¹ Joshua nko kupongeka marudi naghantje gha vaIsraeli paShekemu kumwe nakuyita vakughona vaIsraeli, vampititi, vapanguli, navayenditi, ngoli nko kuvatura kumeho yaKarunga. ² Joshua atantere mbunga nayintje, ''Ovino Karunga, Karunga waIsraeli, mbyo ana kughamba, 'Vanyakulyenu kwatungire mushelimunya yantere damukuro wa Eufurata- Tera, vashe vaAbirahamu na vashe vaNahoro- ngoli kavakandereranga vakarunga vapeke. ³ Mbyo naghupa vanyakulyenu mushili yaEufurata nakuvatwara mushirongo shaKanani mukuvapa vana vavangi vatundo mwamo navo wa mukafumu Isaka. ⁴ Makura Isaka ayita Jakopo na Esau. Anitapa kwa Esau shirongo shandundu Seyire ashitunge, ngoli Jakopo na vana vendi avaghurumuka vayende kuEgipute. ⁵ Anitumu Mosesa na Aroni, kumwe nakuhepeka vaEgipute na mahepeko. Kutunda opo, mbyo namuyita mutunde mo. ⁶ Naghupa vanyakulyenu vatunde muEgipute, nakuya kulifuta. VaEgipute avavashupura natutemba twavita kumwe na varondi tukambe dogoro kulifuta lya mbu. ⁷ Opo vatakumine vanyakulyenu kwa Karunga, aturamundema pakatji kenu na vaEgipute. Arenki lifuta limbanduke na kuvafika. Mwavikenga ovyo naruwanine kuvaEgipute. Makura amutungu ngoi mumburundu mwaka dadingi. ⁸ Mbyo namuyita mushirongo shavaAmori, ovo vatungo musheli munya ya Jorodani. Vavo kwarwanine nanwe, ngoli anivatapa mumaghoko ghenu. Amughupu imona olyo lyakaliro mushirongo shavo, nakuvadjonaura kumeho yenu. ⁹ Makura Balaka mona wa mukafumu wa Zipora, hompa wa Amowaba, ashapuka kumwe nakuhama vaIsraeli. Atumini nakukayita Balama mona wa mukafumu wa Beyora, mukuyafinga. ¹⁰ Ngoli kapi nateghelire kwa Balamu. Murupe oro, ghuye kwamutungikire. Mbyo namuyogholire mumaghoko ghavo. ¹¹ Mwavindakanine Jorodani nakuya muJeriko. Vampititi va Jeriko kwamuruwanitire, kumwe na vaAmori, vaperesi, vaKanani vaHiti, vaGirigashi, vaHiti kumwe na Jebusi. Ame kwatapa lifundo muvafunde nakuvatura mulipangero lyenu. ¹² Ame kwatumine magculi kumeho yenu, mukuvatjida kumwe na vahompa vaviri va vaAmori vatundeko kumeho yenu. Kapi vyashorokire vino mukonda yarufuro rwenu ndi mukonda yaghuta wa nkandja. ¹³ Ame kwamupa shirongo osho mwadira kuruwanena na nkurumbara odo mwadira kutunga, ngoweno mo munatungu. Anwe kuna kulya nyango damuvikunino vya mandjembere na vikunino vya maghuywe ovyo mwadira kutapeka. ¹⁴ Ngoweno tjirenu Karunga nakumukanderera muushiri naghuntje na muhungami; kukungenu ku vakarunga vavipempa ovo kavakandereranga vanyakulyenu musheli muya ya Eufurata na muEgipute, ngoli kandererenu Karunga. ¹⁵ Ntjeneshi kumoneka mushikenga mantjo ghoye lipuko mukukanderera Karunga, kuvhura akare karunga wavipempa ogho kavakandreranga vanyakulyenu musheli munya ya Eufurate, ndi karunga wa Amori, ovo mwatunga navo mushirongo. Ngoli yira ame na lipata lyande, ngatutongamena Karunga.'' ¹⁶ Mbunga ayilimburura nakughamba, ''Kapi