1 Miskagam Tyofulus wukǝgǝt, gurum muop mɓǝl mǝ yil gǝkaa jepe wu ɗak gǝnaar mu hǝ, 2 kabi wu mǝ lap fu muop wudok mǝ naa shi yit muop pel hǝ, a muop a frang wu pǝn ɓǝlǝp nanyi. 3 Mǝn an zak, ndangkong a gogoldang jepe nanyi shi wudok nyi fu ɗak shideel hǝ, mǝn a naa a kat ɗong ɗyin a yil ngǝ gǝtek-gǝtek. 4 A kat ɗong kam ɗepin gǝ man naduk yi gǝkaa jepe wu mǝ shee gǝ gǝnyi hǝ. 5 Shi wudok Hiridus a long Yahudiya hǝ, dok me ndaawang ngan Abija nnǝgǝn sǝm muup a Zakariya. Mat muup dok a reep Haruna, sǝm muup a Alisabatu. 6 Muop nau a gurum wukǝr ntagam Naan, mǝ kang byitǝt wu Naan pǝn hǝ dip. 7 Mǝn muop gǝ lalaa mou nsa Alisabatu dok a zang, muop nau vǝl mǝ duan gwe shide. 8 Me mǝ ɓit mǝn Zakariya mwaan ntagam Naan mpe chin ɓǝlang ndaawang nnung gan gǝseen muop yi. 9 Dok mǝ shang a nyi ɗewar rǝ nlǝwap wuyoon mpe tuut ɗyel yi. 10 Gurum wukǝrgǝi dip mǝ ɗyamɗok gǝɓang fu ɗangnaan shiwu nyi fu tuu ɗyel nanyi. 11 Lat mǝn me mǝwong Naan pǝt dar ngan sar dasǝ nung rǝk-tok nanyi. 12 Zakariya naa nyi mǝn yagal lugut. 13 Mǝn mǝwong Naan nanyi yen, "Zakariya, gǝ yagal lugut mou nsa Naan kǝlǝng ɗangpe gǝgǝ. Mat gǝ Alisabatu gǝ laa laa wumis ngǝ. Gǝ yong sǝm muup shi Yahaya. 14 Yong gǝ kat tookpya, took gurum gwet gǝ pya shi laa gǝfe. 15 Nsa par gǝ kwǝt a wu pǝtkaa ntagam Naan. Gǝ nyit nyi nsua am-laatǝng gǝ me am wu ɗuang mou, nyi gǝ kat Mǝrip Wuret nɗǝgǝn ɓǝt nǝgǝn muup. 16 Gurum Izraila gwet par gǝ mǝ bat wakya dǝr Naan gǝdu. 17 Nyi par gǝ chan jepe gǝfe ntagam Naan kabi Iliya hǝ. Gǝ chin a kam ɓǝ bat bǝzung ndaa wakya dǝr jep gǝnyi, ɗewar mǝɓakpe mǝ mwaan-mwaan yi nɗǝgǝn soon nung gurum wukǝr mpe ɗǝ chinpe yi gǝ gurum muop mMiskagam." 18 Zakariya laa gǝ mǝwong nanyi yen, "Ɗe ge a chin a na a man yi? Nsa a duan mǝn mat nǝ zak duan." 19 Mǝwong nanyi lap yen, "A an a Gebrel wu jet gǝ a ɗyam ntagam Naan hǝ. Mǝ lep an mpe a laa ɓǝlǝp tookpya nhǝ yi gǝgǝ. 20 Gǝɗet nhǝ fugǝ gǝ bǝm, gǝ ɓoot laa ɓǝlǝp mou ɗe a par ɓit wu jepe muop nhǝ gǝ ɗak dat. Gǝ kwǝt kam a nsa gǝ nyang nǝ gǝ pǝn naduk nkwǝt bii wu Naan laa gǝ pǝt n-yit." 21 Gurum mǝ ɗyamɗok gǝɓang fu kang pǝt Zakariya. Ɓǝlǝp rǝng muop nsa mǝ kat zaa muup jong nɗǝgǝn lǝwap nanyi. 22 Pǝt mǝn ɓoot fu laa ɓǝlǝp zak mou. Mǝ man nkwǝt naa a mǝbi nɗǝgǝn lǝwap wuyoon nanyi. Ɗe gǝ nyin jepe a shisar dat nsa fu muup ɓǝm. 23 Ɓit ɓǝlang gǝfe lat mǝn waa gǝpang. 