¹ Munyima ya ruvede, Naboti muJeserelite kwakalire nashipata sha vhinyu muJeserelite, pepi na livango lya Ahab, hompa wa Samaria. ² Ahab atantere Naboti, nakughamba shi, ''Mpe shipata shoye sha mandjembere, mposhi ame nishiture shikare shiapata shavikwa lividi, mukondashi shasho pepi namundi wande. Pantjinto, ame nganikupa shipata sha mandjembere sha hashako, ndipo, nange shikuvhura, ame ngani kufuta kutwara pamulyo washo mumaliva.'' ³ Naboti alimburura kwa Ahab, ''Karunga antjweneka mukutapa uno upingwa wa vanyakulyande koye.'' ⁴ Makura Ahab akayenda mumbara yendi ghuye anaguvarara nakughupya mukonda ya lilimbururo olyo Naboti muJeserelite amupire apa aghambire, ''Ame kapi nganikupa upingwa wa vanyakulyande.'' Ghuye kwakalire paghuro wendi, kutungwira kunya shipara shendi, nakushwena kulya kehe dino ndya. ⁵ Jesebeli mukamali wendi kwamuyelilire nakughamba kukwendi, ''Konda munke mutjima ghoye unaguvire, ghudire kulya ndya?'' ⁶ Ghuye alimburura kukwendi, ''Ame kunatantere Naboti muJeserelite nakughamba kukwendi, 'Mpe shipata shoye sha vhinyu pa shimaiva, ndipo nangeshi unavipanda, ame nganikupa shipata shimwe sha vhinyu ngashikare shoye.' Ano ghuye mpo ana limburura shi, 'Ame kapi nikupa shipata shande sha vhinyu.''' ⁷ Makura Jesebeli mukamali wendi alimburura kwendi, ''Nani kapishi ve shimpe una kupangero untungi wa Israeli? Rambuka ghulye; hafita mutjima ghoye. Ame kunikukwatera shipata sha Nobati wa muJeserelite.'' ⁸ Makura Jesebeli atjangere ntjwangwatumwa mulidina lya Ahab, adirayimine na rayima dendi, nakuditumina kumatimbi na kumarenga ogho kaghashungirango kumwe naye muvigongi , ntani nava vatungiro papepi na Naboti. ⁹ Ghuye kwatjangire muntjangwatumwa , nakughamba, ''Yiyirenu wangu-wangu nakuyashingidika Naboti kumeho yambunga. ¹⁰ Nka turenu mbangi davipempa mbiri kumeho naye mposhi ditape ghumbangi wa vimpempa wa kudimuvyuka, unakutanto, 'Ove unashwauro Karunga na hompa.''' Mposhi mumupiture nakukamupondeka namawe. ¹¹ Makura vantu vamumbara, matimbi na vakamakuto ava vatungiro mbara ya vaNaboti, varuwanine shika moomo avifwatulire Jesebelikukwavo, shika moomo vavitjangire muntjangwatumwa edi vavatuminine. ¹² Vavo avayiyiyire lidiliro na lishungidiko Naboti kumeho ya vantu. ¹³ Vakafumu vaviri vavimpempa avayamo nakuvashungidika kumeho ya Naboti; vavo kwatapire ghumbangi wakudivyuka Naboti kumeho ya mbunga, nakughamba, ''Naboti ashwaura Karunga na hompa.'' Vavo avamurupwita mo mumbara nakumudipagha na mawe. ¹⁴ Makura matimbi aghatumu mbudi Jesebeli nakughamba shi, ''Naboti vanamufayaura anafu. ¹⁵ Makura opo Jesebeli ayuvhire ashi Naboti vanamufayaura nka kafu, ghuye aghamba kwa Ahab, '''Shapuka unankondo wa shipata sha vhinyu sha Naboti muJeserelite, osho akushwenikire kukupa pashimaliva, kondashi Naboti weno kapishi munamwenyo, ngoli anafu.'' ¹⁶ Opo Ahab ayuvhire ashi Naboti kafu, ashapuka na kukunkumuka kushipata sha Naboti muJeserelite nakughupa unankondo washo. ¹⁷ Ano nkango yaKarunga ayiya kwa Elaija mu Tishibite, nakughamba, ¹⁸ ''Shapuka ukagwanekere na Ahab hompa waIsraeli, ogho atungo muSamaria. Ghuye mpwali mushipara sha vhinyu sha Naboti, oko anayendi akaghupe ghumwene washo. ¹⁹ Ove unahepa kukamutantera nakukaghamb ashi, Karunga kuna kughamba shi, 'Ove unadipagha nka una ghupu unankondo washo?' Ano ove ngaukamutantere asi Karunga kuna ghamba shi, 'Mulivango omo mbwa daratire honde ya Naboti, mo mbwa ngadirata honde yoye, nhii, honde yoye.''' ²⁰ Ahab aghamba kwa Elaija, ''Unayangwana, munankore wande? '' Elaija alimburura, ''Nayakuwana, mukondashi unakughulita naumoye pakuruwana udona mumantjo gha Karunga. ²¹ Karunga kuna kughamba vino: 'Mona, ame ngani yita matengeko papoye ntani ngani vitikitamo ntani nganitetako koye kehe mwanuke wa mumati na mupika na mumanguruki muIsraeli. ²² Ame nganiruwana likoro lyoye shika likoro lya Jeroboyamu mona wa mukafumu wa Nebati, ntani shika likoro lya Basha mona wa mukafumu wa Ahija, mukondashi unandjuvita kukora nka unapititiri Israeli kundjo.' ²³ Karunga kwantantilire waro Jesebeli, nakughamba shi, ''Mbwa ngadilyera Jesebeli kuntere ya likuma lyaJesereli.' ²⁴ Kehe uno ogho ahameno kwa Ahab nakufera mumbara, mbwa ngadilya; ntani vidira vyakuwiru ngavilya kehe uno ngakafero muwiya.'' ²⁵ Kwato mpiri ndi ghumwe wakufana yira Ahab, kehe uno akughulitiro naumwendi pakuruwana udona mumantjo gha Karunga, ogho Jesebeli mukamali amutwalidiro kundjo. ²⁶ Ahab kwaruwana ndjo da wina pakukwama vintjwantjwe, shika moomo kaviruwanga vaAmorite, ovo Karunga atjidire kumeho ya vantu vaIsraeli. ²⁷ Opo Ahab wayuvhire nkango dino, Atavaghura vikoverero vyendi nakukuyambera ntjako parutu rwendi nakudililira, ntani kwaralire muntjako ya vyuma nakuguvarara unene. ²⁸ Makura nkango ya Karunga ayiya kwa Elaija muTishibite, nakughamba, ²⁹ ''Una mono omo Ahab ana kukudidipita mwene kumeho yande? Mukonda ghuye kuna kukudidipita kumeho yande, ame kapi nganiyita maudito munyuku dendi; ngavikara munyuku da monendi mpo nganiyita maudito palipata lyendi.''