¹ Atwe vantu kuvhura kughayara tuturepo maghano ghetu, ano ngoli nkango da Hompa odo aghamba kukwetu ndo da kutikiliramo. ² Ove kuvhura ghughayare ashi maghayaro ghoye na ghantje gha uhunga, ano ngoli Hompa ndje wa kukona-kona mpepo doye nadintje. ³ Shungida ghutape viruwana vyoye kwa Hompa mposhi nga vitungike ngavi tikiliremo. ⁴ Kehe shino aturapo Hompa kwa kara po na shitambo, nampili vadini Karunga kwava turapo mposhi ngava kadjonaukepo. ⁵ Hompa kapi ahora vantu va kukunenepita, vantu vaweno, vakona ntani kuva tengeka. ⁶ Kara na shihoro na nalipuro mposhi Hompa nga dongononepo ndjo doye ntani nkene vantu ava fumadeke Hompa ngava popera ku ndjo. ⁷ Nkene ngaghu tapa ruhafo kwa Hompa, ghuye ngarenka vana nkore voye vakare na mbili nove ngava kare vaholi voye. ⁸ Hasha tupu nkene aghukara na limona lya lisheshu, kupita kana vya kukara nalimona lya liyingi unene lya kuwana kuwidi na urunde. ⁹ Muntu kuvhura kuturapo maghano ghendi, ano ngoli Hompa ndje wa kuvhura kutokora viruwana vyoye ovyo ngaghu ruwana vitikiliramo. ¹⁰ Hompa kwakara na nkondo da uhompa; matokoro ghendi kehe pano kwa hungama. ¹¹ Hompa kwa hora shiviha na shimetito shikare sha ushili; ndando na mushosho wa ndjako nadintje dikare da uhunga. ¹² Va Hompa kapi vakengereranga urunde, ashi uyite udona, mukonda shi uhungami ngo wa ku nkondopeka lipangero. ¹³ Hompa kwa hora kuyuvha ushili ntani ghuye kwa hora vantu va kughamba ushili. ¹⁴ Hompa nkene agarapa kuvhura adipaye muntu ano ngoli muntu wa ukonentu kuvhura kusheumuna lishandu na ugara wa Hompa. ¹⁵ Nkene shi Hompa ana kara narufafo mushipara shendi kukaramo ukenu na shite ntani namaremo gha kuyita mvhura ya kutemuna ya kuyita monyo wa liparu. ¹⁶ Kukara na ukonentu kwa pitakana kuwana ngorodo. Kuwana ndunge kwa pitakana kuwana siliveli. ¹⁷ Vantu vavawa kuyenda mudjira ya kuvyukilira ya kupira udona; muntu wa ku hova kukona-kona ndjira yendi oyo ana kuyenda kupopera monyo wendi. ¹⁸ Likunenepito kuyita lidjonauko ntani muntu wa kukutumba kupunduka akugande palivhu. ¹⁹ Hasha tupu nkene aghukudidipita mukatji kava hepwe ku pitakana omo ngaghukara ukwavo nava kamashaka ngamuku tapere limona lyakuvaka. ²⁰ Kehe uno wa ku pakera mbili marongo ogho vamuronga ngawana ghuwa na limona, ntani kehe uno wa kuhuguvara mwa Hompa ngawana matungiko na lirago. ²¹ Muntu ogho akaro na ukonentu kumudimburura mukonda ya ndunge dendi ntani na ukonentu wa marongo gha nkango dendi na lirago lyendi lyalinene. ²² Kehe uno wa kuwana ukonentu kuwana mukuro wa liparu, ano ngoli kuronga muntu wa mugova kuhepeka shurugho. ²³ Vantu va ndunge kuhova kughayara ntani vana kughamba makura nkango davo kwa kara nalihuguvaro lyalinene. ²⁴ Nkango da mbili kwafana yira ushi wa mpuka - utovali unene ku tendeka monyo ntani na kutapa ukanguki unkondopeke vifupa. ²⁵ Pakara ndjira oyo yamonekango ashi ya uhunga kushipara sha vantu, nane ngoli yayo ndjira ya ku kutwara kumfa. ²⁶ Nkene muntu kuna kuyuvha ndjara kumupa nkondo da kuruwana unene; mukonda shi ghuye kuna shana ku ghupapo ndjara yendi. ²⁷ Vantu vavadona kwa hora kutjutjupita va unyavo kumutjima na nkango davo da ku twera yira mundiro. ²⁸ Vadini Karunga kutjora mapata ntani vavo kuyita dimutangu na ushoti vadjonaurepo uholi. ²⁹ Vantu va ukorokotji kughamba vimpempa kuva unyavo makura ngava vatware vayende mundjira yayidona ngava kadjonauke. ³⁰ Kukenga nawa vantu ovo vana kukushepo nadimurungu kumwe na ku diva mantjo; vavo kukughayarera vakuyitire vininke vyavidona viye kukoye. ³¹ Monyo wa ghure wa kuntunda yalivhu ndjo mfuto ya uhungami; ntani huki da mvhi mumutwe ndjo nkata ya mfumwa. ³² Muntu wa ku kudidimikira unene apitakana lipenda lya nkondo unene ntani muntu wa kupangera mpepo ya mwene apita kana muntu wa kupangera vitata navintje. ³³ Atwe vantu kuruwana kehe pano viruwana vyetu vya fungu-fungu, ano ngoli Hompa ndje wa kutokora aruwane ovyo ana shana.