¹ Ovino mbyo vishewe vya Salomoni. Mumati wa ukonentu kuyita ruhafo kwa Vashe ano ngoli mumati wa ugova kuyitira vawina lishwau. ² Limona lya kuwana muviruwana vya urunde kwato mulyo, ano ngoli kuruwana uhungami ku kupopera kumfa. ³ Hompa nakukengererashi vahungami vakare na ndjara, ano ngoli ghuye kutengeka vadiKarunga vapire kuwana ovi vana kushana. ⁴ Maghoko gha muntu wa udwa kuyita ruhepo, ano ngoli muntu wa ukoli naviruwana kuyita limona. ⁵ Muntu wa ukonentu kupongeka ayangure muyangu nkene shirugho shina tikimo, ano ngoli vagova vavo kurara shirugho sha kupongeka muyangu. ⁶ Matungiko gha Karunga kuya kuvantu va vahungami, ano ngoli mukanwa kavantu va urunde kwa horekamo ukorokotji. ⁷ Vantu va uhungami kuva vhuruka kehe pano naruhafo nampili momu vafa kare-kare, ano ngoli vantu va urunde kuva vhururama mushirugho shashifupi tupu nkene ava tundupo. ⁸ Vantu va ukonentu kutambura mapukururo valimburukwe, ano ngoli vantu vama kurughamba ntani vavo kughamba vimpempa ngava djonaukapo. ⁹ Vantu va uhunga vakukwama ushili kuyoghoka, ano ngoli vantu va kuruwana urunde, ngava vayita pa ukenu. ¹⁰ Muntu wa kudiva lintjo kuyuvita kukora kumutjima, ntani muntu wama kurughamba ngayenda mulidjonauko. ¹¹ Nkango da muntu wa uhungami kwakara yira mukuro wa kupupa mema ghaliparu, ano ngoli nkango dava diniKarunga kwa horeka urunde. ¹² Makunyengo kuyita dimutangu na virwana, ano ngoli shihoro kuhoreka ma udona ghamangi. ¹³ Nkene wa kara na ukonentu ngava umona munkango dakutunda mukanwa koye, ano ngoli mburo ya kutoghonita vantu vavagova. ¹⁴ Vantu va ukonentu ku kuronga vakare na ndunge dadiyingi unene, ano ngoli vantu va ugova nkene ava ghamba kuyita udito uye papepi. ¹⁵ Limona kuvatera muntu wa ungavo akare mushitata sha untungi; ntani ruhepo kudjonaura vantu vavahepwe. ¹⁶ Mfuto ya vantu vakuruwana uhunga ne kuyita monyo; ano ngoli mfuto ya vantu va kuruwana urunde kukutwara ku ndjo. ¹⁷ Nkene aghu tambura marongo gha uhunga ngaghu wana ndjira ya liparu, ano ngoli nkene aghushwena kutambura marongo gha uhunga ove ngaghuka kombana. ¹⁸ Kehe uno wa kuhoreka nyengo mumutjima wendi ogho muna vimpempa, ano ngoli kehe uno wa kughamba lishwau, mugova. ¹⁹ Muntu wa makurughamba, kuyita lidjonauko, ano ngoli muntu wa uhungami kuteda unene mposhi aghambe nkango da uhunga. ²⁰ Nkango da muntu wa muhungami kwa kara yira Siliveli yene-yene; maghayaro ghamuntu wa murunde kapi akara namutompo. ²¹ Nkango da kutunda mukanwa kamuntu wa muhungami kukwafa vantu vavangi, ano ngoli ugova kuvhura ukudipayite na umoye. ²² Nkene Hompa aku tungiki na ma ushwi ghamangi nga ukara na limona lya linene ntani kapi ngaghukara na kukuvera kwa kehe vino. ²³ Vantu va urunde kuhafa unene nkene vana ruwana ukorokotji, ano ngoli vantu va ndunge kushana kehe pano vayive ukonentu. ²⁴ Vantu vava hungami kuwana kehe pano ovyo vana hepa, ano ngoli vadini Karunga kuwana kehe pano ovyo vatjira unene. ²⁵ Vantu va urunde kwa fana yira kakundu-kundu kakuyunga unene kana kupito, ka kadongonoke, ano ngoli ngoli vantu va uhungami kwa kara yira litungo lya kukarererapo. ²⁶ Nakadidishi nga utume muntu wa udwa aku ruwanene, ghuye kwa fana yira vinyu ya ururu vana tura muliyegho lyoye likare uhe unene ntani vavo kwa fana yira muti una ngeno mumantjo ghoye ghuyuvhe kukora. ²⁷ Nkene aghu limburuka kwa Hompa ngaghu paruka shirugho shashire shaliparu, ano ngoli vadini Karunga kuparuka shirugho shashifupi shaliparu. ²⁸ Nkene aghukara na lihuguvaro mwa Hompa ngaghukara na ruhafo, ano ngoli vani Karunga kapi vakara na meho. ²⁹ Hompa kupopera vantu va uhungami, ntani ghuye kudjonaurapo vadini Karunga. ³⁰ Vantu va uhungami ngava tunga na ukanguki mushirongo, ano ngoli vadini Karunga kwato ogho ngahupomo mushirongo. ³¹ Mukanwa ka vantu va uhungami kutundamo nkango da ukonentu, ano ngoli mukanwa kakughamba udona ngaka shayapo. ³² Vantu va uhungami vayiva uhungami na ushili, ano ngoli vadini Karunga, vayiva kughamba vya kutjutjupita kumutjima.