¹ Njambi wendekele kuli Mosesa, ngwendi, ² "Ambata Aloni na bana bendi babanalume hamo, buthzalo na mathzi akuwabetha, ngombe wankomba wa mulambu wa bubi, bimanga babali ba nkomba na ngalo ya likende lyakujeneka muthima. ³ Kungulula chikungulukilo choshe kuchikolo cha tende yakuliwanena." ⁴ Cho Mosesa walingile ngwe omu Njambi wamukambeyeye, cho na chikungulukilo chethzile ku chikolo cha tende yakuliwanena. ⁵ Cho Mosesa wendekele ku chikungulukilo ngwendi, "Echi chikecho nakambeya Njambi kulinga." ⁶ Mosesa wanenele Aloni na bana bendi babanalume nakubatanetha na mema. ⁷ Wathzikile Aloni sanya nakukuta mwiba wakandombe mumbunda yendi, wamuthzikile mukanjo na kangamwina, cho wakutile kaje kangamwina na thungu na kumukutayo. ⁸ Cho wamwakele nanga yahanulo, cho wakele ulime na tumine munango yaha nulo. ⁹ Wakele kalupusa hamutwe wendi, cho naha kalupusa, halutwe, wakeleho lilonga lya ngolinde, chilongo chakuthzila, ngwe muje Njambi wamukambeyeye. ¹⁰ Mosesa wambatele mathzi akuwabetha, wabwabethele tabanakele na byoshe byakelemo na kubyandununa kuli Njambi. ¹¹ Washamununwinine mathzi ha mutula katanu na kabali, nakubwabetha mutula na bitenga byoshe byakeleho, na lilonga lyakujwelela hamo na chitumbiko chacho, akabyandunwine kuli Njambi. ¹² Wetilile mathzi akubwabetha amo ha mutwe wa Aloni nakumuwabetha akamutume. ¹³ Mosesa wanenele bana babanalume ba Aloni nakubathzika tu sanya. Wakutile miba ya kandombe mu bimbunda byabo na kuthzenga binanga bya lineni kumitwe yabo, kutetha nakukambeya cha Njambi kuli ikeye. ¹⁴ Mosesa wanenele uje ngombe wa nkomba wa mulambu wa bubi, cho Aloni na bana bendi bathatekele maboko abo ha mutwe wa ngombe wa nkomba uje banenele wa mulambu wa bubi. ¹⁵ Wamuthsiyile, nakwambata maninga nakwaka ku bimbinga bya mutula na munye wendi wajelethele mutula, nakwitila maninga ha chitumbiko cha mutula, nakubyandunwina kuli Njambi mangana balinge chikombeyo. ¹⁶ Wambatele mathzi oshe akele kubilyo byamukati, chifwiko cha lishuli, na bije bithso bibai na mathzi acho, cho Mosesa wabilumbile byoshe ha mutula. ¹⁷ Oloni uje ngombe wankomba, chilambu chendi, thitu yendi, na bufwati bwendi wabilumbilile hanja ya chilombo, ngwe omu wamukambeyeye Njambi. ¹⁸ Mosesa wanenele manga wankomba kupwa mulambu wa kulumba, cho Aloni na banabendi babanalume bathatekele maboko abo ha mutwe wa manga. ¹⁹ Wamuthsiyile na kushamwina maninga mu bimbango byoshe byamutula. ²⁰ Wabatwile uje manga mubipuka na kulumba uje mutwe nabije bipuka na mathzi. ²¹ Wakushile bilyo bya mukati na mendi na mema, cho walumbile manga woshe ha mutula. Wapwile mulambu wa kulumba cho watuhwile bweko bwabubwa, mulambu wa kupanga mu tuhya kuli Njambi ngwe kukambeya cha Njambi kuli Mosesa. ²² Cho Mosesa wanenele manga mukwabo wa nkomba, manga wa kujeletha, cho Aloni na bana bendi bathetekele maboko abo ha mutwe wa manga. ²³ Aloni wamuthsiyile, na Mosesa wambatele maninga endi amo nakwaka hashongo ya litwi lya kuchilyo lya Aloni, ha munye wathsina wakuchilyo cha liboko lyendi, na kumunye wathsina wakulindi lyendi lya chilyo. ²⁴ Wanenele bana babanalume ba Aloni, cho wakele maninga ha shongo ya litwi lyabo lya chilyo, ha munye wathsina. wa kuliboko lya chilyo, na kumunye wathsina wakulindi lyachilyo. Cho Mosesa washamunwine maninga mu bimbango byoshe bya mutula. ²⁵ Wambatele mathzi, mathzi a mukila, mathzi oshe akele kubilyo bya mukati, chifwiko cha lishuli, bithso bibali na mathzi acho, na ntungi ya kuchilyo. ²⁶ Kutunda mu ngalo ya likende lya kujeneka muthima ije yakele ku mesho a Njambi, wambatelemo mukasha umo wa likende lya kukumbathana na mathzi, na tushashashama, nakubyaka ha mathzi naha ntungi ya kuchilyo. ²⁷ Wabyakele byoshe mu maboko a Aloni na mumaboko a bana bendi babanalume naku byana kuli Njambi kupwa mulambu waubwa. ²⁸ Cho Mosesa wabitambwile kutunda mumaboko abo na kubilumba ha mutula kupwa mulambu wa kulumba. Kwakele mulambu wa kujeletha na kuhula bweko bwabubwa. Wapwile mulambu wakupanga mu tuhya kuli Njambi. ²⁹ Mosesa wambatele ng'undo nakubijundula nakubipwitha bwana bwakujundula kuli Njambi. Yakele mbathzubwila ya Mosesa ya manga ya kukithwilamo kapilisitu, ngwe na kukambeya cha Njambi. ³⁰ Cho Mosesa wambatele mathzi amo akubwabetha na maninga aje akele ha mutula; wabishamunwine hali Aloni, ha buthzalo bwendi, hali bana bendi, naha buthzalo bwa bana bendi. Mungilei wandunwine Aloni na buthzalo bwendi, na bana bendi na buthzalo bwabo kuli Njambi. ³¹ Cho Mosesa wendekele kuli Aloi na bana bendi ngwendi, "Telekeni thitu ili ku chikolo cha tende ya kuliwanena, kuje bene lyeni na likende lije lili mu ngalo ya kujelethela, ngwe omu njamikambeyeye, ngwange, 'Aloni na bana bendi babanalume bakabilya.' ³² Obyo byoshe bikathala ku thitu na likende munapande kubilumba. ³³ Kumwapandele kutunda ku chikolo cha tende ya kuliwanena ha matangwa atanu na abal, kweta namu matangwa a kubwabetha chobe aka shulithiwa. Mwafwa Njambi akamijeletha mu matangwa atanu na abali. ³⁴ Echi banalingi halitangweli - Njambi nakambeya kuchilinga mangana chikale chikombeyo cheni. ³⁵ Mutumbama mutanya na buthsiki ha matangwa atanu na abali ku chikolo cha tende yakuliwanena, na kunyunga kukambeya cha Njambi, cho kumu kathsi mwafwa echi chikecho bananjikambeya." ³⁶ Cho Aloni na bana bendi babanalume balingile byuma byoshe bije Njambi wakambeyeye kwitila muli Mosesa.