¹ Simona Petulu,ndungo na muluwa wa Yesu Kilisitu,kuli baje boshe bana tambula ku kulahela kwa theho ngwe chije lalo tuna tambula netu nawa,kukulahela mu kuthungama kwa Njambi yetu na muyoyethi Yesu Kilisitu. ² Ngothzi na kwoloka bilibwethzelele mutheteko yeni ya kuthzubka Njambi na Yesu Mwene yetu. ³ Kwitila mundthzili yendi ya bunjambi,byuma byoshe bya kuyoya chetu na bunjambi bana byana kuli yetu kwitila mu kuthzubuka ikeye uje ya tuthanene kwitila mu kuthzubuka ikeye uje ya tuthanene kwitila mu bumpahu bwendi na bungulu bwendi. ⁴ Kwitila muli ebi wa twanene bikulahetho bya kama cholola bya theho,manganoni mulipangethele chifwa cha bunjambi,akulingoni yeni muna panduka laja ku bubi buli muli lifuti a mulonga wa mashungu a mabi. ⁵ Chojo a mulonga wechi,yenihoni ethekeni na ndthzili yoshe ngechi mubwethzelele bubwa ku kulahela cheni,chojo n kububwa bwethzeleleniko mangana, ⁶ na ku mangana wethzeleleniko kulinyunga,kulinyunga wethzeleleniko likakateya,cho nakulikakateya bwethzeleleniko bunjambi, ⁷ kubunjambi bwethzeleleniko kuchithzemo cha bundolome,ku chithzemo cha bundolome bwethzeleleniko chithzemo. ⁸ Chojo umononi ngwe byuma ebi byoshe bili muli yeni na kukobela muli yeni,cho bikami kwatha kukala na mangana aje a napande mu kuthzubuka Mwene yetu Yesu Kilisitu. ⁹ Olojo uje woshe kethyoni na byuma ebi cho akaloni waku mwena muyehi na kupwani ngwe kapuputwa,a kulinga nebala lalo ngwabo naba mu kushu na k mutoketha ku bubi bwendi bwoshe bwa kuima. ¹⁰ Chohoni,bandolome,munapande kwetheka manene ngechi mumone ngwe mu nyungilila bwino kumithana kweni na kunangula,kweni mwafwa ngwe mulinga byuma ebi,cho chili bene kumukatundu ku kukulahela kweni. ¹¹ Cho na muchifwa echi baka mishokweleleoni chikolo cha kobela mu bumwene bwa myaka yoshe bwa Shukulu Mwene yetu na muyoyethi Yesu Kilisitu. ¹² Chojo nangyoni njina lyana thimbu yoshe ku myanukitha byuma ebi,nameme bene munabithzubukoni,cho lalo mu koletha mu buthunga oku bumulinabwo. ¹³ Njina thinganyeka ngwange chinanjipande,a thimbu bene ino nji chili na kuyoya muli ou mubila,ku minyangumuna mu chifwa cha ku myanukitha. ¹⁴ Mwafwa njathzubuka laja ngwe ololo bene njishulula uno mubila, a kulinga Mwene yetu Yesu Kilisitu na chisholola laja echi kuli yange. ¹⁵ Chojo njetheka na bindthzili byoshe na kumona ngwe mukanuka a thimbu yoshe nameme anima ya kufumaho yange. ¹⁶ Mwafwa kethi ngwe ngwabo twa kabele lika bithimo bya kutunga kubanu bakunyanyama omwo mutwamilekele bya bindthzili bya mwene yetu Yesu Kilisitu na kwija kwenda embwe,olojo twakele tubakaleho baje bali mwenenen na mesho etu bukama bwendi. ¹⁷ Omwo wa tambwile kathingimiko na bumpahu kuli Njambi Ishe a thimbu lije lijwi lyethzile kuli ikeye kutunda kuli uje mutwe wa bumpahu lije lyendekele ngwalyo, "Ou ikeye munange nja thzema,cho nja bwahelele manene nendi." ¹⁸ Yetu babenya twa lithzibilile eli lijwi lije lya tundile mwilu athimbu ije twakele nendi aje a lilundu lya kuthzila. ¹⁹ Chojo tuli nalyoni lijwi lya bupolofita lijoni lina lishulithilila,cho mulinga bwino kutolilila ku likelyo mwafwa linapu ngwe ndeya ije ili na kutwa cheke muchela cha lithuthulungu kweta na ku mutondo cho na ngongonothi ya mutondo itwila cheke mu bimbunge byeni. ²⁰ Hali ebi byoshe,munapande kuthzibithitha ngachije ngwe kukwethi mathona a bupolofita aje aka tundilila muku nungulula kwa munu babenya. ²¹ Mwafwa ku kwakele lijwi lya bupolofita olyo lya ijaho laja kutundilila muchithzango cha munu,olojo banu bakele na kwendeka bya kutundilila kuli Njambi omwoni bakele na kuba twamenena kuli mundthzindzthzime wa kuthzila.