¹ Ampagie, Yesus ampus ba kaliling ka koto-koto ba kampokng-kampokng sa' nyiarotn ba nyatootn Injil Karajaan Allah. Kaduo balas rasul ado barage Io, ² jakoo ugo sangape urokng ambini nang dah di nyamuhotn Yesus dari sagalo roh-roh jahat ba macam panyakit. Di antaro ne'ido' adolah Maria, nang di nyabut Magdalena, nang di mebasotn Yesus dari tujuh roh jahat. ³ Ado ugo Yohana bini Khuza bandaharo Herodes Suzana, masih manyak ambini-ambini laine nang make ka kayootn ne'ido' sorokng sa' nyokong Io. PARUMPAAN TANTANG PANABUR BANIH ⁴ Waktu urokng rami ba kumpul lalu urokng-urokng ampat kamae-mae koto atokng ka Yesus, Io ba kato ka ne'ido' make sabuoh parumpamaan: ⁵ "Seko' urokng patani ampus ngamur banih, Waktu io ngamur , ado sabagiotn nang janto' ka sisi marago lalu di ninyak-ninyak, di makatni' burukng-burukng ka udara. ⁶ Sabagiotn agi' janto' ka atas tampat ba batu, lalu waktu banih koo mulai' idup, banih koo jadi karikng karamo ino' ado ai'. ⁷ Sabagiotn laine janto ka tangoh-tangoh jarami' baduri lalu idup ba io jadie rumput baduri koo nyakak. ⁸ Siso' banih laine janto' ka tanoh nang subur lalu idup batumuh biso mare asil saratus kai lipat manyake." Ngakootn parumpamaan koo Yesus ba kato, "Io nang batarenyek sa' nangar,aruslah nangarotn baik-baik!" ⁹ Ako' koo, murid-murid Yesus batanyo' ka Io tantang rati parumoamaan koo. ¹⁰ Io bakato, "Ka kau dibataki' rasio Karajaan Allah, tapi ka urokng lain dibataki' doopm parumpamaan supayo, 'Sakaipun mandang ne'ido' ino' nanang, lalu sakaipun nangar ne'ido' ino' ngarati." Yesaya 6:9 PANJALASOTN YESUS TANTANG PARUMPAMAAN BANIH ¹¹ Nyianlah rati parumpamaan koo: "Banih koo ratie firman Allah. ¹² Banih nang janto' ka sisi marago koo ratie ne'ido' nang nangar firman Allah. Ako' koo, lalu atoknglah setan ngicokng firman koo ampat ka ati ne'ido' supayo ne'ido' ame picayo' ba ame disalamatotn. ¹³ Banih nang janto' ka atas tanoh ba batu ratie urokng-urokng nang nangar firman Allah lalu io narimo' ba sanang ati, tapi ino' ba akar. Ne'ido' kahe picayo' sabantar, tapi waktu ka susohotn atokng, ne'ido' kontan babalik agi' dari Allah. ¹⁴ Banih nang janto' ka antaro rumput baduri ratie urokbg-urokng nang nangarotn firman Allah, tapi samantaro ne'ido' batumuh, ne'ido' dinyakak ba raso gai'-gai', kakayootn,ba kasanangan idupe lalu ne'ido' ino' ngaselotn buoh nang masak. ¹⁵ Sadangkan banih nang janto' ka tanoh nang subur koo ratie urokng-urokng nang nangarotn firman Allah lalu dinohatni kadoopm ati nang jujur ba nang baik, lalu ba buoh doopm karajinan." PAGARIOTN CAHAYO NGU ¹⁶ Ini' ado seko'pun nang ako' nutukng tensan, ako' koo nutupi' io ba gantang ato muangan io ka baboh tampat tidur. Sabalike, io pasti muangan tensan koo ka atas poho supayo urokng nang taamo' kadoopm rumoh biso nanang cahayoe. ¹⁷ Sabab, ino' ado hal nang tasambunyi' nang ino' katauan, lalu ino' ado rahasia nang ino' biso dibungkar lalu ditabanan ka tarokng. ¹⁸ Karamo koo, paratiotnlah jamae kau nangar karamo sape nang ado pasti dibare' labih manyak agi'. Tapi' sape nang ino' ado, ampat ka io pasti di icokng, mungkin dameo nang io kiro nu'e." KALUARGA YESUS NANG SABANARE ¹⁹ Lalu, inu' ba kamaru'-kamaru' Yesus atokng namui' Io, tapi ne'ido ino' biso nyamaki' Io karamo karumunan urokng. ²⁰ Jadi, di mataki'lah Io, "Inu' ba kamaru-kamaru' -Ngu ado badiri ka uaa,ne'ido' mao batamuo ba Kau." ²¹ Tapi, Yesus nyahuti ne'ido' , "Inu ba kamaru'-kamaru'-Ku ne'ido' nang nangarotn firman Allah lalu ngarajaan Io." YESUS MARANTIOTN NYARU RIBUT ²² Ado pado waktu koo, Yesus naik ka doopm parahu barage murid-murid-E lalu Io bakato ka ne' ido', " Je' diri' nyubarang ka sisi lain dano nyian." Lalu, barangkat ka subarang. ²³ Tapi, waktu ne'ido' balayar Yesus tatidur. Lalu, atoknglah nyaru ribut ka dano koo lalu parahu ne'ido' taamo' ai' lalu ne'ido' ado doopm bahayo. ²⁴ Ako' koo, para murid atokng ka Yesus lalu ngunaki' Io sambil ba kato, "Guru! Guru! diri' pasti binaso!" Lalu, Yesuspun umpat lalu ngarahakngi' nyaru ribut ba galombang