¹ Me məgwuo wu səm muup a Hananiya, gə mat muup Safira, mə seet gə me byilong afe ² mǝn sok pak shagal nanyi (gə man mat muup), mən ji gə gogot tagam jeplep. ³ Mən Bitrus laa yen, "Hananiya a waa nme Shetan fuən gǝ gə laa wurum yi dər Mərip Wuret shi gǝ gap pak shagal mar nanyi gǝ baa gǝnyi yi? ⁴ Shi wudok gə seet gǝnyi duk mou hǝ, dok a nǝmak mou a, waaji gǝ seet gǝnyi, a gǝ gǝ kamgǝɓǝlǝp gǝkaa mou a? A waa nme gə ɗye bii nakam nbəzung gə yi? Gə laa wurum a ntagam gurum dat mou, gə laa nau a ntagam Naan." ⁵ Hananiya kələng kam mən pəttaa mən muut, gurum wu mə kələng hǝ dip mǝ yigil lugut badǝn. ⁶ Jepsual jya mə mwaar kum muup, mən mə mang mwaan gə mə wum. ⁷ Ndangkong shii mak kún mən mat muup ji rǝ, man bii wu taa mou hǝ. ⁸ Bitrus laa də muup yen, "Laa gǝ an kwət gu seet gə mar nanyi a kam oh." Mən lap yen, "A kam hə." ⁹ Lat mən Bitrus laa dər muup yen, "A waa nme gu ɓugat fugu mən gu katshi Mərip Miskagam yi? Yi kələng vaap gurum wu mə wum mis yi hǝ fulə, gə mə mang yi gə fat gənyi." ¹⁰ Gǝ laa mou mǝn pal ntagam muup mǝn muut. Daas muop nanyi jya mǝ ruo mǝn mǝ kat muut gwe, mǝn mǝ mang nyi mwaan gə wum shiɓǝt mis muup. ¹¹ Lugut yaa gǝwur gurum Naan badǝn, nau gǝ muop wu mǝ kələng ɓələp nanyi. ¹² Byinyin gə ɗyeer mə ɗak gwet gəsar jeplep. Dok mə təl kaa shak dau Fugədo Sulemanu. ¹³ Mən məgwuo kat tugurduan wu lang gədər muop mou; nau gǝ kam, gurum gə mǝ pən yoon nmuop. ¹⁴ Nau gǝ kam hə mǝ muop wu pən naduk hə, muop a fu ɓǝl dat, ntagam Miskagam, daas gum gǝ surǝp, ¹⁵ nyang mən bii mə kok wugok muop mwaan gə fu war, mə ɗək muop gə pəteer gǝ pǝtugat, ɗewar ɗyin Bitrus nɗel war, ɓə wa riin muup ɗel kǝ pak muop. ¹⁶ Gurum gak mə tugat gǝfǝr, ngan Urishalima jya yi, mə ja gə wugok muop, gə muop wu damwam fu chan klǝng gǝ muop hǝ, mǝn ɗak muop dip. ¹⁷ Mən ndaawang wukakəgət yagal, nau gə muop wu gǝpe gǝme gǝnyi hǝ (wawu Sadukiyawa muop); mən naalaa yaa mou ¹⁸ mən mǝ yak jeplep mən mǝ ɓyang nləɓal. ¹⁹ Nɗəgən ləpar mən me məwong Miskagm ap fuləɓal mən pət gə muop, mǝn laa yen, ²⁰ "Mwaan gu ɗyam nləwap wuyoon mǝn gu laa ləfu dər gurum dip gəkaa ɓələp tenglang nhǝ." ²¹ Mə kələng kam mən mə ruo nləwap wuyoon, mokmok mən mə sheepee. Mən ndaawang wukakəgət, gǝ gurum wu gǝpe gǝme gǝnyi, yong gəwur daskagam, gǝ mənan gurum Izraila, mən lang lep ɗepin wukang kaa ləɓal tagat muop yi jya gənyi. ²² Mə kang fulǝwap mwaan mǝ kat muop nlǝɓal mou, mǝn wak mə