm bangkit. Ngant, Diapm nyonok nganu datn, ''Obulah koni suluruh dunia ngant bucuhitolah injil nganu sumua ciptaan. ¹⁶ Osiah dik jeh pucaya nibaptis dok niselamatkan, tapi osiah kai pucaya dok nihukum. ¹⁷ Ngant, tana-tana te dok ngajah datn dik pucaya: wah odat-Kuk datn dok ngosar minu-minu bek.' datn dok ngomong wah bahasa-bahasa bauh; ¹⁸ datn dok migit nyipih samah tongan datn; ngant jika datn nyiniap hacutn dik komek, hal hant kai dok celaka datn; datn dok tanok tongan datn somu nyo-nyo monap, ngant nyo-nyo hant dok maik.'' ¹⁹ Lalu, setelah Tuhan Yesus nyonoknya nganu datn, Diapm takat koni surga ngant guhuk nok supiak kanan Punopo. ²⁰ Lalu, datn obu ngant bukhotbah nok kiah-kiah, sementara Tuhan bukihija busama datn ngant neguhkan firman-Nya lalui tana-tana dik menyertainya.