ngatushuva Karunga tukakarere vakarunga peke, ¹⁷ mukondashi Hompa Karunga ndje atughupa na vanyakulyetu tutunde mushirongo sha Egipute, tutunde mundjugho ya ghupika, nakuruwana vitetu vyavinene mushikenga mantjo ghetu, nakutukunga ndjira yetu nayintje oyo twayenda, namudimuhoko nadintje odo omo twapita. ¹⁸ Ngoli Karunga kwavatjida vantu navantje kumeho yetu, kuturako na vaAmori ovo vatungo mushirongo. Ngoweyo natwe nka ngatutongamena Karunga, mukondashi ghuye ndje Karunga wetu.'' ¹⁹ Ngoli Joshua atantere mbunga, ''Kapi ngamukarera Karunga, mukondashi ghuye ne Karunga mupongoki; Karunga walifupa; kapi ngamughupirapo kghuture ndjo weno na ndjo denu. ²⁰ Ntjene ngamushuva Karunga nakukatongamena vakarunga va vantundwavirongo, makura ghuye ngamupirukira mughongo ngamuruwane vyavidona, ghuye ngamuhanaura, nampiri moomo aruwana vyaviwa kukwenu.'' ²¹ Ngoli vantu avatantere Joshua, ''Hawe, atwe ngatutongamena Karunga.'' ²² Makura Joshua atantere mbunga, ''Anwe kuna kukutapera ghumbangi naumwenu ashi anwe kuna kutoghorora naumwenu Karunga, mukumutongamena.'' Avaghamba, ''Atwe naumwetu vambangi.'' ²³ ''Ngoli kaghupenu mo vakarunga va vantundwavirongo ovo munakara navo, nakupirura mutjima denu kwa Karunga, Karunga wa Israeli.'' ²⁴ Mbunga ayitantere Joshua, ''Atwe ngatutongamena Hompa Karunga wetu. Ngatutegherera kuliywi lyendi.'' ²⁵ Joshua atura likukwatakano na mbunga iyuva olyo. Atura palivango veta na dimuragho paShekemu. ²⁶ Joshua atjanga nkango odo damumbapira ya dimuragho da Karunga. Aghupu liwe lyalinene nakulitura munda ya shitondo shaunyandi osho shakaliro pepi na shidjambero sha Karunga. ²⁷ Joshua atantere mbunga nayintje, ''Kengenu, liwe ino ngalikara mbangi kukwenu. Linayuvhu nkango nadintje odo ana ghamba Karunga kukwetu. Ngalikara mbangi kukwetu, mukukashwena Karunga ghoye.'' ²⁸ Makura Joshua atumu mbunga yiyende, kehe uno kushirongo shendi. ²⁹ Kutunda opo Joshua mona wa mukafumu wa Nunu, mukareli wa Karunga, afu, kuno mwaka 110. ³⁰ Avamuvhumbike kumururani wa shirongo shendi shaghupingwa, paTimana Sera, osho shakaliro shirongo shandundu muEfurayimu, kumukuro wa ndundu ya Gayasha. ³¹ Israeli kavatongamenanga Karunga mumayuva naghantje gha Joshua, na mumayuva naghantje ghavayenditi ovo vakairoko kuruku rwa Joshua, ovo vamonino viruwana navintje vya Karunga ovyo aruwanine vaIsraeli. ³² Vfupa vyaJosefu, ovyo vashimbire mbunga yaIsraeli kutunda muEgipute- Avavivhumbiki paShekemu, muruha rwa shirongo oro aghulire Jakopo kuvana va vakafumu vaHamoro,vashe va vaShekemu. Kwarughulire na vincencere vya shilivelu lifere limwe, makura alikara mupingwa wa shirongo sha vana vaJosefu. ³³ Eleyazara mona wa mukafumu wa Aroni naye afu. Avamuvhumbiki pa Gibeya, nkurumbara yaPinehasi monendi wa mukafumu, oyo vamupire. Yayo kwakalire mushirongo shandundu sha Efurayimu.