24 Ndangkong ɓit muop nanyi mǝn mat muup Alisabatu mang gam mǝn sok shik nung tar paat. Yen, 25 "A bii wu Naan chin n-an, chinɗong n-an ya ba kaa nǝ gǝ waat veet ntagam gurum." 26 Nɗǝgǝn tar wu peemǝ mǝn Naan lep mǝwong gǝnyi, sǝm muup a Gebrel mwaan gǝyil Galili wu gǝ mǝ yong shi Nazaret hǝ, 27 mwaan dǝr me reep duan wu a chagap Yusufu hǝ. Yusufu a gurum gǝ seen Dauda, sǝm lareep nanyi a Mariya. 28 Wul dǝr muup mǝn yen, "A tal yi, wu chinɗong kat yi gwet hǝ! Naan nyi gǝpe gǝme gǝ yi." 29 Mǝn ɓǝlǝp nanyi rǝng nyi badǝn mǝn ɗye dat kat ɗe a talpe me kam yi. 30 Mǝwong nanyi laa gǝnyi yen "Yi yagal lugut mou, Mariya, nsa yi kat chinɗong dǝr Naan. 31 Yong gǝ yi mang gam mǝn yi lalaa wumis. Nlat ɓǝ yi yong sǝm shi 'Yesu.' 32 Nyi gǝ waa wuyoon, gǝ mǝ yong nyi shi Laa Wukǝgǝt. Naan gǝ pǝn pǝtong-long ndaa muup Dauda nnyi. 33 A nyi gǝ chin shilong gǝkaa lǝ Yakubu gǝwoo, mǝn yil-long gǝfe gǝ kwǝt gǝ pǝlang mou." 34 Mariya laa gǝ mǝwong nanyi yen, "Gǝ chin a na nkwǝt kam mǝn jet a teer gǝ mǝmis mou yi?" 35 Mǝwong nanyi laa gǝnyi yen, "Mǝrip Wuret gǝ sam kaa yi, kamgǝɓǝlǝp nung Wukǝgǝt gǝ ǝbǝr yi. A waa nnyi wusǝsaar wu gǝ mǝ laa hǝ, gǝ mǝ yong nyi shi Laa Naan. 36 Emnǝgǝn yi Alisabatu mang gam laa wumis nɗǝgǝn duan gǝfe. A tar gǝfe wu peemǝ shi nhǝ, nyi wu gǝ mǝ yong shi zang hǝ. 37 Mǝbi a maa Naan mou." 38 Mariya yen "Gǝ naa, an a frang wureep nung Miskagam. Mang ɗyin kwǝt kabi wu gǝ laa hǝ." Mǝn mǝwong nanyi yagal nyit nyi. 39 Lat mǝn Mariya yagal bǝr nɗǝgǝn ɓit muop nanyi mwaan nlǝɓung ngan gǝyil Yahudiya. 40 Mwaan lǝ Zakariya mǝn nang Alisabatu. 41 Alisabatu kǝlǝng nangpe Mariya dat mǝn laa wu mɓǝt muup dungshik nsa Mǝrip Wuret sam kaa muup. 42 Mǝn ep ɗǝgǝl muup ɓalɓal mǝn yen, "Yi a wusǝsaar gǝnaar surǝp, laa wu mɓǝt yi a wusǝsaar. 43 Ɗe a nǝgǝn Naan gǝnǝ gǝ wul ji ntal an a? 44 Nsa ɗǝgǝl talpe gǝyi taa nkom nǝ dat mǝn lalaa wu ɓǝt nǝ dungshik. 45 Wuret laa-nkaa yi nsa yi pǝn naduk nkwǝt bii wu Miskagam laa gǝnyi gǝ kǝgǝt." 46 Mariya yen, "Chelem nǝ fu pyap Miskagam, 47 mǝn mǝrip nǝ kat tookpya gǝ Naan wu angkaa nǝ. 48 Nsa naa kaaleen frang afe wumat. Nsa, she shi ɓit wu chinyi, gǝseen gurum gǝyil dip gǝ mǝ yong an a shi wusǝsaar. 49 Nsa nyi wu a wumaa hǝ chan jepe wunan n-an, sǝm muup a wusǝsaar. 50 Naachigir gǝfe she shi seen mwaan gǝ lang shi nde seen, dǝr muop wu mǝ yigil lugut muup hǝ. 51 A nyi nyin kagam ɓagan muup; mǝn chen mmuop wu a wulǝlugap nɗǝgǝn enɗye gǝmuop hǝ. 52 Tugan jeplong muop ba gǝnyi gǝkaa pǝtugat gǝmuop, mǝn ap gurum wupya muop tagat. 