¹ Beni-Hadadi hompa wa Aram apongayiki vakavita vendi navantje. Kwakalire vahompa va vasheshu dimurongo ntatu na mbiri kumwe naye, natukambe na tukarukara. ² Ayendi akanduke, nakukafaneka Samaria kumwe nakukayirwanita. Atumu vatwali mbudi munkurumbara kwa Ahab hompa waIsraeli, nakughamba kukwendi shi, ''Beni-Hadadi kunaghamba ashi: ³ 'Shiliveli doye na ngorodo doye ne vyande. Ntani navakamali voye na vana, vanya vakuhovopo, weno vande.''' ⁴ Hompa wa Israeli alimburura nakughamba shi, ''Yira moomo una ghamba, muhona wande, hompa. Ame na navantje evi nakara navyo vyoye.'' ⁵ Mutwali mbudi aya nka na kuyaghamba shi, ''Beni-Hadadi kunaghamba vino, 'Natumine nkango kukoye da kughamba shi unakona kumpa shiliveli doye, ngorodo doye, vakamali voye, ntani vana voye. ⁶ Ano ngoli nganituma vapika vande koye yona ruvede yira ndoruno, vavo ngavayafukunya ndjugho yoye na ndjugho da vapika voye. Ngavanyangura na maghoko ghanaumwavo nakuvaghupa kehe vino vya kuhafita mantjo ghavo.''' ⁷ Makura hompa wa Israeli ayita vakondi navantje vamushirongo kumwe nakughamba shi, ''Nakanderere vangarenu nakukenga ashi weni uno murwana omo anakushana udito. Anatumu nkango kwande mundjira yakughupa vakamali vande, vanuke, ntani ngorodo na Shiliveli, ntani kapi namushwenine.'' ⁸ Vakurona navantje na vantu navantje avaghamba kwa Ahab, ''Washategherera kukwendi ndi ghumupilitire kulirawiro lyendi.'' ⁹ Makura Ahab aghamba kwa mutwali mbudi wa Beni-Hadadi, ''Tantera muhona wande hompa shi, 'Napura kwa kehe vino evi ghunatumu mupika ghoye ayaruwane shikando shakuhova, ngoli kapi nitambure lino lirawiro lyauviri.''' Makura mutwali mbudi akayenda nakutwara mbudi yinya kwa Beni-Hadadi. ¹⁰ Ano Beni-Hadadi atumu lilimbururo lyendi kwa Ahad, aghamba shi, ''Karunga aruwane ngoli kukwande ntani vyaviyingi nka, nampili ndi mutwitwi wa Samaria ngaghugwana kuvantu navantje ava vankwamo mukukawanako lighoko kehe uno.'' ¹¹ Hompa waIsraeli alimburura nakughamba shi, Tantera Beni-Hadadi, 'Kwato ghumwe ogho anakudwato tupu vyuma vyendi vyakurwita, ghukupandayike yira kwavishutulire.''' ¹² Beni-Hadadi ayuvhire mbudi yinya apa anwine, ndje ntani na vahompa vamunda yendi ava vakaliro mumatende ghavo. Beni-Hadadi arawiri vakafumu vendi, ''Kuyarenu naumwenu pamavango mukukarwana.'' Makura avakuwapayiki naumwavo pamavango gha kurwa mukuhomona nkurumbara. ¹³ Ngoli tatererenu, muporofete aya kwa Ahab hompa wa Israeli nakughamba shi, ''Yehova kuna kughambashi, ''Wamona rumwe vakavita vavawa? Kenga, kunivitura mumaghoko ghoye namuntji ntani muyivashi ame Yehova.''' ¹⁴ Ahab alimburura, ''Mware?'' Yehova alimburura shi, ''Mwamuporosi wa mwanuke ogho akarero nguuru wa mumudingonoko.'' Makura Ahab aghambashi, ''Are atameko vita?'' Yehova alimburura, ''Ove.'' ¹⁵ Makura Ahab akevererepo muporosi wa mwanuke ogho akaliro nguuru wa