¹ Makura kuruku rwa mayuva ghamangi nkango da Karunga adiya kwa Elaija, mumwaka wautatu warukukutu, kuna kughamba, ''Kayende, ghukakuneghede naumoye kwa Ahab makura ngani tuma mvhura mushirongo.'' ² Elaija ayendi akakuneghede mwene kwa Ahab, ano kwakalire lirumbu lya linene muSamaria. ³ Ahab ayita Obadiah, ogho akaliro mulikengero lya mbara. Weno Obadiah afumadekire Karunga unene, ⁴ okuno Jezebel kadipaghanga vaporofete vaKarunga, Obadiah aghupu vaporofete lifere makura akavahoreka mutumbangu dimurongo ntano mumakwina nakavapanga mboroto na mema. ⁵ Ahab atantere Obadiah, ''Yendaura mushirongo oko kwakaro mema na kumakora. Pamwe ngatuwanako mushoni ngatupopere maparu gha tukamba na vidongi, mposhi kapishi ngatukombanite vikorama navintje. ⁶ Mposhi ngavagaunune livhu mukatji ngavipitirangemo na kushana kumema. Ahab ayendi ndjira yimwe pentjendi ntani Obadiah ayendi ndjira yimweyapo. ⁷ Ghuye Obadiah mundjira yendi, Elaija amukutuntiki kukugwanekera naye. Obadiah amudimburura anyongeke shipara shendi mulivhu. Aghamba ashi. ''Ove uno, muhona wande Elaija ndi?'' ⁸ Elaija amulimburura ashi, ''Nhii ame. Kayende ghukatantere muhona ghoye, 'Kenga, Elaija mpwali muno.''' ⁹ Obadiah alimburura ashi, ''Weni omo nadjona, omo ngautapa vapika voye mumaghoko gha Ahab, ghuye ngandipaghe? ¹⁰ Yira muliparu lya hompa Karunga ghoye, kwato shirugho ndi muhoko oko muhona wande adira kutuma vakafumu vakakuwane. Kehe pano shirongo na dimuhoko kughamba ashi Elaija mwato muno.' Ahab kuvatantera vaghupe muhona wa ushiri ashi kapi vanakukuwana. ¹¹ Shimpenka weno kuna kughamba ashi nikutantere hompa ashi Elaija mpwali. ¹² Pashirugho tupu shashididi opo tukugaunuka nove, mpepo ya Karunga kuyikushimba yikutware kumavango ghamwe nadira kuyiva. Makura opo niyenda nikatantere Ahab opo ayadira kukukwanapo, ayandipaghe. Weno ame muvereki ghoye kwakareranga Karunga kutunda ghudinkantu wande. ¹³ Kapi vavikutantera shimpe, hompa wande ovyo naruwana opo adipaghire Ezakiyeli vaporofete va Karunga, amo nahorekire vaporofete vaKarunga lifere mukuvahangura mutumbunga dimurongo ntano mumakwina nakuvapa mboroto na mema? ¹⁴ Weno kuna kuntantera ashi niyende nukatantere muhona wande ashi mpouli, makura akandipaghe. ¹⁵ Makura Elaija amulimburura ashi, ''Moomu Karunga muturwapo wa maparu, kumeho yoye nayimana, nakara naushiri ashi kunikuneya naumwande kwa Ahab namuntji. ¹⁶ Makura Obadiah ayendi akakugwanekere na Ahab akamutantere ovyo amutantilire Elaija. ¹⁷ Opo amonine Ahab Elaija, aghamba kwendi, ''Ove uno? Ove wayitiro udito kuvaIsraeli!'' ¹⁸ Elaija alimburura ashi, ''Kapi nayitire udito kuvaIsraeli ngoli ove nalikoro lya vasho anwe mwayitiro udito mukushwena dimuragho da Karunga nakukwama vakarunga vavipempa. ¹⁹ Weno tuma mbudi nakuyaponga kwande vaIsraeli navantje kundundu ya Karimeli, kumwe na vaporofete mafere mane na dimurongo ntano (450) vavipemba ntani mafere mane vaporofete vaAshera ogho alyango patafura ya Jezebeli. ²⁰ Makura Ahab atumu mbudi kuvantu navantje vamuIsraeli, nakupongeka vaporofete kumwe kundundu ya Karimeli. ²¹ Elaija ashwena pepi kuvantu na kughamba ashi, ''Shirugho shakutika kuni nganitwikira kutjindja mughano wenu? Nange Jehova ndje Karunga mukwamenu. Vantu kapi vamulimbulire. ²² Makura Elaija aghamba kuvantu ashi, ''Ame, ame pantjande, nahupopo muporofete waKarunga ano vaporofete vavipempa mafere mane na dimurongo ntani va vakafumu. ²³ Makura varenke vatupe hove mbiri. Varenke vahoroghore hove yimwe naumwavo vayitete papadidi vayiture pavikuni, ano vashaturako mundiro munda yavyo. Makura kuniwapayika hove yimwe niyiture pavikuni, ano kwato mundiro ogho niturako kuntji. ²⁴ Makura kumuyita lidina lya Karunga wande, makura Karunga ogho alimbururo namundiro makura ndje akaro Karunga.'' Ano vantu navantje avalimburura ashi, ''Nhii