yakdang mə yen, ²³ "Mə kat fuləɓal a wu bǝɓal wagap mǝn mǝpyan kangpe mǝ ɗyamɗok fulǝ, ba mǝ ep mən mə kat məgwuo meh." ²⁴ Long mǝkang lǝwap wuyoon gǝ ndaawang wunan mə kələng kam mən rǝng muop, mə man bii wu chin mou. ²⁵ Lat mən me məgwuo ji laa gǝ muop yen, "Daas wu den gu ɓal muop hə, mə ɗyamɗok nləwap wuyoon muop fu shee gurum muop." ²⁶ Mən long mǝkang lǝwap wuyoon mwaan gə wawul gə muop nshikzugum, nsa mǝ yigil lugat gurum yong mə nzwam muop shi pang. ²⁷ Mə wakjya gə muop mǝn mǝ sat nmuop ɗyam ntagam gəwur daskagam. Ndaawang wukakəgət nang fu muop, ²⁸ yen, "Dok mə laa gəgun wagap ɓaan-ɓaan nkwǝt gu nook sheepee nɗǝgǝn sǝm nhə mou, mən gu ɗokɓǝp gu haan Urishalima gə sheepee agu, mən gu tangkop gu lang zhiiri təgəm dagwuo nhə nkaamu." ²⁹ Mən Bitrus gə jeplep mǝ lap yen, "Gə mə kələng a ɗəgəl Naan, a nung gurum mou." ³⁰ Naan mǝ-ndaamu a nyi ep Yesu, wudung gu lang shi təng mən gu tə hǝ. ³¹ Naan mang nyi lang gǝsar muup wumis, a nyi waa laa long gǝ wu angkaa, ɗǝ pǝn war bat yi nIzraila gə kon-wubis. ³² A mən a wu twamshik gəkaa jepe nhǝ, nau gə Mǝrip Wuret wu Naan pǝn gurum wu mə kələng ɗəgəl muup hə." ³³ Gəwur daskagam mǝ kələng kam mən dəfil mang muop ba mǝ tangkop tuo jeplep nanyi. ³⁴ Mən me dagwuo Farisiyawa, sǝm muup a Gamaliyel, nyi a wuman byitǝt, gurum bii mǝ pǝn yoon nnyi, yagal ɗar mən sat njeplep nanyi mə fat gəɓang ɗangkom. ³⁵ Mən laa gə muop, yen, "Daas Izraila, gu naa bii wu gun gəwar chin gǝ gurun muop nhǝ gǝret. ³⁶ Yii wudok ɗyiləng hǝ, Tudas yagal ɗen kaashik a mǝbi, mǝn gurum wakruo ɗaa feer mǝ ləng gǝdǝr muup. Dok mə tə nyi mǝn gurum gǝdǝr muup mǝ pap mǝn lat baan. ³⁷ Ndangkong muup, Yahuza gurum Galili yagal fu yii kunkaa gurum, mǝn pak gurum mǝ lǝng gǝdǝr muup. Nyi zak lat baan mǝn gurum gǝdǝr muup mə pap. ³⁸ Gəɗes hə, an fu la gəgu, gu fat gəwar gurum muop hə, gə nyit muop ɗagat, nsa ɗyin bii wu muop shifu nhə nkwǝt a nung gurum ɓǝ gǝ lat baan. ³⁹ Ɗyin nkwət a nung Naan, ɓǝ guu ɓoot npe təfu mou; nlat ɓə gu kat gun fu lǝk a Naan." Mǝn mǝ lǝngǝdǝr karpe gǝfe. ⁴⁰ Lat mən mə yong jeplep nanyi, mǝ nas muop mǝn mǝ dǝlkom muop nkwǝt nua gǝ laa ɓǝlǝp nɗǝgǝn sǝm Yesu shizak mou, mən mə nyit muop ⁴¹ Mə yigil nyit gəwur daskagan nanyi gə tookpya nkwət du mak npe sua tǝgǝrchiin nsa səm Yesu. ⁴² Ndangkong nanyi, mǝn bii muop nlǝwap wuyoon gǝ shilǝ-shilǝ, muop fu sheepee shiɓit-shiɓit, muop fu shakɓǝlǝp nkwǝt Yesu a Kristi.