¹ Suatu saat, ada di ntara jemaat Antiokia, nabi-nabi watn guru-guru, yatn lah Barnabas, Simeon yankg nak hobut Niger, Lukius niti kirene, menahem yankg konak bosar bahamah Herodes, raja wilayah, wat'n Saulus. ² Hamantara urankg-urankg tok hodankg hambayankg kapada Tuhat'n harota bapuasa, Roh Kudus ngomong,"Haja Khusus'ek lah untokku Barnabas watn Saulus untok njalatn tugas yankg untok yat'n Aku dah nyapa hidak. ³ Mok'mian, haudah hidak bapuasa watn badoa, harota tulonkg tapok'ek jari hidak ka atas Barnabas watn Saulus, orok hidak nyuroh dak dua'k barangkat. ⁴ Makak, haudah nak huroh Roh Kudus, Barnabas wat'n Saulus turut'n ka seleukia, lalu nitinun lah hidak balayar ka Siprus. ⁵ Katika hidak dah datang di Salamis, hidak nyarita firman Allah dirumah-rumah hambayankg urankg Yahudi, lalu hidak mbawak Yohanes jup'm habagai palayat'n hidak. ⁶ Katika hidak barangkat nyasap haluroh pulau hampai ka Pafos, hidak nomu ha'urankg tukankg sihir,ha'urankg nabi palsu Yahudi, yang badama Baryesus. ⁷ Inya bahamah wat'n Gubernur Sergius Paulus, haurankg yankg caredas, yankg mintak Barnabas wat'n Saulus datankg kapada inya lalu aus ninga firman Allah. ⁸ Tatapi, Elimas, tukankg sihir yat'n, karena mianlah damanya nak carita, manghalankg Barnabas wat'n Saulus, lalu barusaha mambelok gubernur yat'n niti imannya. ⁹ Tapi, Saulus,yankg nak kenal gak habagai Paulus, yankg ponoh lawat'n Roh Kudus, njonang Elimas, ¹⁰ lalu ngomong,"Hai ikau, yankg ponoh lawat'n hagala tipu daya wat'n hagala kajaat ikau yat'n adalah onak Iblis, ikau adalah munsoh niti hagala ka bonar, ndak aus kah ikau barenti mbelok jalat'n Tuhat'n yankg bujor? ¹¹ Tikatok, liatlah, jari Tuhat'n datankg ka atas ikau harota ikau bah njadi buta'k wat'n ndak maliat mata ari halamak baropai waktu." tika yat'n gak, mua ari hangat golap turut'n ka'atas inya harota inya barangkat bakalilinkg mansau urankg untok mirinkg jarinya. ¹² Lalu, gubernur yat'n njadi pacayak katika maliat opai yankg dah tajadi karena inya rindakg tarhadap ajarat'n tuhat'n. ¹³ Waktu katika, Paulus wat'n urankg-urankg yankg harota inya balayar niti Pafos hampai ka Perga, di Pampilia, tatapi yohanes niggal hidak lalu babalik ka Yerusalem. ¹⁴ Namun Saulus wat'n Barnabas malanjut pajalat'n dak niti Perga lalu hampai ka Antiokhia, di Pisida. Lalu, katika ari Sabat, hidak pogi ka rumah hambayankg lalu dudok di hinun. ¹⁵ Hatelah mbaca Ukup'm Taurat wat'n kitab bala nabi, kapalak-kapalak rumah hambayankg nyuroh urankg ngomong ka dakdua rasol yat'n,"Sodara-sodara,mok ikau ada naroh kata-kata pangibor untok urankg-urankg tok, carita'eklah." ¹⁶ Lalu, Paulus badiri harota mborek sarat lawat'n jarinya lalu ngomong ,"Hai urankg-urankg Israel ikau yankg gola'ak ka Allah, dinga-eklah! ¹⁷ Allah bangsa Israel tok