¹ Shawulu lapgǝdǝr muut afe. Par bit nanyi twangpe wu swet yagal taa kǝ gəwur gurum Naan wu nUrishalima hǝ; mǝn mə pən naduk mə pap ngan gəyil Yahudiya gə Samariya, ɗe a jeplep dat. ² Gurum naduk mə wum Istifanus, mən mə nyin took dam muut afee. ³ Daas wu mə ɗyamɓal hǝ, mǝ wum Istifanus mǝn m wal kop muup. Mǝn Shawulu twang gəwur gurum Naan; taa mwaan shilə-shilə mǝn dəl ɗaas gə surəp mwaan gǝ ɗek nləɓal. ⁴ Nau gə kam hə, məpǝn naduk wu mə pap hǝ, mə shakɓələp Naan npee wu mǝ kat kaa sut nnǝgǝn hǝ. ⁵ Filib mwaan yaa gəfər Samariya shakɓələp Kristi nmuop. ⁶ Gurum wukərgəi mə kǝlǝng mǝn mǝ naa byinyin Filib chan hə, mən mə ləng endu shi ɓələp afe. ⁷ Damwam mə fat nshik gurum gwet, muop fu wal gǝ ɗəgəl, mǝn wu shimuutkum gə wu kəgəl gwet mə kat kagam. ⁸ Mən took muop wu gəfər nanyi pya. ⁹ Dok me dagwuo nyi gəfər nanyi, səm muop a Siman, dok gǝ chan daat; mǝn bii chan jepe wu rǝng gurum Samariya, mən mang gəshik a gurum wusaan. ¹⁰ Gurum Samariya dip, mənan gə jep bii mə kələng nyi; mǝ yen, "Dagwo nhə nyi maa nung Naan wu gə yong shi Wuyoon hə." ¹¹ Mə kələng nyi nsa jet bii gə chan jepe wu rǝng gwe pogot shi daat afe. ¹² Shi wu mə pən naduk nFilib wu shakɓələp yil-long Naan gə səm Yesu Kristi, mən mə kǝn muop daas gə surəp. ¹³ Nyi Simon nau pǝn naduk, ndangkong mǝ kǝn nyi mən ɗe dər Filib. Naa byinyin gǝ ɗyeer wu fu ɗak hǝ mǝn rǝng nyi. ¹⁴ Jeplep wu nUrishalima hǝ mə kələng nkwǝt Samariya lap ɓələp Naan, mən mə lep Bitrus muop gə Yahaya. ¹⁵ Jya mə ruo mən mǝ ɗangnaan kaa muop ɗewar mə lap Mərip Wuret yi. ¹⁶ Nsa shi nanyi dok Mǝrip Wuret sam duk kaa muop mou; dok mə kǝn-a-kǝn muop dat nɗǝgǝn səm Miskagam Yesu. ¹⁷ Lat mən Bitrus muop gə Yahaya mə ləng sar du kaa muop, mən mə lap Mərip Wuret. ¹⁸ Simon naa kat mə pǝn Mǝrip Wuret shi jeplep mǝ lǝng sar dat, mən pən shagal nmuop. ¹⁹ Mən laa yen, "Gu pən kamgəɓələp nanyi n-an zak ɗəwar a lang sarnə kaa mǝgwuo ɓǝ lap Mǝrip Wuret." ²⁰ Mən Bitrus laa gənyi yen, "Mang gu azurfa agə lat baan nau gəgə, nsa gə ɗye gə kat seet chinɗong Naan shi shagal. ²¹ Fuɓət gə npen mou, nsa bǝzung gə n-yit gə Naan mou. ²² Waa nsa nyi, nyit ɓǝtbis agə, mǝn gǝ ɗang Miskagam, ɗewar nyi kon wubis wu nbəzung gǝ yi. ²³ Nsa a naa a kat gə a tugus ɓətɗeet mən wubis bugat gə gwe." ²⁴ Simon lap yen, "Ɗang Miskagam n-an yong ba me mǝbi wu gə laa hə nkat an." ²⁵ Ndangkong mə twamshik mǝn mə laa ɓələp Naan lat, mən Bitrus muop gə Yahaya mə wak dərh Urishalima, muop fu shakɓələp hlangship nfu wang Samariya gwet. ²⁶ Me Məwong Miskagam laa dər Filib yen, "Yagal gə mwaan ngan-wang gəwar wu yagal nUrishalima waadər Gaza hǝ." (war nanyi zangpee.) ²⁷ Mən yagal mwaan. Lat mən me dagwuo gəyil Habasha, nyi a wumeermuut, mǝn nyi a a wu kamshik lǝ matlong Habasha. A nyi dok a wu naakaa byilong afe. Dok wul nUrishalima dər wap Naan yi. ²⁸ Dok tongɗok gə nɗǝgǝn kǝrkwaa wu bəsəng bii del hǝ, nyi gǝwar waa, mǝn nyi fu bil byiran Isaiah wulaa-ɓǝlǝpnaan. ²⁹ Mərip laa gə Filib yen, "Mwaan dukduk gə kǝrkwaa bəsəng nhǝ." ³⁰ Mən Filib yak gǝsǝ mwaan dər muup, mən kǝlǝng nyi fu bil byiran Ishaya wulaa-ɓǝlǝpnaan, mǝn yen, "Gə mankang bii wu gə fu bil a?" ³¹ Dagwuo lap yen, Gǝ a mankang a shi me, ɗagat nǝ mǝgwuo nyin n-an mou yi?" Mǝn ɗuak Filib kaa gǝ tong dǝr muup nɗəgən kǝrkwaa bəsəng nanyi. ³² Pee wudok dagwuo Habasha nanyi fu bil nɗəgən bang-byiran a kam hǝ, "Dok mə dəl nyi a kabi təm wu muop gǝwar mwaan gǝ gap hǝ, mǝn ɗok kot kabi tǝm wu ntagam mǝ shang nar gǝfe hǝ, ep fu muup mou. ³³ Mə ɓak nyi wagap ba mə dən naduk shi muup. A wuɗa gə kuut ɓǝlǝp seen muup yi? Nsa mə mang tenglang afe gəyil." ³⁴ Lat mǝn wumeermuut nanyi nang fu Filib yen, "Wulaa-ɓǝlǝpnaan nanyi fu laa ɓǝlǝp a kǝ wuɗa, a kə shikmuup a, a kaa məgwuo nyik eh?" ³⁵ Mǝn Filib ɓəm ɓələp gǝkaa bang-byiran nhə, mən shakɓələp langship gǝkaa Yesu nnyi. ³⁶ Muop nmwaan dat gəwar mən mə kat am, mən wumeermuut nanyi laa yen, "Gǝ naa, am nyi npeen. A me gə dən mə nkǝn an yi?" ³⁷ . ³⁸ Dagwo Habasha sat nkǝrkwaa bəsəng nanyi ɗar. Filib muop gə wumeermuut nanyi mǝ ruo nɗəgən am, mə Filib kən nyi. ³⁹ Mə fat gǝnaar am nanyi dat mən Mərip Miskagam mang Filib ɗel gənyi, mən wumeermuut ba naa nyi zak mou, mən waa-waa afe nɗəgən tookpya. ⁴⁰ Filib kat kaashik gǝyil Azotus mən taa mwaan ngan pee nanyi fu shakɓələp langship shi gəfər dip ba mwaan gə rə nKaisariya.