¹ Tapi ang'koo, Yesus ampus ka Bukit Zaitun. ² O'op-o'op sidi, Io atok agi ka Bait Allah lantas samuo urok'ng atok ka'Io. Io duduk ba gajari ne'ido. ³ Lantas, ahli-ahli taurat ba urok'ng-urok'ng Farisi nabanan seko urok'ng ambini nang katauanan ba'bayo, lantas dah'udoh nampatot nang'bini ang'koo badiri ka tangoh-tangoh, ⁴ Ne'ido bakato ka Yesus, "Guru, nang'bini anyian cakahan babayo. ⁵ Ukum Taurat Musa marintohot kami untu nabaki nang'bini sarupo anyian pake batu(saloh sege ukuman mati ja ukum Taurat). Ameo pandapat Kito manganaai jukut anyian?" ⁶ Ne'ido gato'ot ja'koo untu yobaio Yesus supayo ne'ido ado ba'dasar untu yalohoto Io. Tapi ang'koo, Yesus mambongkok lalu pake jari'E, Io nulis ka tanoh. ⁷ Karano ne'ido sega nanyai Io, Yesus badiri lantas bakato ka ne'ido, "Urok nang ano badoso ka antaro kito saharuse io jadi nang partamo nabaki ambini anyian pake batu." ⁸ Lantas, Yesus mambongkok agi ba nulis ka tanoh. ⁹ Takallo ne'ido nangar jukut ang'koo, ne'ido mulai badariot seko demi seko, mulai ampat ka nang labih tuho, lantas Yesus diningo'ot Io sorok, ba nang'bini tai nang masih badiri ka tangoh-tangoh. ¹⁰ Lantas, Yesus badiri lalu bakato ka nang'bini ang'koo, "He nang'bini, ka mae'ke ne'ido? ano ado'ke urok'ng nang gukumo kau?" ¹¹ Yahut ambini ang'koo, "ano ado, Tuhan." Yesus bakato, "Aku pun ano biso gukumo kau. Darilah, ba mula'i kanio, usoh galakuot doso agi." Yesus Tarok Dunio ¹² Salanjute, Yesus bakato ka urok'ng rami ang'koo, kata'E, "Akulah tarok dunio. Satiap urok'ng nang nunaan Aku ano biso bajo'ot ka'doop kagalapot, tapi ma'o ado'o idup tarok." ¹³ Salanjute, urok'ng-urok'ng Farisi bakatobka Yesus, "Kau basaksi manganai diri'Nyu sandiri, yabapot kasaksiot'Nyu ano banar." ¹⁴ Yesus yahuti ne'ido, kata'E, "Sakaipun Aku basaksi manganai diri'Ku sandiri, kasaksiot'Ku iolah banar karano Aku nahu'i ampat ka'mae Aku atok ba ka'mae Aku ampus, tapi kau ano nahu'i ampat ka'mae Aku atok ba ka'mae Aku ampus. ¹⁵ Kau gakimi manurut caro kaisi'ot(Duniawi'ot), sadangkan sape pun ano Aku akimi. ¹⁶ Tapi, sa'ande pun Aku gakimi, pangakiman'Ku ang'koo banar karano Aku gakimi ano ba'sorok, malainkan basabayo-bayo Bapo nang yuruh Aku. ¹⁷ Bahkan, kadoop Kitab Taurat'nyu tatulis manganai kasaksiot duo urok'ng sidi ada'e. ¹⁸ Aku basaksi manganai diri'Ku sandiri lantas manganai diri'Ku Bapolah nang yuruh Aku basaksi." ¹⁹ Tarus, ne'ido batanyo ka'Io, "Ka mae'ke Bapo'Nyu?" Yesus yahut, "Kau ano nahu'i ka'Aku. ato ugo Bapo'Ku, kade kau nahu'i Aku, kau ma'o ugo nahu'i ka Bapo'Ku." ²⁰ Pakatoot amyian Yesus yanpeot ka samak pabendaharo'ot(tampat nang di galangkapi tiga balas kotak amal) waktu Io gajar ka Bait Allah, tapi ano ado seko urok'ng pun nang nangkap Io karano waktu'E nape sampe. Yesus Bakato Manganai Bapo ²¹ Lantas, Yesus bakato agi ka ne'ido, "Aku ma'o ningooto kau