¹ Ahab atantere Jezebeli navintje evi aruwana Elaija ntani weni omo adipaghire vaporofete navantje na rufuro. ² Makura Jezebeli atumu mbudi kwa Elaija, yakughamba ashi, ''Ano Karunga kuvhura aruwne kwande, ntani vyavingi nka, nange kapi nitura liparu lyoye yira maparu gha ghumwe wovanya vaporofete vakufa payona yira kuruvede ndoruno.'' ³ Apa Elaija ayuvhire vinya, Ashapuka nakuduka apopere monyo wendi nakuya kuBerisheba, oyo yahamino kuJuda, nakushuva vapika vendi nkoko. ⁴ Ngoli ghuye mwene kwayendire ruyendo rwa liyuva nalintje mumundema, aya nakuyashungira munda yashitondo sha shikwelito. Arombere mfa da naumwendi ashi ndi afe, nakughamba ashi, ''Makura ngoli, weno, Karunga; ghupa monyo wande, mpo ame kapi nakara hasha kupitakana vadimu vande ava vafo.'' ⁵ Makura asheghumuka nakurara munda yashitondo sha shikwelito. Kadidi tupu muengeli amukwata nakughamba kukwendi shi, ''Shapuka nakulya.'' ⁶ Elaija akenge, pepi namutwe wendi kwakalireko mboroto eyi vakangire pamakara ntani na mema mukandimbe. Mpo alyire na kunwa makura araranka. ⁷ Muengeli waKarunga akaya nka rukando rwauviri amugumu nakughamba ashi, ''Rambuka ghulye mbyevishi ndjira kuyikra yayire unene koye.'' ⁸ Mpo arambukire ghalyi na kunwa, ayendi mukonda yandodinya ndya mayuva dimurongo ne na matiku dimurongo ne kuHoreb, ndundu ya Karunga. ⁹ Ayendi mulikwina nkokunya nakukakara mwalyo. Makura nkango yaKarunga ayiya kwendi nakughamba kukwendi, ''Vinke unakuruwana po pano, Elaija?'' ¹⁰ Elaija alimburura, ''Nakara nankondo kwa Karunga, Karunga waviturwapo, mukondashi vantu vaIsraeli vanashuvilili likukwatakano lyoye, vanadjonaura vidjambero vyoye, nakudipagha vaporofete voye na rufuro. Weno me, ame pantjande, nahupopo ngoli nakushetayika vaghupe monyo wande.'' ¹¹ Karunga alimburura, ''Rupuka ghuyende ghukayimane pandundu kumeho yande.'' Makura Karunga apiti, mpepo nayintje yankondo ayitavaghura ndundu nakuvaghura mawe mughufefere kumeho ya Karunga, ngoli kapi akaliremo mumpepo. Ano kuruku yampepo, likanko lya livhu aliya, ngoli Karunga kapi akalire mulikanko lya livhu. ¹² Kuruku rwa likanko lya livhu mundiro aghuya, ngoli Karunga kapi akaliremo mumundiro. Kuruku ya mundiro, liywi lyaididi aliya. ¹³ Apa ayuvhire Elaija liywi, akufiki kushipara shendi nashikeshe, arupuka, nakukayimana pamangeneno ghaliwe. Makura liywi aliya kwendi eli lyaghambiro shi, ''Vinke una kuruwana mo muno, Elaija?'' ¹⁴ Elaija alimburura, ''Nakara ghupampi kwa Karunga, Karunga waviturwapo, mukondashi vantu vaIsraeli vanashuvilili likukwatakano lyoye, vanadjonaura vidjambero vyoye, ntani vadipagha vaporofete voye narufuro. Weno ame, ame tupu, nahupopo ntani vavo nka nakushetayika vaghupe monyo wande.'' ¹⁵ Makura Karunga aghamba kukwendi, ''Kayende, vyuka mundjira yoye mumandundu gha Damascs, ano apa ghukatika kuukatungika Hazaeli mukukara hompa wa vaAram, ¹⁶ ntani nka kuukatungika Jehu mona Nimshi wa mukafumu mukukara hompa wa vaIsraeli, ntani kuukatungika Elisha mona Shafet wa mukafumu waAbeli Mehola mukukara muporofete mulivango lyoye. ¹⁷ Ngavishorokashi Jehu ngadipagha kehe uno ngashenduko kurufuro rwa Hazaeli, ntani Elisha ngadiagha kehe uno ngashenduko kurufuro rwa Jehu. ¹⁸ Ano ngoli nganikushiviramo naumwande vantu mayovi matano na mavili muIsraeli, ava vangoro davo kapi da tongamenanga ku vikarunga vavipempa, ntani ava tunwa twavo kapi vamuncumita.'' ¹⁹ Mpo Elaija atundirepo kutunda panya nakukawana Elisha mona Shafet wa mukafumu, ogho apurwiro na joko ya hove kumeho yendi, ghuye naumwendi kwapurulire najoko murongo na mbiri. Elaija ayendi kwa Elisha nakukamudekerekeda. ²⁰ Makura Elisha ashuvu ntwedu nakudukira Elaija; aghamba, ''Nakanderere tanko nincumite vavava na vanane, ano ntani nikukwama.'' Makura Elaija aghamba kukwendi, ''Vyuka, ngoli kaghayare kuhamena evi naruwana kukoye.'' ²¹ Makura Elisha akavyuka kwa Elaija aghupu joko ya ngombe, adipagha vikorama, atereke nyama navikuni vya joko. Makura ayitapa kuvantu avalyi. Makura avashapuka, akwama Elaija nakumukarera.