nang bagolong-golong koo. Nyaru ribut koopun baranti lalh dano koo jadi diam. ²⁵ Lalu, Io bakato ka ne'ido', "Kamae ge' iman ngu?" Ne'ido' jadi kagai'otn ba heran sambil bakato ka nang laine, "Sape ge' urokng nyian? Io malah marentoh ka angin ba ai', lalh ne'ido' nuruti' Io." SEKO' UROKNG GERASA DIMEBASOTN AMPAT KA ROH JAHAT ²⁶ Lalu sampelah Yesus ba murid-murid-E ka wilayah urokng Gerasa, di sabarang Galilea. ²⁷ Pado waktu koo Yesus turutn ka darat, io batamu ba seko' angaki' ampat ka koto koo nang dingarasuki' roh jahat. Urokng koo dah lamo ino' make pakean lalu ino' diopm ka rumoh, malainkan ka kuburan. ²⁸ Waktu urokng koo nanang Yesus, iopun takampak lalu basujud ka adapatn-E. Ba suaro nang nyarekng io bakato, "Dameo ge' urusane antaro Kau ba aku, he Yesus, Anak Allah nang mahatingi, Aku minto' ka Kau, ame sikso aku!". ²⁹ Hal koo tajadi karamo Yesus marentohotn roh jahat koo kauar ampat ka urokng koo. Setan koo dah pancohkai narikatni' urokng koo makae io dingarante, dimorgol, lalu diurokng nyago, tapi io biso mutusotn rantee lalu setan koo nabanan ka tampat nang sunyi'. ³⁰ Ako' koo , Yesus batanyo' ka urokng koo, "Sape damangu?" urokng koo nyahut, "Legion" karamo ado manyak setan nang ngarasuki' io. ³¹ Setan-setan koo minto' ka Io supayo Io ame marentohotn ne'ido' ampus ka jurang maut. ³² Di tampat koo, ado saparinu'otn enyekng nang gi' ngago' makotn ka bukit. Setan-setan koo minto' ka Yesus supayo miarotn ne'ido' taamo' ka doopm parinu'otn enyekng koo, lalu Yesus muihotn ne'ido'. ³³ Lalu, setan-setan koopun kauar ampat ka urokng koo lalh taamo' ka doopm enyekbg-enyekng, lalu saparinu'otn enyekng koopun badariotn nurutni arokng bukit nang doopm notok ka dano lalh tinggalam. ³⁴ Waktu para pangambalo enyekng nanang io, ne'ido' badariotn lalu bacurito kajadian koo ka koto lalu ka sakulilingan kampokng. ³⁵ Jadi, urokng rami atokng nanango' dameo nang tajadi. Ne'ido' atokng ka Yesus lalu napati urokng nang dah di mebasotn ampat ka setan-setan koo gi' duduk ka seket poho Yesus, dah ba pakean, ugi' dah caradik pikirane. Hal nyian nang ngamuat ne'ido' ka gai'anan. ³⁶ Ne'ido' nang nanang kajadian nyian bacurito ka urokng lain jamae urokng nang karasukotn setan koo di nyamuhotn. ³⁷ Lalu, samuo urokng nang diopm ka daeroh sakitar Gerasa minto' ka Yesus supayo ningootn ne'ido' sabab ne'ido' maraso kagaianan (gagiotn) sidi. Karamo koo, Yesus naik ka parahu lalu puokng ka Galilea. ³⁸ Tapi, urokng nang dah di mebasotn ampat ka setan-setan koo minto' ka Yesus supayo io muih barage Yesus. Tapi, Yesus nyuruh io ampus, ja kata-E, ³⁹ "Puoknhlah ka rumahngu lalu caritootnlah hal-hal nang kayo' nang dah Allah ngamuat ka kau," Urokng koopun ampus ka saluruk koto lalu bacurito dameo nang dah Yesus ngamuat ka io. ANAK YAIRUS DI MANGKITOTN LALU SEKO' AMBINI DI NYAMUHOTN ⁴⁰ Waktu Yesus puok ka Galilea, urokng ramj nyambut Io karamo ne'ido' samuo dah nunggu Io. ⁴¹ Di koo ado seko' urokng ba damo Yairus nang atokng ka Io, io koo kapalo sinagoge. sambil ngogo' nyamboh ka poho Yesus, Yairus minto' supayo Io atokng ka rumahe ⁴² karamo io ado seko' anak ambini tunggal nang kiro-kiro baumur dua tahutn, lalh kamudi' koo ampir mati. Lalu, waktu Yesus notok ka naun, urokng rami bapeket-peket ngulilingi' Io. ⁴³ Dikoo ado seko' ambini nan dah rongko' pandarahan barat salamo 12 tahutn, lalu ino' seko' urokng pun nang biso nyamuhotn io. ⁴⁴ Ambini koo nyamaki Yesus ampat ka balakang lalu nyameh jubah -E, jako ugo' pandarahane langsung baranti. ⁴⁵ Lalu, Yesus bakato," Sape nang ngenes -Aku?" Karamo samue'e urokng inok ngakoi, Petrus Bakato, "Guru, urokng manyak bakomo,ka sakaliling-Ngu ba peket-peket ba Kau!". ⁴⁶ Tapi bo, Yesus bakato, "Seko urokng ngenes Aku karamo Aku maraso ado kuaso nang kauar ampat-ka Aku." ⁴⁹ Pas Yesus bakato, seko urokng' ampat ka rumoh sinagoge koo' atok ba kato ka Yairus, "Anak ambini mu dah mati. Ame agik ngaluti Guru." ⁵⁰ Tapi bo, nangar jukut ko' Yesus bakato ka Yairus, "Ame gaik'. picayo ajo anak mu pasti salamat."