dah mileh inek muyang kitu harota ninggi'k bangsa kitu halamak hida'k diap'm di tanah Mesir harota lawat'n jari yankg ta'angkit, Inya mamimpit'n hidak kaluar niti hiat'n. ¹⁸ halamak hakitar mpat puloh taut'n, inya basabar tahadap tingkahlaku hidak di padankg paser. ¹⁹ Lalu, haudah Inya manjoreh tujuh bangsa di tanah Kanaan, Inya mawaris'e tanah yat'n. ²⁰ Hamua yat'n tajadi kira-kira halamak mpat ratus limak puloh taut'n. haudah yat'n, Allah manyerahnya ka' Hidak hakim-hakim hampai ka masa Nabi Samuel. ²¹ Haudahyat'n, hidak mintak haurankg raja, lalu Allah mbore'k saul ka hidak, onak lalaki Kish, urankg angkit niti suku Benyamin, halama mpat puloh taut'n. ²² Haudah Allah nyungkel Saul, Allah mangkit Daud untok njadi raja hidak, yankg tentankg inya Allah dah basaksi wat'n baromong, 'Aku dah nomu Daud, onak lalaki Isai, urang yankg ngona'k di ati-Ku, yang nak malaku hamua kamaok-Ku'. ²³ Niti katurut'n urankg tok, Allah, sasuai janji- Inya, mbawa'k ka Israel haurankg Jurusalamat,yankg badama Yesus. ²⁴ haolum kadatankg Yesus, Yohanes dah mbore taok haolumnya tentankg baptisan patobatan ka hamua urankg Israel. ²⁵ Hamantara Yohanes hodankg mabis tugasnya , Inya hararat ngomong, 'Ikau kira hopai aku tok'?Aku ukan Inya. namun, liat'ek'lah, Haurankg yankg datankg haudah aku, capal di kaki-Inya pai aku ndak hanggup malopasnya.' ²⁶ Sodara-sodara, katurut'n kaluarga Abraham wat'n urankg-urankg di ntara kitak yankg golak ka Allah, kapada kitu barita kasalamat tok dah nak carita. ²⁷ Sebab, hidak yankg diap'm di Yerusalem wat'n bala pamimpin hidak, yankg ndak mangenal Inya wat'n ndak mamaham paromong bala nabi, yankg nakbaca hatiap ari Sabat, dah nak genap am omong bala nabi yat'n lawat'n mukup'm Yesus. ²⁸ Lalu, hakali pai hidak ndak katomu ka'alasan opai put'n ntok mukup'm inya hampai mati, hidak minta Pilatus untok mbunohNya. ²⁹ lalu, katika hidak nak ngenap hamua yankg dah naktulis tentankg Inya, hidak turut'n'ek Inya angkit niti kayu salib wat'n ngurinkgnya di dalap'm kubor. ³⁰ Tatapi Allah mangkit Nya niti ntara urankg mati, ³¹ harota halamak ba'ari-ari, Yesus mayok diri'k nya ka urankg-urankg yankg dah bahamah wat'n inya niti galilea hampai ka Yerusalem, yankg tika tok njadi saksi-saksi Nya bagi bangsa tok. ³² Harota, kamek pai mbawa'k untok kitak carita baik tentankg janji Allah ka inek muyang kitu, ³³ bahawa Allah udah nepat janjiNya yat'n untok kitu, onak-onak hidak, lawat'n mangkit Yesus, upa yankg ditulis dalapm kitab Mazmur pasal dua'k: 'Ikau adalah onak-Ku. ari tok, Aku dah manjadi Opankg kau.' ³⁴ Tentankg Allah yankg mangkit Yesus angkit niti ntara urankg mati, ndak akan babalik kapada ka binasa, Allah udah baromong, 'Aku nak mbore'k ka ikau barekat yankg kudus harota dapat di pacayak, yankg nakbore'k