ovyo mbyo vyaviwa.'' ²⁵ Makura Elaija atantere vaporofete vavipempa ashi, '''Horoghorenu hove yimwe yanaumwenu muhove nakuyiwapayika, mbyevishi muvayingi. Yitenu lidina lya Karunga wenu, ngoli mwashaturako mundiro kuntji yoyo hove. ²⁶ Avaghupu hove oyo vavapire avatameke kuyiwapayika avayita karunga wavo kutameka ngurangura dogoro nange metaha, nakughambanga ashi ''karunga wetu tuyuve.'' Ano kundereko liywi nampiri ndi ghumwe ogho alimbulire. Avadanene kushidjambero osho vatendire. ²⁷ Pametaha Elaija avashindi nakughamba ashi, ''Yyirenu unene! Ghuye ndje karunga! Pamwe kunakughayara, ndi nakukushorora naumwendi, ndi muruyendo anakara, ndi pamwe anarara anahepa kumurambwita.'' ²⁸ Makura avayiyiri unene avakutete vavene, yira moomo vaviruwananga, namafururo na maghonga dogoro honde ayipupu pamarutu ghavo. ²⁹ Opo wapita mutwe kuntji vavo shimpe nda vatanaukira dogoro ruvede rwakutapa ndjambo da ngurova, ano kundereko liywi nampiri ndi ghumwe ogho alimbulire, kwato ghumwe ogho apakeliro mbiri kulikukwambero lyavo. ³⁰ Makura Elaija ayita vantu navantje, ''Yiyenu pepi name,'' Ano vantu navantje avaya kwendi. Makura awapayiki shidjambero sha Karunga osho sharaliro mulidjonauko. ³¹ Elaija aghupu mawe ronambiri (12) mukehe liwe kwa kwateliremo rudi rumwe rwa mona Jacob- kwa Jacob nko yatundire mbudi yaKarunga, aghamba, ''Israeli ndyo ngalikaro lidina lyoye.'' ³² Nangogho mawe adiki shidjambero mulidina lya Karunga atimi likwina lyalinene kukundurukida shidjambero lyalinene livhure kugwaneka kushimba ntanga mbiri. ³³ Awapayiki vikuni vya mundiro, atete hove mumaruvambara, ano atura maruvambara gha hove pavikuni. Aghamba ashi, ''Yudenu nkinda ne da mema vaghatere pandjambo yakushora na pavikuni.'' ³⁴ Makura aghamba, ''Vivyukurukenu nka rwauviri,'' ano avavivyukuruka rwauviri. Shimpe nka aghamba, ''Vivyukurukenu rwautatu,'' avavivyukuruka rwautatu. ³⁵ Mema aghandandumukiri kushidjambero aghayura mulikwina. ³⁶ Kwashorokire paruvede rwakutapa ndjambo kungurova, muporofete Elaija ayapepi nakughamba ashi, ''Jehova, Karunga waAbraham, waIsac ntani waIsraeli, renka liyuva lino ashi ukarunga waIsraeli ame nimupika ghoye naruwana vininke navintje munkango doye. ³⁷ Ndjuve, Jehova, Ndjuve, ashi vano vantu vayive ashi ove, Jehova, ukarunga nka wapirura dimutjima davo divyuke nka koye. ³⁸ Makura mundiro waJehova aghuu, aghutwera kushidjambero waro nka navikuni, nakumawe na mbundu, na mema aghatundu mulikwina. ³⁹ Vantu navantje opo vavimonine avanyongeke vipara vyavo palivhu nakughamba ashi, ''Jehova ndje Karunga, Jehova ndje Karunga!'' ⁴⁰ Makura Elaija avatantere ashi, ''Ghupenu vaporofete vavipempa. Naumweshi wavo ogho avhuro kuhena.'' Ano avavaghupu Elaija ayita vaporofete vavipempa avavaghurumwita kumukuro wa Kishoni na kukavadipaghera nkoko. ⁴¹ Elaija atantere Ahab ashi, ''Shapuka, lya na kunwa, ogho ngo mushagharo wa mvhura yayinene.'' ⁴² Makura Ahab ayendi akalye na kunwa. Makura Elaija ayendi akanduka kuwiru yandundu yaKarimeli, anyongama palivhu shipara shendi ashitura mukatji kangoro dendi. ⁴³ Aghamba kuvapika vendi ashi, ''Shapukenu weno mukengere kulifuta.'' Vapika vendi avashapuka nakukengera kulifuta nakughamba ashi, ''Kendereko.'' Ano rukando ntambiri aghambire Elaija, ''Yendenuko nka shimpe.'' ⁴⁴ Rukando rwauntambiri vapika avaghamba ashi, ''kengenu, liremo linakutundiliro mulifuta, udidi walyo yira lighoko lya mukafumu.'' Elaija alimburura ashi, ''Shapukenu mukavighambe kwa Ahab, wapayikenu tukarukara twenu mughurumuke kumeho yimushayikite mvhura. ⁴⁵ Kwashorokire pakarugho kakadidi kuwiru akuya ushovagani na maremo na mpepo, ano akukara mvhura yayinene. Ahab arondo ayendi kuJezireli, ⁴⁶ ngoli lighoko lyaKarunga na Elaija lyakalire. Amanga rughodi muruvya rwendi adukili Ahab kulivero lyakungenena lya Jezireli.