¹ Petulu,ou muluwa wa Yesu Kilisitu,batunduke baje bana lishandoka,baje baba nangula,mwashe mu Pontiyase,Ngalatiya,Kapandosiya,Esha, na Mbeteniya. ² Echi chinapu mukwetheketha namaana akulutwe a Njambi Tate, banamijethela kwitila mu bipangi bya mundthzindthzime,ha kwononoka na ha kumimyangwila kwa maninga a Yesu Kilisitu.Echeleni chikeketima chikale neni,Cho na kwoloka kweni kubwethzeleleko. ³ Tuyeni tushangathzale Njambi na Ishe ya Mwne Yesu Kilisitu! mungothzi yendi yakama, natwana kuthemuka kwa kuha na kukala na chinyangabili cha kuyoya kwitila mukuthanguka kwa Yesu Kilisitu kutunda kubathsi. ⁴ Obu bunapu buswana bwa kujeneka kunyongwa,kubukapu kwa matoma matoma, cho lalo kubukapiluka.Banamitulikilabwo mwilu. ⁵ Yeni bana minyungu na ndthzili ya Njambi kwitila mu likulahelo mwafwa bwobwoke bana mibwahethela laja echi chikajomboloka hathimbu yamamanethelo. ⁶ Yeni munabwahelela hali echi,nambe bene chinamipande yeni kwombwa ku byetheko bya bingi bya kulithethathetha. ⁷ Echi chinapu bukaleho bwakukulehela cheni, echi cha theho yakama kuhyana ngolindeije ikanyonga,nambe bene bakayetheka mutuhya. Echi chikasholoka mangananoni kukulahela kweni kukawanewe kulemetha,bumpahu, na kathingimiko thimbu Yesu Kilisitu bamujombolole. ⁸ Yeni kumwamumwene,oloni mwa muthzema. Yeni kumwatha kumumona ha thimbu ino,oloni mwakulahela muli ikeye na kujolela na kumwahelela kuje kutwatha kusholwetha nambe kushulitha na bumpahu. ⁹ Yeni babenya muli nakutambula bilinga bya kukulahela kweni,na kwoboka kwa myonyo yeni. ¹⁰ Cho kwimanena ha kwoboka oku,baje tupolofita baje bapolofitile bya ngothzi ije ikaija kuli yeni,bakabishakathzeka chitonenena na kuchipetheletha bwino, ¹¹ bakebo bethekele kuwana bika bili muli munu nameme thimbu ije mundthzindthzime wa Kilisitu muli bakebo wakele nakusholwetha omo wakele na kwambulula bukaleho thimbu kanda akuyanda kwa Kilisitu na bumpahu buje bukakabaho. ¹² Cho cha sholokele kuli bakebo ngwe ngwabo kubakele na kulipangela bakebo babenya,oloni yeni,omu bendeka ha byuma bije bamilekekele kuli baje bambulwile muthzimbu waubwa kuli yeni nandthzili ya mundthzindthzime wakuthzila uje ubatumine kutunda mwilu - byuma ebi tungelo babandamena kumona. ¹³ Cho libwahetheleni biyongola byeni mubukalu. Kaleni na mesho a changa. Akeni chinyangabili choshe hangothzi ije bakaminenela omu Yesu Kilisitu akasholoka. ¹⁴ Omu munapu bana bakwononoka,kethi mulitabethe yeni babenya kubithango bimwakabele hathimbu mwajenekele kutanekeya. ¹⁵ Oloni omwo uje wamithanene wapwa wakuthzila,yeni,nawa,pweni bakuthzila mubilinga byeni bwoshe. ¹⁶ Mwafwa bachithoneka ngwabo, "Thzileni, mwafwa yange njapwa mwakuthzila." ¹⁷ Cho nga yeni munjithana ngweni "Tate" umo uje mukakubihitha natheteko imolika ha munu woshe habipangi byendi,yeni mukati ka thimbu ya bungendthzi bweni mukathingimuko. ¹⁸ Mwathzubuka ngweni kuchethi na kunyongwa ngwe siliba na ngolinde echi na patula kulibanga bya bulema bimwalilongethele kutunda kuli baishweni. ¹⁹ Nambe ngocho,bana myobola na maninga a akulema a Kilisitu,uje wapwile ngwe muna manga wakujeneka libala nameme kapenga. ²⁰ Kilisitu bamumwangwile te kanda bajale lubula lwa kaye,oloni bana misholwelaye kuli yeni mu matangwa amananethelelo. ²¹ Kwitila muli ikeye muna kukalahela muli Njambi,uje wamuthangwile kubathsi na kumwana bumpahu,lingoni likulahelo na chinyangabili byenei bikale muli Njambi. ²² Mwajelethele mwonyo yeni ha kwononokela mu buthunga.Echi cha chibwa cha buthunga bwa chithzemo cha bundolome; cho lithzemeni umo na mukwabo na bimbunge byeni byoshe. ²³ Yeni munathemuka lubali,kumwatundile ku mbuto ya kunyongwa,oloni munatundu kumbuto ya kujeneka kunyongwa,kwitila lya Njambi lya kuyoya na kulitulaho. ²⁴ Mwafwa, "Mibila yoshe inapu ngwe mwila, na bumpahu bwawo bwoshe bunapu ngwe bintemo bya mwila. Mwila ukomu,cho na bintemo bikakukumuka, ²⁵ oloni lijwi lya Shukulu lyakaleleko myaka yoshe." Eli lijwi lya muthimbu uje ubambulwile kuli yeni.