¹ Yaa treita y seis ( 36) camui icuateica yaii yacale icuerinaca Asa, Baasa, neiwacalii niai Israel-nai, yaa imanicawa cayaberi iyu naipunita niai Juda caita imaca Rama, pichana imacaca namosoacaba caide nawaloacaba cali yasu Asa, naiwacalii niai Juda. ² Nese Asa yanidaca palataa caita oro metacuta naicha niai nawendacalu yaa icape nenii waiwacali caita icape neni "yacale iwacali" caita ibanoaca niai Ben Adad, yacale iwacali yaa Aram, yacata iyeri Damasco nere. yaa imaca: ³ "Wamenii aberi tacaisi baisiri piapicha caita nua, caide iyuwa namenina níai nuaniri caita pianiri. Pica, nua nubanoaca piri palataa caita Oro. pimalaca yai tacaisi baisirica yapicha yaa Baasa, yacale iwacali ya Israel nai, yewacatena yai imacacanoa matuibanaita. ⁴ Ben Adad yemiaca yacale iwacali Asa caita ibanoaca niai naiwacananaica yasu uwinai ipunita yai yacale Israel nai. niai napeliadaca Ijon, Dan, Bel Maín caita macaita nayacale iyatabaca niade yacalenai yaa Neftali. ⁵ Imaniricawa caitanacai Baasa yemiaca yaii, ya ibaloadaca yai imanirica Rama, ya imanica caita yai iibaidacale ibaloadacani. ⁶ Nese Asa yacale iwacali iteca macaita Judá nai yapicha. Nia natecani nawalibawa nia iba caita iwalemi ya Ramá, niacata Baasa imichaidana yai yacale. Nese yacale iwacali Asa yasairita icacanawa wawasica imichaidanaca ya Gaba caita Mizpa. ⁷ Nenialita erica Hananí yacata cachainiri icacawa yacawa Asa nere, yacale iwacali ya Judá, caita yai imaca: "cana pia manui picacawa iwali yacale iwacali Aran, cana camita manui piwawa iwali "Waiwacali" piasu "Dios", niai uwinai yasu yacale iwacali Aran nai ya ichuliacawa picapi inatabawa. ⁸ ¿Camiyeita niasana niai caita nia abemisanata aberi manubeyei uwinaica, manubani yepuniyei yalubai iricu caita asianai ideniayei caballu? ina caitanacai manui piwawa "Waiwacali" iwere, ya yacapiri pichaini pipeliaca naipunita niade. ⁹ Cana niai itui yaí "Waiwacali" ipiacawa macaita nayatabaca inatabawa yai cali imanuicaca, caita yasaidacawa caide iyuwa cachainiri ipidenasica ya macaita niade yaa nawawaca cayaberi ipichale yai. pia quewa cairimeda iyuwa maliawaisairi iwiteise iricu yaa waibaiderica sisa idecuni wapichale, iyapinaca uwicai". ¹⁰ Nese Asa caloaca bawawaca yapicha yai baisinaca itanica; ya naiyaca presunii, caicanita iyaca yepunicawa calowaca yapicha iwalise macaita yade ibaidacalesica. iyuwa yata erica, Asa ichuliaca chainisi newise nia yacalenaica. ¹¹ Yacata niai imanicale Asa-ca, niacata idabeiyewa caita alede namalaidana, iyaca naipidena (libro) nasu iricu níai yacale iwacalinanai Judá caita Israel. ¹² Ya camui treinta y nueve (39) yaa ichulianaca, Asa ideniaca aberi ulaicai yabali neniwa; ulaicaica manui cachainiri bawawaca. ya caitanacai, ya camita isutaa aberi icueripina icha "Waiwacali", aberita naicha níai idapiayaica. ¹³ Asa imaca itaquenainami yewiwa; yaa yetacawaa ya camui cuarenta y uno (41) idecuni icuacania. ¹⁴ Yaa nacaa nabaliacani nasu sementerio iricuwa, yaa yawacata icani iriwa yacale David-naí iricu. Yaa níai naliadacani yaluriculewa ipuniaricawa isani iyu yai puchicherica caita macai iwitana yacasi nachuniarica niade pumeniri iwacananai iyeyeica aberi capi camaliqueyei iyatai.