53 Pǝn sǝ wuret mmuop wu ɓlak tǝ muop hǝ, ɗe chen mǝlǝlong mǝ yigil gǝ sar wufii. 54 Tǝpɓǝt Izraila wu a frang gǝfe hǝ, ɗewar ɗyedǝr nyin naachigir yi, 55 (kabi wudok laa gǝ mǝ-ndaamu hǝ) gǝ Ibrahim, gǝ seen muup gǝgwoo." 56 Mariya tong dǝr Alisabatu kabi tar kun mǝn waa gǝpang lǝmuup. 57 Shii tǝllaa Alisabatu waarǝ mǝn laa laa wumis. 58 Tǝlǝnglǝ gǝ mǝmya muup mǝ kǝlǝng nkwǝt Naan naachigir kaamuup, mǝn mǝ chin tookpya lap nyi gǝnyi. 59 Par ɓit wu pogokun mǝn mǝ jya mpe gapdǝp muup. Muop mpe pǝs sǝm muup a Zakariya kabi nung ndaa muup hǝ. 60 Mǝn nǝgǝn muup yen "Hayǝu. Gǝ mǝ yong nyi a shi Yahaya." 61 Mǝ laa gǝnyi mǝ yen, "Me wumii gu gǝ sǝm nanyi mou." 62 Mǝ laa ɓǝlǝp gǝ ndaa muup shi sar ɗewar nyi laa sǝm wu gǝ mǝ pǝs yi. 63 Mǝn ndaa muup sat muop mǝ pǝn klap-byiran nnyi mǝn ran yen, "Sǝm muup a Yahaya." Mǝn rǝng muop dat dip. 64 Gǝ laa mou mǝn fu muup ep, mǝn liis muup wut. Laa lǝfu mǝn pyap Naan. 65 Gurum muop wu nnǝgǝn dip mǝ yigil lugut. Ɓǝlǝp nanyi haanpe nau ngan lǝɓung gǝyil Yahudiya. 66 Gurum wu mǝ kǝlǝng ɓǝlǝp nanyi mǝ lap yaa mɓǝt du, mǝ yen, "Ɗǝ lalaa nhǝ par gǝ waa a bii me?" Nsa sar Miskagam gǝpe gǝme gǝnyi. 67 Mǝrip Wuret sam kǝ ndaa muup Zakariya mǝn laa ɓǝlǝpkaafung yen, 68 "Mǝ pyap Miskagam, Naan Izraila, nsa wul ji tǝpɓǝt mǝn kat angkaa ngurum gǝfe. 69 A nyi ep war angkaa mmǝn nlǝ frang afe Dauda, 70 kabi wudok laa ɓǝlǝp shi fu mǝkaafung afe mmok hǝ. 71 A nyi gǝ angkaa mu nsar muop wukas mu gǝ muop wu mǝ nyangyit mu hǝ dip. 72 Gǝ chin kam ɗepin nyin naachigir yi kaa mǝ-ndaamu mǝn nɗyedǝr biilaaɗǝn gǝfe wusǝsaar, 73 sǝgǝrfu wudok laa gǝ ndaamu Ibrahim. 74 Dok sǝgǝrfu nkwǝt, ɗǝ ji fwat gǝ mǝn nsar mǝkas mu, ɓǝ mǝ wap nyi gǝ lugut zak mou, 75 mǝ wap nyi a nɗǝgǝn saar gǝ bii wukǝr ntagam muup kan mǝn nkagam. 76 A kam, gǝ lalaa nhǝ, gǝ mǝ yong gǝ wukaafung nung Wukǝgǝt, nsa a gǝ gǝ yaawar ntagam Miskagam ɗepin gǝ myap war gǝfe yi, mǝn gǝ myap gurum muop dǝr wul gǝfe, 77 ɗepin gǝ pǝn byiman angkaa yi ngurum afe mǝn gǝ kon wubias amuop. 78 Gǝ kwǝt kam a nsa Naan a wu naachigir; a waa nnaachigir afe fuuskaa yong kaa gǝ tǝpɓǝt mu yi, 79 ɓǝ pee saan kaa muop wu mǝ tugatɗok nkwoo gǝ riin muut hǝ. Gǝ chin a kam ɗepin kam war tugatchagap yi mmǝn." 80 Lat mǝn lalaa nanyi fyǝr mǝn ɓal nɗǝgǝn mǝrip, mǝn dok waalap ngǝgǝr ɗe a par ɓit wu gǝ pǝt gǝtal ɗepin gurum Izraila mǝ naa nyi yi dat