¹ Bǝr ndangkong nanyi mǝn Yesu taa mwaan gəfər dəɗyak-dǝɗyak gǝ saryit wang, nyi fu shakɓəlǝp langship yil-long Naan. Muop wu sarkaavǝl gǝpe gǝme gǝnyi, ² gǝ pak surəp wu tagat damwam nshik muop mǝn ɗak muop hǝ: Mariya ndung gǝ mə yong shi Magdaliya, wudok Yesu tagat damwam pogovəl nshik muup hǝ; ³ gə Yuwana mat Kuza wuɗaan lǝ Hiridus, gə Suzana, gə gogot surəp mɓəl wu mǝ sǝ gǝ muop shi byilong gǝdu. ⁴ Naa kat gurum wukǝrgǝi muop fu təlkəshak dǝr muup gǝ muop wu tugat gǝfǝr dǝɗyak-dǝɗyak, mǝn laa me ɓǝlǝpkwoom yen, ⁵ "Me wumar mwaan gǝ fuu ǝksǝ. Nyi fu fuu mǝn pak wakɗǝk gǝ war mǝn gurum mǝ dal shi kwak, mǝn bǝl mǝ ɗyigin. ⁶ Pak wakɗǝk gǝ laar, gǝ tagat kaa dat, mǝn fii nsa am shi tugus mou. ⁷ Pak wakɗǝk gǝnaar nikyen, mən mǝ fyar gǝshak mǝn nikyen ɓyang nyi. ⁸ Pak wakɗǝk kə nan mar wuret, mən pǝtkaa mǝn lǝ ǝk bǝm wudok hǝ yagurum paat." Yesu laa nanyi lat mən tak ɗǝgǝl yong, "Məgwuo gǝ kom kǝlǝngpe ɓǝ kələng." ⁹ Mən jepgədər muup mǝ nang chiin ɓǝlǝpkwoom nanyi fumuup. ¹⁰ Laa yen "Mə ɗem gun gə man byigəsok nung yil-long Naan, ɗe gogot gurum bii a laa a ɓǝlǝpkwoom gǝ muop, ɗepin gǝ mǝ 'lǝng yit muop de, mǝn gǝ mǝ naa mou; gǝ mǝ lǝng kom muop de, mǝn gǝ mǝ mankang mou.' ¹¹ Chiin ɓəlǝpkwoom nanyi a kam: ǝksǝ nanyi a ɓəlǝp Naan. ¹² Wu wakɗǝk gə war hǝ a gurum wu mə kələng ɓəlǝp Naan mən Shetan ji ɗuan ɓəlǝp nanyi fu muop yong mə mpǝn naduk mən mə nkat angkaa. ¹³ Wudung wakɗǝk gǝ laar hǝ a gurum wu mǝ kələng ɓəlǝp nanyi mən mǝ lap gə tookpya. Mǝn muop gə tugus mou; mə pən naduk dat lee mǝn twangpe nwul ɓə mə pələp. ¹⁴ Ǝksǝ wu wakɗǝk gǝnaar nikyen hǝ a gurum muop wu mǝ kǝlǝng ɓəlǝp nanyi, mǝ mwaan dat lee ɓǝ weel, gə byilong, gə manshang jepe gǝyil ɓyang muop, mən mə fwatkaa mou. ¹⁵ Ǝksǝ wu wakɗǝk gǝ nan mar wuret hǝ a gurum muop wu mǝ kǝlǝng ɓəlǝp nanyi gǝ took muop gǝme, mǝn mǝ chinkǝgǝn mən mǝ fwatkaa nɗǝgǝn mogorkung. ¹⁶ Mǝgwuo gə lang wus shi til-ngong, mən n-ogot shi yer, ko nɗen mbədər pəteer mou. Gə ɗen a gətal ɗewar gurum nrə nlǝ ɓə kat pee saan yi. ¹⁷ Nsa mǝbi kwǝt ngulung wu gǝ ma man mou; mǝbi kwǝt gǝsok wu gǝ ma pǝt gǝtal ɗepin mǝ mman yi mou. ¹⁸ A waa nnyi, gu ləngkom ɗagat n-yit, nsa mǝgwuo nkwǝt gǝ mǝbi ɓǝ gǝ mǝ pǝn nde nnyi, mǝgwuo wu bii won, ɗyin nɗye nkat jin gǝ mǝbi, ɓə gǝ mə ɗuan fu muup." ¹⁹ Lat mən nəgən Yesu gə məjepnəgən muup mə jya dər muup, mən mǝ ɓoot fu wulduk gə nyi mou nsa gurum ɓǝl. ²⁰ Mən mə laa gənyi mǝ yen, "Nəgən gə, gə məjepnang mə ɗyamɗok gəɓang, mə tangkop naa gə." ²¹ Mǝn Yesu lap fu muop yen, "Nəgən nə gə məjepnaa a muop wu mǝ kələng ɓəlǝp Naan mǝn mǝ chin ɓəlang gənyi." ²² Me mə ɓit mǝn Yesu rə nɗǝgǝn chii am, nyi gə jepgədər muup, mǝn laa gə muop yen, "A tangkop mə ɗak mǝ kaa gəɓǝt nde." Mən mə mwaan. ²³ Muop mmwaan mən saam mang nyi. Kogom fan zak yagal ɓalɓal mǝn am rǝ ba ɓagal gǝ gam chii, mən ɗen muop nweel. ²⁴ Mən jepgədər Yesu jya mǝ mii nyi nsaam, mə yong, "Miskagam! Miskagam! Mən dər ɗuam!" Mən yagal mǝn ɓyaal kogom nanyi gə am wu nyi fu dung shik hǝ, mǝn mǝ sam turǝp mǝn pee ɗar kot. ²⁵ Mən laa gə muop yong, "Ɗe pən-naduk gǝ gu ane?" Mǝn lugut yak muop. Ɓǝlǝp rəng muop mǝn mǝ laa dǝr shak mǝ yong, "A wuɗa shi ndung ɓyaal kogom gə am mən mə kələng nyi eh?" ²⁶ Mə tugun chii mwaan ngan gǝyil Gerasinawa, ndung gap kong Galili ɗel taa hǝ. ²⁷ Yesu taakaa gǝtǝng mǝn me məgwuo gǝfǝr wu nyi gǝ damwam hǝ kat nyi. Sǝmbǝjet ɓyang byaat mou, mǝn bii tong shi lǝ mou, ɗe tongɗok a gənaar gəcher dat. ²⁸ Dagwuo nanyi naa Yesu dat mǝn ɓwap wuwagar, mǝn pal teer ntagam muup mən tak ɗəgəl yen, "A me ɓyak gǝ gǝ an yi, Yesu Laa Naan Wukǝgǝt? Kambok naa yong gə tulang an mou." ²⁹ Nsa dok Yesu laa gə damwam pǝt nshik dagwuo nanyi. Nsa dok bii mǝ mɓyang nyi nfǝt, mǝn bii nanyi mmangkaa, ɓǝ damwam nanyi shang nyi waa lap ngəgər gǝnyi. ³⁰ Lat mən Yesu nang fu muup yen, "Sǝm gǝ a me?" mən lap yen, "Mən mɓəl," nsa damwam muop gwet mǝ ruo nshik muup. ³¹ Mǝn damwam muop nanyi mǝ ɗuak Yesu yong nchen muop nkon nɗǝgǝn kool mou. ³² Tung zeng dok muop fu sǝ ngan lǝɓung nnǝgǝn. Damwam muop nanyi mə ɗang Yesu ɗewar nyit muop mə ruo nshik zeng muop nanyi yi, mǝn Yesu nyit muop. ³³ A waa nnyi mǝn damwam nanyi mə fwat nshik dagwuo mǝn mə ruo nshik zeng, mən zeng muop mə suo mang peesam, mən ruo nkong mən mǝ ɗǝm nnəgən. ³⁴ Muop wu fu tap zeng nanyi mə naa kam mǝn mə suo mwaan mǝ laa ɓǝlǝp nanyi gǝfǝr gǝ fung wang. ³⁵ A waa nnyi mǝn gurum mǝ fwat mwaan gǝ naa bii wu taa hǝ, jya mǝ kat Yesu gǝpe gǝme gǝ dagwuo wu damwam mǝ fwat nshik muup hǝ. Mǝ kat tongɗok ntagam Yesu gǝ byaat nshik, yer gǝfe lat; mǝn mǝ yigil