mudingonoko. shivaro shavo kwakalire vantu mafere maviri na dimurongo mbiri na mbiri. Mbo akevelire vakavita navantje, vakavita navantje vaIsraeli; mafere hambombili mushivaru. ¹⁶ Kwarupukire vayende pametaha. Ben-Hadadi kwakunwitire mwene akorwe mutende yendi, ndje ntani na vahompa dimurongo ntatu na mbiri va vasheshu ava vamukwatitiroko. ¹⁷ Muporosi wa mwanuke ogho akaliro mguuru wa dimudingonokoapiti kumeho wakuhova. Makura Beni-Hadadi kwamutantilire kwa varwi ava atumine vayende, ''Vakafumu kunakurupuka vatunde muSamaria.'' ¹⁸ Beni-Hadadi aghamba shi, ''Vakareshi kunaya mumpora ndipo kuvita, vakwatenu namonyo.'' ¹⁹ Makura muporosi wa mwanuke ogho akaliro nguuru wa dimudingonoko arupuka mo munkurumbara navakavita avamukwama. ²⁰ Kehe uno muntu adipaghire ogho akurumbatanine naye. VaArami avaduka ano vaIsraeli avava rambarara. Beni-Hadadi hompa wa Aram ashenduka pa kakambe rambangako kumwe na vakafumu vatukambe. ²¹ Makura hompa waIsraeli arupuka ayende akahomone tukambe na tukarukara, nakudipagha vaArami mulidipagho lyaliwa. ²² Makura vaporofete avaya kwa hompa avaghamba kukwendi shi, ''Kayende, kakupameke naumoye, nakukwata lighano nakutura lighano kwevi unakuruwana, mukondashi muruku rwa mwaka hompa waAram ngapaya po likulimbo nove.'' ²³ Vapika vahompa waAram aghamba kwendi, ''Karunga wavo karunga wa mandundu. Ovyo mbyo vyakaliro nankondo yira mo twakalire. Ngoli weno renkenu tuvarwanite mukuvyukilira, ushili-shili ngatukara na nkondo kuvapitakana. ²⁴ Makura unkona kuruwana vino: Tunditako vahompa navantje pamavango ghavo gha umpangera nakukavatura na vakondi vavakavita. ²⁵ Yerurapo mukavita yira mukavita wakombanita- tukambe na tukambe ntani karukara na karukara- mposhi tuvarwanite mughukenu. Makura muushili ngatukara naunankondo kuvapitakana.'' Beni-Hadadi ateghelire kumapukururo ghavo nakuruwana evi vavapukulire. ²⁶ Kunyima yalitameko lyamwaka waupe, Beni-Hadadi akwatakanita vaArami nakuyenda vakanduke kuAfeki mukurwanita Israeli. ²⁷ Vantu vaIsraeli kwa vakwanitire nakuvatapa vavarwanite. Vantu vaIsraei kwavaralilire shitanda yira vindjwi vya vyanuke vivili vya ndjwi, ngoli vaArami kwagwanikidire ruha rwa shirongo. ²⁸ Makura muntu waKarunga aya pepi nakuyaghamba na Hompa waIsraeli aghamba shi, ''Yehova kuna kughamba shi: 'Mukonda vaArami kwaghamba ashi Yehova ndje Karunga wa mandundu, ngoli kapishi Karunga wa mapompora, nganitura vano vakavita vavawa mulighoko lyoye, ntani ngaghuyiva shi ame Yehova.''' ²⁹ Mpo vakavita avaralire shitanda mulikuvyuko lyaghumwe naunyendi mayuva hambo mbali. Vantu vaIsraeli avadipagha vaArami 100,000 vaparupadi muliyuva limwe. ³⁰ Vakuhupako avadukiri kuAfeki, munkurumbara, ntani likuma aliwere pa vakafumu mayovi dimurongo mbili na mbili ava vahupiropo. Beni-Hadadi aduka nakuyenda munkurumbara, munkondo ya munda. ³¹ Vapika