ka Daud.' ³⁵ Yat'n-lah sebabnya Inya jum baromong dalapm Mazmur yankg lainkg, 'Ikau ndak am mbiarnya urankg kudus-Kau maliat kabinasaa.' ³⁶ Sebab, Daud,haudah melayatn generasi inya handirik oleh karena kamaok Allah, lalu mati,lalu nak gurinkg di ntara inek muyangnya, harota maliat kebinasaa, ³⁷ tetapi Yesus yang Allah bangkit'ek angkit niti ntara urang mati, ndak maliat kabinasaa. ³⁸ Oleh karena yat'n, biarlah di kataok borai kitak sodara-sodara, bahwa malalu Inya yat'n lah pangampu'tn atas dosa-dosa di nyata'ek ka ikau. ³⁹ wat'n malalui-Inya,am hatiap urang yang pacayak di bebas'ek niti hagala jolu, yang angkit niti inya ikau ndak dapat di bebas'ek niti Ukup'm Taurat Musa. ⁴⁰ Jadi, bahati-hatilah supaya jolu-jolu yankg nak omong di dalap'm kitab bala nabi ndak tajadi ka ikau: ⁴¹ 'Liatlah, hai bala pangelek! takojut wat'n binasalah, karena Aku malakukan pakareja di zaman ikau, habuah pakareja yankg ndak akat'n ikau pacayak, bahkan mok haurang pai njelasnya ka ikau." ⁴² Hamantara Paulus lawan Barnabas kaluar, urankg-urankg mohon agar hidak nyarita tentankg firman yat'n pada ari sabat haudah yat'n. ⁴³ Saudah batomu di rumah hambayankg yat'n salesai, banyak urankg Yahudi lawat'n bala yankg nganut agama lainkg yankg gola'k ka Tuhat'n njurut Paulus wat'n Barnabas, yankg ngomong ka hidak wat'n ndorokg hidak untok maloko'k di dalap'm anugrah Allah. ⁴⁴ Pada ari sabat haudah yat'n,amper hamua urankg di kota bakumpol untok ninga firman Tuhat'n. ⁴⁵ Tapi,katika urankg-urankg Yahudi mintai karamaian yat'n, hidak di ponoh iri ati lalu mulai medo opai yankg nak omong Paulus hambel dak manghujatnya. ⁴⁶ Lalu, Paulus wat'n Barnabas njawabnya lawat'n barani harota ngomong, "Hal tok pentinkg bahwa Firman Allah saharusnya dinyata'ek ka kitak lobeh dolok. Karena kitak nulaknya wat'n manganggap diri'k ta'k ndak pantas mompo'k idup yankg kekal, liatlah, kamek baraleh ka bangsa-bangsa lainkg. ⁴⁷ Sebab, mintoklah Tuhat'n mborek parintah ka kamek: 'Aku dah njadi kitak terankg untok bangsa-bangsa lainkg supaya kitak dapat mbawa'k kahalamat hampai ka ujonkg bumi." ⁴⁸ Katika urankg-urankg ukat'n Yahudi yat'n ninga hal tok, hidak rindankg wat'n memuliakan Firman Tuhat'n. Lawat'n, habanyak yankg dah nak tontu'e untok idup kekal, manjadi pacaya'k. ⁴⁹ mangkak nya, Firman Tuhat'n manyebar ka haluroh wilayah yat'n. ⁵⁰ Tapi, urankg-urankg Yahudi ngasut batinak-batinak saleh yankg taharomat lawat'n urankg-urankg pentinkg di kota, lalu nimbol penganyaya tahadap Paulus wat'n Barnabas, harota nguser dak duak kaluar niti daerah pabatas hidak. ⁵¹ Namun, hambel ngibar dobu niti kaki hidak tahadap urankg-urankg Yahudi di hinun, Paulus wat'n Barnabas pogi ka Ikonium. ⁵² Lalu, bala murid nak ponoh lawat'n rasa andal nakharota lawat'n Roh Kudus.