¹ Ampat ka Paulus, hambo ALLAH ba RASUL KRISTUS YESUS, nang di gutus supayo iman urokng-urokng nang ALLAH milih ba pamikirot manganaai kabanarot nang mimpin supayo labih banar ² supayo ne'ido namu arapan manganai idup abadi, nang di nyanjiot sanape pamulo zaman ampat ka ALLAH nang an'o suoh pangalok. ³ Pado waktu'e, Io udoh muktiot kato-kato'E ngalalui barito nang udoh di micayoot ka'aku sabayo ba parintoh ALLAH, Juru Salamat diri. ⁴ Ka Titus, anak nang sah ka doop iman diri samua'e. Pamare damai sejahtera ampat ka ALLAH, BAPO ba YESUS KRISTUS, Juru salamat diri. Tugas-Tugas Titus ma'o Miliho Panatua ka Kreta ⁵ Kareno alasan anyian'lah aku ningo'ot kau ka Kreta , supayo kau biso nyalasayot ame'o nang masih palaru diatur lantas ngangkat panatuo-panatuo ka satiap koto, sarupo nang aku masanan ka kau. ⁶ Io seharuse urokng nang an'o caco, aki'e ko'oo bini'e kahe seko, nang anak-anak'e picayo , kareno an'o ditanasi idup nang an'o bamoral ato mambelot. ⁷ Karamo, urokng nang di jadiot panatua jemaat saharuse urokng nang an'o caco nang dinugasot ALLAH , an'o sombong,an'o ancang bero, buke panyocok,an'o suko bakalahi, ba an'o sarakoh ka'doop ba'gago ka'untungan. ⁸ Sabalike, suko mare tampat, suko ka ame'o sajo nang gagas, bijaksano, an'o medo-medo'ot, gagas sipate, biso guasai diri'e. ⁹ Io mampaut ka kato-kato nang biso di'picayo, sasuai ba nang udoh di'gajarot, nyabapot io biso mare pituoh nang gagas sasuai bapangajarot nang baik lantas nagur ne'ido nang suko mantoh. ¹⁰ Karamo, ado manyak urokng nang mambelot, suko bakato alok, ngaloki ne'ido nang asale urokng-urokng Yahudi nang baturih. ¹¹ Sawajare moot ne'ido ditutup kareno nyusohot saluruh kaluarga'e sabab ngajarot nang seharuse an'o pantas ne'ido ajarot, nang justru gatangan pakaro nang nyupati. ¹² Seko ka antaro ne'ido, nang nabi'e sandiri, bakato, "Dasar urokng-urokng Kreta pangalok, sarupo binatang buas nang jahat, ba tukang pamakot nang malas." ¹³ Kisoh anyian banar. Kareno angko'o, tagurlah ne'ido karas-karas supayo ne'ido samuh ka doop iman. ¹⁴ Usoh dangarot carito-carito urokng Yahudi ba parintoh urokng-urokng nang an'o narimo kabanarot. ¹⁵ Bagi nang barasih, samua'e ang'koo barasih. Lantas bagi ne'ido nang caco ba an'o picayo, an'o seko'o pun nang barasih ba gagas pamikirane atao ati nurani samua'e ne'ido an'o banar. ¹⁶ Ne'ido ngako kanal ka ALLAH, tapi ngalalui kalakuan-kalakuan'e ne'ido an'o gaku'i ALLAH. Ne'ido ang'koo maruti, an'o patuh, ba an'o biso ngalakuot ame'o nang gagas.