¹ Kaha Yombi ua mukuaniene kaha ngueni, ² ''Naku lelo ciniengo cange cili na zimpata; livoko liange lia leme muomu ya muvindzo uange. ³ Eyo, kuze ange nji tantekeye kuze kunja hase ku mu uana! Eyo, kuze nja hase kuize kumuhela ueni! ⁴ Ange njika saleka mulonga halutue lueni na kuhaka mukanua kange vuhako. ⁵ Ange njika lilongesa mezi aze ali kanji kunia nauo kaha nji ka evuisisa vali ka handeka nange. ⁶ Nga nazungu nange mu vukama vua ngolo yeni cahi, ikeye aka njifueta. ⁷ Kuze muntu mukua vuviuke aka zunga neni. Minjileyi Ange nga njovokele hayaye-e kuli mukakusompa uange. ⁸ Tala, njinayi ku ntutuko, vunoni kakeleko, na ku mutokelo, kanja mu uanene. ⁹ Ku note, kuze kukeko kuali ku vipangi, vunoni kanja mumuene, kaha na ku nsulo, kuze kukeko kuana lisueka ivene vunoni muze kanji ka mu mona. ¹⁰ Vunoni natantekeye njila ezi inja mbata; omuo ikeye na njeseka, njika tuhuka nhue olu. ¹¹ Viliato viange via kuata vuasi ku zingano zieni; Ange nja niunga ku njila yeni na kulucahi. ¹² Kanja futukilile ku masiko a milungu yeni; Ange njina nuinga mezi amukanua keni kupulakana mutamba uange ua via kulia. ¹³ Vunoni ikeye ua cuma cimo, iya aka muhiluisa?Vize via nazange, via kulinga. ¹⁴ Muomu ikeye akumbata viana nji tumbuila ange; Kuze kuvili via vingi ngue vikevio. ¹⁵ Ngoco vene, ange njizuzuka kumeso eni, omo njisinganieka hali ikeye, njili na vuoma neni. ¹⁶ Muomu Njambi na pange mutima uange kuhomba; na mukua ngolo nanji zuzuisa. ¹⁷ Kanja nehele naku nsongo na milima, muomu ya mi ziviliko ya kama ize ya fuika ku cihanga cange.