¹ Kalakarot Yesus Ba Ambini Samaria Takallo Tuhan dah nahui kade urok'ng-urok'ng Farisi udoh nangar bahwo Io ngasilot ba maptis labih manyak murit dari pado Yohanes, ² (maskipun Yesus sandidi ano maptis, malainkan murit-murit'E), ³ Io ningoot Yude lantas puok agi ka Galilea. ⁴ Jadi, Io harus ngalewati wilayoh Samaria. ⁵ Nyampelah Yesus ka Samaria, ka sege koto nang banamo Sikhar, nang ado ka samak tanoh nang de'e di mareot Yakub ka anak'ke , Yusup. ⁶ Kolam Yakub ado ka naan. Salanjute, Yesus nang latih kareno bajoot, duduk ka sisi kolam ang'koo. Saat ang'koo, kiro-kiro jam ka'anam (12:00). ⁷ Atoklah seko urok'ng ambini Samaria untu nimbo'o ai. Yesus bakato ka -io," ⁸ (Sabab, murit-murit'E udoh ampus ka koto untu mali'o makanan.) ⁹ Ambini Samaria ang'koo bakato ka Yesus, "Jamae biso Kito, urok'ng Yahudi, minto'o ai nyocok ka aku nang asale ambini Samaria?(nang balatar balakang urok'ng Samaria ba urok'ng Israel ba musuh lantas Yesus ano muih make tampat nyocok ambini ang'koo) Sabab, urok'ng Yahudi ano bataguri ba urok'ng Samaria. ¹⁰ Yesus nyahut lantas bakato ka io, "Kade kau nahu'i manganaai pamare Allah ba nahui sape nang bakato ka kau,'Barelah Aku nyocok', kau pasti ma'o minto'o ka Io, lantas Io ma'o mareo kau ai idup." ¹¹ Ambini ang'koo bakato ka'Io, 'Tuan, Kito ano ba panyenok di' tamboh kolam ang'koo dooplah sidi, dari mae Kito namu'o ai idup ang'koo? ¹² Atoke Kito labih ayo dari pado nenek moyang kami, Yakub, nang mareoot kolam anyian ka kami ba nang udoh nyocok sandiri ampat ka kolam anyian basarato samuo anak ba ayamane?" ¹³ Yesus nyahut lantas bakato ka io, "Satiap urok'ng nang nyocok ampat ka ai anyian tatap k'ausot agi, ¹⁴ tapi urok'ng nang nyocok ai nang Ku mareot ka io ano biso k'ausot agi; malainkan ai nang Ku mareot ka io ang'koo ma'o jadi'o mato ai ka doop diri'e nang ma'o mancaro sampe ka idup nang kakal." ¹⁵ Nang bini ang'koo bakato ka Yesus, 'Tuan, barelah aku ai ang'koo supayo aku ano k'ausot agi ba aku ano palaru atok agi kasio untu nimbo'o ai." ¹⁶ Yesus bakato ka io, "Ampuslah, saru akinyu ba muoklah ka sio." ¹⁷ Ambini ang'koo nyahut, "aku ano ado baaki." Kato Yesus ka io, "Kau banar saat bakato, 'Aku ano ado baaki'. ¹⁸ Kareno limo angaki dah suoh kau gampu, ba angaki-angaki nang diop bakau kani'o bukelah akinyu. Ka doop jukut anyian, kau bakato banar." ¹⁹ Kato ambini ang'koo ka Io, "Tuan, kanio aku nahui sasunguhe Kito adolah salah seko urok'ng Nabi(Urok nang nahui manganai jukut-jukut nang tasosok bagi urok'ng lain). ²⁰ Nenek moyang kami nyamboh ka bukit anyian, tapi bangso'Nyu ngatoot bahwo Yerusalemlah tampat urok'ng harus nyamboh." ²¹ Yesus bakato ka io, "Picayolah ka Aku, he ambini! Pasti tibo saat'e katika buke ka bukit anyian ato ugo ka Yerusalem urok'ng nyamboh Bapo. ²² Kau nyamboh nang ano kau kanal, tapi nang kami nyamboh nang kami kanal kareno kasalamatot atok ampat ka bangso Yahudi. ²³ Jadi, ma'o tibo saat'e, panyamboh-panyamboh banar ang'koo kanio ma'o nyamboho Bapo ka doop Roh ba kabanaroot; sabab Bapo nuntut nang saparati ang'koo untu nyamboho Io. ²⁴ Allah adolah Roh ba ne'ido nang nyamboh Io harus nyamboh Io kadoop Roh ba kabanaroot." ²⁵ Ambini ang'koo bakato ka Io, "Aku nahui sasunguhe Mesias ma'o atok (Io nang di nyabut Kristus). Katiko Io atok, Io ma'o mareo nahui sagalo sasuatu ka kami." ²⁶ Nyahut Yesus ka io, "Aku, nang cakahan bakato ka kau adolah Io." ²⁷ Saat ang'koo, atoklah murit-murit'E lantas ne'ido heran nanang Yesus cakahan galakar ba seko urok'ng ambini. Karamo, ano seko urok'ng pun nang batanyo