vaBeni-Hadadi avaghamba kukwande, ''Kenga weno, twayuva shi vahompa vandjugho da Israeli vahompa vankenda. Nakanderere renka tuture ntjako ya vyuma kudingilika mbunga detu na marughodi kudingilika dimutwe detu, nakurupuka tuyende kuhompa waIsraeli. Kuvhura walye akushuve ghuyumi.'' ³² Mposhi vakature ntjako ya vyuma mu mbunda davo na marughodi kudingilika dimutwe davo makura ayendi kwa hompa waIsraeli akaghamba shi, ''Mukareli ghye Beni-Hadadi kwaghamba shi, 'Nakanderere ndenke niparuke.''' Ahab aghamba, ''Shimpe muyumi ndi? Oghunya mukurwande wa mukafumu.'' ³³ Weno mukafumu kwateghelire kukehe shineghedito kutunda kwa Ahab, makura ava mulimburura wangu-wangu, ''Nhii, mukuroye wa mukafumu Ben-Hadadi na monyo wendi.'' Makura Ahab aghamba, ''Kayende ghukamuyite.'' Makura Beni-Hadadi aya kukwendi, ntani Ahab amuyuvhu nakuya mukarukara kendi. ³⁴ Beni-Hadadi aghamba kwa Ahab, ''Ngani wapayika nakukuvyutira nkurumbara odo vaghupire vavava kuvasho, ntani ngaghutura vitanda vya naumoye muDamascus, yira moomo varuwanine vavava muSamaria.'' Ahab alimburura, ''Nganikurenka ghuyende nalikukwatakano lino.'' Ano Ahab atura likukwatakano naye makura amushuvhu akayende. ³⁵ Mukafumu ghumwe, ghumwe wa vana vavaporofete wa vakafumu, aghamba kughumwe wa vaporofete vaunyendi kunkango ya Yehova, ''Nakanderere ntoghone.'' Ngoli mukafumu ashwena kumutoghona. ³⁶ Makura muporofete aghamba kuvaporofete vaunyendi, ''Mukondashi kapi walimburukwa ku nkango ya Yehova, apa tupu antjuva, nyime kwakudipagha.'' Mpopa tupu amushuvire unya mukafumu, nyime aya papendi nakumudipagha. ³⁷ Makura vaporofete avawana mukafumu ghumwe avaghamba, ''Nakanderere ntoghone.'' Makura mukafumu amutoghona amuremeke. ³⁸ Makura muporofete akayenda nakukategherera hompa kushitaghura; akunyate naumwendi na shiferebanti kumantjo ghendi. ³⁹ Apa tupu apitire hompa, muporofete aliliri kwa hompa aghamba shi, ''Mupika ghoye anatundu mu upyu wa vita, makura mukavita mbyo ana muyimiki mbyo anayita mukafumu kwande mbyo anaghamba shi, 'Kengera uno muntu. Nange mwakehe vino vitanta akombane, monyo ghoye kughutapa mu monyo wendi, ndi unakona kufuta ushwi wa shiliveli.' ⁴⁰ Ano mukonda mukareli ghoye kunakara na viviyaghuka vyakuyenda napa napanya, muntu mbyo ana hene.'' Makura hompa waIsraeli aghamba kukwendi shi, ''Elino ndyo litengeko lyoye- ove naghumoye naumoye unalitokoro.'' ⁴¹ Makura muporofete wangu-wangu akughu ferebanti lintjo lyendi, hompa waIsraeli adimburura shi ghuye kwakalire ghumwe wa vaporofete. ⁴² Vaporofete kwa ghambire kwa hompa, ''Yehova kuna ghamba ashi, 'Mukonda munashuvu akayende kutunda mumaghoko ghenu muntu ogho natokwere ku mfa, maparu ghenu kughaupa livango lya liparu lyendi, ntani vantu venu mwa vantu vendi.''' ⁴³ Mpo hompa wa Israeli ayendire kundjugho yendi pashirugho ntjoshinya naugara, nakukatika muSamaria.