tarus kau ma'o gagui'o Aku, tapi kau pasti mati ka'doop doso'nyu. Ka mae Aku ma'o ampus, kau ano biso atok." ²² Salanjute, urok'ng-urok'ng Yahudi ang'koo bakato, "Io ma'o munuho diriE'ke Karano Io bakato, 'Ka mae Aku ma'o ampus, kau ano biso atok'?" ²³ Tapi ang'koo, Yesus bakato ka ne'ido, "Asal'nyu ampat ka baboh, tapi Aku barasal ampat ka atas. Kau barasal ampat ka dunio anyian, tapi Aku buke ampat ka dunio anyian. ²⁴ Oleh karano ang'koo, Aku gato'ot ka kau sasungguhe kau pasti mati ka'doop doso'nyu karano kade kau ano picayo ka'Aku, kau pasti mati ka'doop doso-doso'nyu." ²⁵ Lantas, ne'ido batanyo ka'Io, "Sape'ke Kito?" Yesus yahuti ne'ido, "Aku udoh gatoot'io ka'kau mulai samulo. ²⁶ Ado manyak jukut manganai kau nang harus Aku kato'ot ba akimi, tapi Io nang yuruh Aku iolah banar lalu ameo nang Aku nangar ampat ka Io, angkolah nang Kusampeoto ka dunio." ²⁷ Ne'ido ano garati sasungguhe Yesus cakahan bakato ka ne'odo manganai Bapo. ²⁸ Oleh sabab ang'koo, Yesus bakato, "Takallo kau udoh ningiot(maksut'e maku Yesus ka kayu salib ba naikot Io tarus Io mati) Anak Manusio, waktu ang'koolah kau ma'o nahu'i Aku iolah Io, lantas ano ado sege pun nang Aku galakuot ampat ka diri'Ku sandiri, malainkan Aku ngato'ot ameo nang di gajarot Bapo ka'Aku. ²⁹ Lantas, Io nang yuruh Aku ado ba'sabayo-bayo ba Aku, Io ano ningo'ot Aku basorok kareno Aku sega galakuot jukut-jukut nang bapaedoh ka'Io." ³⁰ Samintaro Yesus gato'ot samuo ang'koo, manyak urok'ng picayo ka'Io. Anak-Anak Abraham ba Anak-Anak Iblis ³¹ Salanjute, Yesus bakato ka urok'ng-urok'ng Yahudi nang picayo ka'Io, "Kade kau tatap ka'doop firman'Ku, kau batol-batol murit'Ku. ³² Lalu kau pasti nahu'i kabanarot, lantas kabanarot ang'koo ma'o mebasoto kau." ³³ Ne'ido yahut, "Kami iolah katurunan Abraham ba ano suoh jadi hambo sape pun. Jadi, gameo Kito bakato, 'Kau pasti bebas?"' ³⁴ Yesus yahuti ne'ido, "Sasungguhe, Aku bakato ka'kau,satiap urok'ng nang galakuot doso iolah hambo doso. ³⁵ Seko urok'ng hambo ano diop sege kaluarga untu salama'e, tapi seko urok'ng anak diop untu salama'e. ³⁶ Jadi, kade Anak mebas'soto kau, kau banar-banar bebas. ³⁷ Aku nahu'i sasungguhe kau iolah katurunan Abraham, tapi kau ma'o munuho'Aku karano ajarot'Ku ano namu tampat ka doop diri'nyu. ³⁸ Aku gato'ot manganai jukut-jukut nang udoh Aku nanang barage Bapo'Ku, ja'koo ugo kau galakuot jukut-jukut nang kau nangar ampat ka bapo'nyu."