lugat. ³⁶ Lat mǝn muop wudok mǝ naa bii wu taa kabi dagwuo wudok damwam fu weel nyi mǝn kagam hə, mə laa gə gurum muop. ³⁷ Mən gurum gan gǝyil Gerasinawa dip mə laa Yesu nyit gǝyil gǝmuop nsa lugat yak muop dogol. Lat mǝn rǝ nɗǝgǝn chii am ɗewar mǝ yok yi. ³⁸ Dagwuo wu damwam fwat nshik muup hǝ ɗang Yesu ɗepin langgǝdǝr muop yi, mǝ Yesu sat nnyi waa, yen, ³⁹ "Waa lǝgǝ waa gǝ kuut bii wu Naan chin ngǝ hǝ." Mǝn dagwuo nanyi mwaan-mwaan gǝfe nyi fu laa bii wu Yesu chin nnyi hǝ dǝr gurum muop gǝfǝr dip. ⁴⁰ Yesu wawul mǝn gurum wukǝrgǝi mǝ kaat nyi, nsa dok muop dip fu kang wawul afe. ⁴¹ Lat mən me dagwuo, səm muup a Yariyus, nyi dok a mǝgwuo wuyoon nɗəgən ləwap, ji pal teer ntaam Yesu mən ɗang nyi mpe mwaan lǝmuup, ⁴² nsa dok reep muup gǝme tak, wu nyi gə yii sarkaavəl hǝ dər muut. Yesu gǝwar mwaan mǝn gurum wukǝrgǝi fu pagat nyi nsa mǝ ɓǝl. ⁴³ Me namat nyi nəgən wu chin yii sarkaavǝl təgəm fu sə nnyi, tǝ shagal gwet dǝr mǝɗak mǝn me muop ɓoot fu ɗak nyi mou. ⁴⁴ Bat ngənook Yesu mǝn ɓəm byaat ǝbǝr afǝ, gǝ laa mou, mǝn təgəm nanyi ɗar. ⁴⁵ Yesu yen "A wuɗang ɓəm an eh?" Gurum dip mǝ chii mǝn Bitrus yen, "Miskagam, gurum kǝrgǝi yaa gǝ waat, muop fu pagam gə." ⁴⁶ Yesu yen, "Məgwuo ɓəm an, nsa kamgǝɓǝlǝp pət nshik nə." ⁴⁷ Shiwu namat nanyi naa kat yong gə də ɓoot sok sat mou, mən waaji pal ntagam Yesu shik muup fu ɗam nsa lugut. Mǝn laa ntagam gurum dip, bii wu saa dǝ ɓǝm nyi yi, mǝn dǝ kagam wagap bǝr. ⁴⁸ Lat mən Yesu laa gə namat nashak yen, "Reepnǝ, pən-naduk ayi lat gok ayi. Waa chagap." ⁴⁹ Kutnyi fu ɓəlǝp gǝ laa yi mǝn məgwuo tong lə wulangtagam mǝnaakaa lǝwap ji yen, "Reep gə muut gwe. Gǝ weel wusheepe nanyi zak mou." ⁵⁰ Yesu kələng kam, mən laa gǝ Yariyus yen, "Gǝ yagal lugut mou; pǝn naduk dat, ɓǝ reep gǝ gǝ kagam." ⁵¹ Ji wul lə muup mǝn nyit mǝgwuo rǝ gədər muup mou ɗe a Bitrus gə Yahaya gə Yakubu gə ndaa muop gǝ nəgən lareep nanyi dat. ⁵² Gurum muop dip fu wal mǝn mǝ er nsa lareep nanyi, mǝn Yesu yen, "Gu wal mou; muut mou, nyi a fu saam." ⁵³ Mǝn mə swar kaa muup, nsa mə man lareep muut gwe. ⁵⁴ Mən yaa sar muup mǝn yong nyi yen "Lareep, yagal!" ⁵⁵ Mən mərip muup wawul nshik muup mən yagal bǝr. Laa gə muop mǝ pən sǝ nnyi. ⁵⁶ Ɓǝlǝp rǝng ndaa gǝ nǝgǝn muup, mǝn Yesu dǝn yong nua gǝ laa gǝ bii wu taa hǝ gǝ mǝgwuo mou.