¹ Ba aku, kamaru-kamaru, ino biso bakato ba kau ngayo manusio rohani, malahan sabalik'ke macam manusio daging, ngayo bayi-bayi doop Kristus. ² Aku nyuapi kau susu buke, jukut kau nape siap makot daging. kanio pun kau nape siap makot daging. ³ jukut kau masih daging. barang ka antaro kau masih ado iri hati ba sau basalisih'ngu, buke'nyo kau idup ngayo daging, ba buke'nyo kau bajoot ngayo ukuran-ukuran manusio? ⁴ jukut kade sa'urokng bakato,"Aku ikut Paulus,"ba nang lain bakato,"Aku ikut Apolos,"buke'nyo kau idup ngayo manusio? ⁵ trus siape'lah Apolos? ba siape'lah Paulus? palayan- palayan nang udah ngalalui'nyo kau udah picayo,ba nang masing- masing Tuhan udah mare'ot tugas-tugas. ⁶ Aku udah nanam, Apolos udah nyiram, tatapi Allah nang udah numbuhot. ⁷ jadi, kaduo'e ino ado arti baik nang nanam maopun nang nyiram. Tatapi Allah koo'lah nang tarus numbuhot. ⁸ Kanio barang siape nang nanam ba barang siape nang nyiram nang koo'lah sege, ba masing-masing mao narimo upah'e sorok sasuai ngoan karajaan'ne sorok. ⁹ Kareno kami nyianlah rekan-rekan sakarajo Allah. Kau lah ladang Allah, bangunan Allah. ¹⁰ Badasarot anugrah Allah nang udah dimare'ot ka aku ngayo sa'urokng ahli bangunan, aku udah ngaletakot dasar ba nang lain mambangun ka atas'e. tatapi biarot satiap urokng ba'ati-ati macam mae io mambangun ka atas'e. ¹¹ Barang ino sa'urokng pun nang biso ngaletakot dasar nang lain salain sete nang udah ngaletakot, io koo, Yesus Kristus. ¹² Kanio kade' satiap urokng nang mambangun dasar make amas, Perak, permata, kayu, rumput karikng, atau jerami, ¹³ pakarajaan ne mao dinyatoot, sabab ari siok mao nyatoot'nyo. Jukut pakarajaan nyian mao di nyatoot doop api. Api nguji kualitas damio nang udah di ngarajaan tiap manusio. ¹⁴ Kade pakarajaan satiap urokng batahan, maka io namu upoh; ¹⁵ tatapi kade pakarajaan satiap urokng tatunu, io akan mandarito karugian, tatapi io sorok mao di salamatot, saolah-olah terluput ngalalui api. ¹⁶ Ino nahui ge'kau kade kau koo Bait Allah ba kade Roh Allah idup doop kau? ¹⁷ kade satiap manusio ngancurot Bait Allah, Allah pasti ngancurot urokng koo. Jukut Bait Allah koo Kudus, jai'yot ugo kau. ¹⁸ Ame seko'urokng pun nipu diri'e sorok. kade satiap urokng ka antaro kau bapikir kede io bijaksana ka zaman kanio, biarot io jadi urokng nang "bodo" supaye io jadi biso bijaksana. ¹⁹ Kareno hikmat dunio nyian lah kabodo'ot kahadapot Allah. Sabab udah ditulis, " Io nangkap nang bijaksana doop kelicikan ne'ido." ²⁰ Salanjut'te, " Tuhan nahui pikiran urokng nang bijaksana koo sia-sia." ²¹ Jadi baranti mambangga'ot manusio! kareno sagala sasuato koo milik ngu, ²² baik Paulus, atau Apolos, atau Kefas, atau dunio, atau ka'idupot, atau kamatiot atau hal-hal nang mao atokng. Samue'e koo milik ngu, ²³ ba kau koo milik Kristus, ba Kristus koo milik Allah.