ka Io, "Ameo nang Kito ngagui?" Ato gameo Kito galakar ba io?" ²⁸ Salanjute, nangbini ang'koo ningoot tampat ai'e lantas ampus ka koto sarato bakato ka urok'ng-urok'ng ka naan, ²⁹ "Je, tananglah ado seko urok'ng nang ngatoot ka aku sagalo sasuatu nang udoh ku ngalakuoot. Mungkinke Io Mesias ang'koo?" ³⁰ Ne'ido pun ampus ka uas koto lantas namui Yesus. ³¹ Samintaro ang'koo, murit-murit'E nasak Yesus sambil bakato, "Rabi(Guru), makotlah." ³² Tapi, Yesus bakato ka ne'ido, "Aku ado makanan nang ano kau kanal." Lantas, murit-murit batanyo seko ka nang lain," ³³ Ano adoke urok'ng nang nabanan sasuatu ka Io untu di makot?" ³⁴ Yesus bakato, "Makanan- Ku adolah ngalakuoot kamaoan Io nang nyuruh Aku ba nyalasaeot pakarajaa'Ne. ³⁵ Buke'ke kau bakato, 'Ampat buot agi musim bahanyi tibo'? Tananglah, Aku bakato ka kau, bukolah matanyu lantas tananglah umo-umo udoh manguning untu di anyi. ³⁶ Kani'o ugo, io nang bahanyi udoh narimo upahe ba ngomoan buoh untu idup kakal sahinggo panganyi ba panabur biso ba repo-repo sabayo-bayo. ³⁷ Kadoop jukut anyian pakatoot ang'koo banar, 'nang seko urok'ng menabur ba nang laine bahanyi. ³⁸ 'Aku nyuruh kau untu nganyi sasuatu nang ano kau karajo'ot; urok'ng lain udoh garajo'ot io lantas kau udoh ta'amo ka doop pakarajoot ne'ido." ³⁹ Manyak urok'ng Samaria ampat ka koto ang'koo jadi picayo ka Yesus kareno pakatoot ambini ang'koo, nang mareoot kasaksioot, "Io mare nahui ka aku samuo jukut nang udoh kungalakuoot." ⁴⁰ Jadi, takallo urok'ng-urok'ng Samaria ang'koo sampe ka Yesus, ne'ido minto'Io untu dioop ba ne'ido lantas Yesus dioop ka'koo salamo duo ari. ⁴¹ Lantas, ado labih manyak agi urok'ng nang picayo karano pakatoot Yesus sandiri. ⁴² Ne'ido bakato ka nangbini ang'koo, "Buke agi karano pakatoot Kito kami jadi picayo, malainkan karano kami sandiri udoh nangar, lantas kami nahu'i Io anyian banar-banar Juru Salamat sunio." Anak Pagawe Istana Dinyamuhoot ⁴³ Dah udoh 2 ari, Yesus ningoot tampat ang'koo lantas nuju'o Galilea. ⁴⁴ (Sanape, Yesus sandiri ako mare kasaksio'ot manganaai seko urok'ng nabi ano dihormati kanagarie sandiri.) ⁴⁵ Takallo Yesus tibo ka Galilea, urok'ng-urok'ng Galilea nyambut Io karano ne'ido nanang sagalo sasuatu nang Yesus galakuoot kadoop prayaan Paskah ka Yerusalem karano ne'ido ampus ugo ka prayaan ang'koo. ⁴⁶ Karano ang'koo, Yesus atok agi ka Kana, Galilea, tampat Io suoh majawat ai jadi ai anggur. Ka Kapernaum ado seko urok'ng pagawe istana nang anak angaki'e cakahan rongko. ⁴⁷ Takallo pagawe istana ang'koo nangar bahwo Yesus udoh atok ampat ka-Yudea ka Galilea, io ampus namui ba minto ka Yesus supayo atok ba nyamuoot anak'e karano anak'e udoh ampir mati. ⁴⁸ Lantas, Yesus bakato ka io, "Kade kau ano nanang tando-tando ba jukut-jukut ajaib, kau bai picayo'o." ⁴⁹ Pagawe istana ang'koo bakato, "Tuan, atoklah sanape anak'ku mati." ⁵⁰ Yesus bakato ka io, "Puoklah, anaknyu idup!" Urok'ng ang'koo picayo ka pakatoot nang Yesus ngatoot ka io lantas darilah urok'ng ang'koo. ⁵¹ Saat pagawe istana ang'koo masih ka doop paja'anan, kuli-kuli'e batamu ba io lantas mare nahui manganaai anak angakie idup. ⁵² Pagawe istana ang'koo batanyo ka ne'ido mulaai jam sangape keadaan anak'e baangsur tomo. Lantas, ne'ido nyahut, "Tumare kiro-kiro jam katujuh (13.00) damam'e ilang." ⁵³ Bapo anak ang'koo nahui, pado waktu ang'koolah Yesus bakato ka io, "Anaknyu idup." Jadi pagawe istana ang'koo ba saluruh kaluargae jadi picayo ka Yesus. ⁵⁴ Ang'koolah tando ajaib kaduo nang Yesus ngalakuoot saudoh puok ampat ka Yudea ka Galilea.