(kato ato kalakuan Tuhan Yesus nang Io namu ampat ka Allah Bapo) ³⁹ Ne'ido yahut lantas bakato ka'Io, "Abraham iolah bapo kami." Yesus yahut, "Kade kau katurunan Abraham, kau saharuse galakuot ameo nang Abraham galakuot. ⁴⁰ Tapi ang'koo, kau barusoho munuho Aku, urok'ng nang mare kau nahu'i kabanarot, nang Aku nangar ampat ka Allah. Abraham ano galakuot jukut ang'koo. ⁴¹ Jadi, kau kahe galakuot ameo nang digalakuot bapo'nyu sorok." Ne'ido bakato ka'Io,"Kami ano dibaranakot ampat ka asil babayo (kato babayo kadoop PL saring diartiot ano nurut ka'Allah). Kami kahe ado seko Bapo, iolah Allah." ⁴² Yesus bakato ka ne'ido, "Kade Allah iolah Bapo'nyu, kau pasti kasih ka'Aku kareno Aku atok barasal ampat ka'Allah. Lantas, Aku atok buke atas kamaoan'Ku sandiri, malainkan Io nang yuruh Aku. ⁴³ Ameo sabab kau ano garati ameo nang Aku gato'ot? karano ang'koo kau ano biso nangarot firman'Ku. ⁴⁴ Kau barasal ampat ka bapo'nyu, iolah setan lantas kau ma'o galakuot kamaoan-kamaoan bapo'nyu. Io iolah pamunuh ampat ka'awal samulo ba ano mampaut'ti kabanarot karano ano ado kabanarot ka'doop diri'e. Kade io bakato pangalok, io bakato ampat ka sipat'e sandiri karano io iolah pangalok ba bapo pangalok. ⁴⁵ Tapi ko'oo, karano Aku gato'ot kabanarot ka'kau, kau ano picayo ka'Aku. ⁴⁶ Sape'ke ka antaro kito nang biso nyato'ot sasungguhe Aku badoso? Kade Aku gato'ot kabanarot, gameo kau ano picayo ka'Aku? ⁴⁷ Sape pun nang asale ampat ka Allah, io nangarot firman Allah; ang'koolah sabab'e kau ano nangarot'io karano kau buke barasal ampat ka'Allah." Yesus Bakato manganai Diri'E ba Abrahamt ⁴⁸ Urok'ng-urok'ng Yahudi yahuti Yesus lantas bakato ka'Io, "Sidi buke kade kami gato'ot sasungguhe Kito iolah urok'ng Samaria lantas Kito kamaso'kot roh jahat?" ⁴⁹ Yesus yahut, "Aku ano kamaso'kot roh jahat, tapi Aku gormati Bapo'Ku, tapi kau ano gormati Aku. ⁵⁰ Tapi ang'koo, Aku ano ngago kamuliot unto diri'Ku sandiri; ado seko nang ngago'Io ba nang gakimio. ⁵¹ Sasidie, Aku bakato ka'kau, satiap urok'ng nang nuruti firman'Ku, io ano paranoh suoh nanang'o kamatiot." ⁵² Urok'ng-urok'ng Yahudi ang'koo bakato ka Yesus, "Kanio kami nahu'i sasunguhe Kito memang kamaso'kot roh jahat! Sabab, Abraham ba samuo nabi pun udoh mati. Tapi ko'oo, Kito bakato, 'Satiap urok'ng nang nuruti firman'Ku, io ano paranoh suoh yacapi kamatiot.' ⁵³ Kito labih ayo'ke daripado Abraham bapo kami, nang udoh mati; ba'sapeke Kito yabayo'ot diri'Nyu?" ⁵⁴ Yesus yahut, "Kade Aku mulio'ot diri'Ku sandiri, kamulio'ot-Ku ano ado arti'e; Kaulah nang mulio'ot Aku, nang manganai'Io kau bakato, Io iolah Allah kami."' ⁵⁵ Namun, kau ano nahu'i Io, tapi Aku nahu'i Io; Kade Aku gato'ot sasungguhe Aku ano nahu'i Io, Aku ma'o jadi'o pangallok, sabayo macam kau, tapi Aku nahu'i Io ba Aku nuruti firman'E. ⁵⁶ Bapo'nyu, Abraham, karepo'ot karano io ma'o nanang'o ari'Ku (iolah ari Tuhan, nang gacu ka ari Kiamat). Io udoh nanang lalu karepo'ot." ⁵⁷ Lantas, urok'ng-urok'ng Yahudi ang'koo bakato ka'Io, "Umur'Nyu ajo nape ado 50 tahut, tapi kau udoh nanang Abraham?" ⁵⁸ Yesus bakato ka ne'ido, "Sasungguhe Aku gato'ot ka'kau, sanape Abraham ado, Aku udoh ado." ⁵⁹ Karano ang'koo, ne'ido gicok batu untu nabaki Io, tapi Yesus yosok'kot diri lantas ningoot Bait Allah.