¹ Nsa yil-long gǝbǝtǝng a kabi wumar wu pǝt gǝɓit mok-mok mǝn kok mǝ ɓǝlang. ² Mǝ laa lat nkwǝt shagal kwat gǝmuop dǝr ɓit gǝme a dinari gǝme mǝn lep muop mwaan nmar gǝfe. ³ Fuus arkaa mǝn chin pǝt mǝn kat nde mǝ ɓǝlang ɗyamɗok dat baan gǝ lǝtuk. ⁴ Mǝn laa gǝmuop yen 'Gun zak gu mwaan mar nanyi gǝ a shen bii wujet gǝ mǝ kwat hǝ ngun.' Lat mǝn mǝ mwaan ɓǝlǝng. ⁵ Pǝt shizak nfuus gǝnaar gǝ fuus neep mǝn bǝn chin a kam. ⁶ Nfuus kansǝgǝn bǝn pǝt mǝn kat nde mǝ ɓǝlang shizak mǝ ɗyamɗok chak. Mǝn laa gǝmuop yen, 'Gu ɗyamɗok fuus mwaan gǝ rǝ dat baan a?' ⁷ Mǝ laa gǝ nyi mǝ yen 'A nsa mǝgwuo kok mǝn nɓǝlang mou.' Mǝn yen, 'Gun zak gu mwaan gǝnaar mar nanyi.' ⁸ Wawul nkansǝgǝn mǝn wupin mar yong wunaakaa maa gǝfe mǝn yen, 'Yong mǝɓǝlang muop nanyi mǝn gǝ kwat muop, shee shi muop wu mǝ wul gǝdǝr hǝ ɗǝng shee muop wu ɗyin mǝ wul pel hǝ. ⁹ Muop wu mǝ wul nfuus kansǝgǝn jya mǝ lap dinari gǝmek-gǝmek. ¹⁰ Lat mǝn muop mǝ wul pel hǝ mǝ jya mǝ ɗye mǝ kat ya gǝ du lap nma nǝmuop wu mǝ wul nkansǝgǝn hǝ, mǝn mǝ shen a dinari gǝmek-gǝmek nmuop. ¹¹ Mǝ lap kopgǝshi du nanyi mǝn mǝ gwakshik dǝr wupin mar nanyi. ¹² Mǝ yong, 'Muop wu mǝ wul gǝdǝr, mǝ chin a ɓǝlang shii gǝme dat, mǝn gǝ kwat muop nchat gǝ mǝn wu fuus lat kaamu hǝ a? ¹³ Mǝn wupin mar nanyi laa dǝr nde yen, 'Wushaarnǝ, a chin wubis ngǝ mou. Ɗyin mǝ ɗem gǝkaa dinari gǝme mou a? ¹⁴ Lap nbigǝ mǝn gǝ waa. A an a kat gǝ a shen muop nchat gǝ nǝmak. ¹⁵ Kan gǝ a chin bii wu a tangkop gǝ byilong gǝnǝ muo mǝ? Took gǝ dam gǝ ɗam gǝnǝ a?' ¹⁶ A waa nnyi wugǝdǝr gǝ mǝ wak wuyakwar, wuyakwar gǝ wak wugǝdǝr." ¹⁷ Yesu gǝwar mwaan nUrishalima mǝn kok jeplep muop wu sarkaavǝl hǝ mǝn laa gǝ muop gǝwar yen, ¹⁸ "Gu naa, mǝn gǝwar Urishalima, gǝ mǝ pǝn Laa Gurum gǝsar ndaawang wunan muop gǝ mǝbyiyil. Gǝ mǝ gap sheep muut nnyi, ¹⁹ gǝ mǝ shen nyi nMǝjong mǝ nzhal nyi, mǝ nnas nyi mǝn mǝ nkwak nyi kaa shepɓeel. Par ɓit wukùn ɓǝ mǝ ep nyi." ²⁰ Lat mǝn nǝgǝn jep Zabadi wul dǝr Yesu gǝ jep dǝ. Dugum ntagam Yesu mǝn ɗang mǝbi fu muup. ²¹ Yesu yen, "Yi ɗem a kop me?" Mǝn lap yen, "Nyit jep nǝ muop wu vǝl nhǝ gǝme tong gǝsargǝ wumis, ɗe nde gǝsargǝ wumat nɗǝgǝn yil-long gǝgǝ." ²² Mǝ Yesu lap fu muup yong, "Gu man bii wu gun fu ɗang mou. Guu sua am nɗǝgǝn foon wu gǝ a sua hǝ a?" Mǝ lap yong, "Gǝ mǝ sua." ²³ Mǝn yong, "Guu ɓoot fu sua am nkop gǝnǝ. Ɗe a nung tugat gǝsarnǝ wumis gǝ sarnǝ wumat, a an gǝ a pǝn gun mou, a nung muop wu Ndaanǝ myap ɗen nmuop hǝ." ²⁴ Gogot jepgǝdgǝr muop wu sar hǝ mǝ kǝlǝng mǝn ɓǝt muop yal dǝr muop wu vǝl nanyi. ²⁵ Mǝn Yesu yong muop dǝr shik mǝn yong "Gu man long Mǝjong bii mǝ chin klǝng gǝ gurum gǝ du, mǝnan gǝmuop bii mǝ kamshik kaa muop. ²⁶ Gǝ kwǝt a kam gǝnaar gu mou. Mǝgwuo wu tangkop waa wuyoon gǝnaar gu ɓǝ gǝkwǝt a frang gǝgu, ²⁷ mǝgwuo wu tangkop jin a wu ntagam ɓǝ gekwǝt a frang gǝgu, ²⁸ kabi wu Laa Gurum wul npe ɗǝ mǝ wap nyi mou, ɗe a nnyi gǝ wap gurum, mǝn nmuut npe angkaa gurum yi gwet." ²⁹ Mǝ fat nɗǝgǝn gǝyil Yariko mǝn gurum wukǝrgǝi mǝ lǝngǝdǝr muup. ³⁰ Dok wuvagam vǝl mǝ tugatɗok fukyep war. Mǝ kǝlǝng Yesu nyi nɗel mǝn mǝ a̵ar ɗǝgǝl du mǝ yen, "Miskagam, Laa Dauda, naachighir kaa mu." ³¹ Gurum wukǝrgǝi mǝ ɓyaal muop mǝ yong nua ɗok, mǝn wuvagam nanyi mǝ chin aar ɗǝgǝl du ma wuɗyin hǝ, mǝ yen, " Miskagam, Laa Dauda, naachighir kaa mu." ³² Lat mǝn Yesu ɗar kit, mǝn yong muop mǝn yen, "Gu tangkop a chin a me ngun yi?" ³³ Mǝ yen "Miskagam, mǝ ɗemkop mǝ naapee." ³⁴ Mǝn Yesu naachighir gǝmuop mǝn ɓwam yit muop. Gǝ laa mou mǝn naape mǝn mǝ lǝngǝdǝr Yesu.