² Kethi mwane muthzimbu wa makuli hali munu woshe. ¹ Cho kethi mukale hamo na munu wa mubi nakwana bukaleho bwa makuli. Kethi uka kabangeye mbunga hakulinga byuma bya bibi, nambe omo bendeka bukaleho bwa kutengulula bushunga. ³ Kethi muka thompele na chibembulu omwo bathopetha mukakuhutwa. ⁴ Oshe ngwe uwana ngombe nambe chimulu wa chitothi chobe na thzimbala, mwilwithile kuli ikeye. ⁵ Cho ngwe umona chimulu cha chitothi chobe chamuthindakana chiteli, kethi umuthethze uje munu. Buthunga bene unapande kumukwatha nauje bene chimulu chendi. ⁶ Kethi mubyanene buthsunga munu mukakuhutwa omo asholoka mumbanja. ⁷ Kethi mukakale hamo nabaliweni mukukutiyiya munu byama kuli, cholalo kethi mukathsiye baje kubethi na mulonga nambe baje bakujela, omwo njikahitha munu woshe uje akalinga chuma chachibi ngachije. ⁸ Kethi mutambule lithzika - kanwa, omwo lithzika kanwa lilingitha banu bupuputwa kuli baje bali nakumona, cho lika bihitha bing'anda bya banu babushunga. ⁹ Kethi mukapakethe muka - kwija, mwafwa neni munathzibuka laja chiyoyelo cha muka - kwija, omwo neni mwapwile baka - kwija muje mu chifuti cha Ingito. ¹⁰ Ngechoni ha myaka itanu naumo mukalima mahya eni na kuteja bije mwakunine. ¹¹ Oloni hamwaka wa muchitanu na ubali mukalikela kulima, ngechi baje banu beni bakuhutwa mangana bakalye. Cho byoshe bikathalaho, tuthitu ba mushwata bakabilya. Mukalinga chuma chimo na mahya eni a mikolobonthzi ya bushuka bya binyu na kumiti yeni ya mathzi a olibe. ¹² Muthimbu ya matangwa atanu - nalimo mu simano mu kapanga bipangi byeni, oloni halitangwa lya muchitanu na abali munapande mukahwime. Mukalinge omwo mangana uje ngombe yobe wakulimitha na chimulu chobe nabakebo bakahwimeko, cholalo na mwana wamunalume wa ndungo yobe wa munakathzina woshe muka - kwija na ikeye akahwimeko. ¹³ Cho tolilileni ku byuma byoshe bije njinendeka kuli yeni. Kethi mukatumbule mathzina atu njambi tweka, nambe mathzina abo bakawathzibe kutunda mutunwa tweni. ¹⁴ Mwapande kukaya naku kanjilingila biwano bya kulithamba bitatu hamwaka - namwaka. ¹⁵ Munapande kulithamba chiwano chije chamakende akujeneka muthsima. Ngechomo njili nakumyana mashiko awa, mukalya makende akujeneka muthsima hamatangwa atanu na abali. Hathimbu ije, mukalisholola kuli yange mu ngonde ya Abibe, oyo bangula laja kwetheketha nechi chilika. Omu mungonde eyibene mukemo mwatundile nakufuma mu Ingito. Oloni kethi mwije nakusholoka kuli yange mabokoboko. ¹⁶ Munapande mukanuke chije chiwano cha kuteja, buje bushuka bwakabanga bwabipanga byeni muje mumwa kunine mbuto mu mahya eni. Cho lalo mwapande kukanuka chiwano cha kuteja kumamanethelo wa mwaka, omo mukakungula bimbuto byeni kutunditha mu muahya. ¹⁷ Cho banalume boshe bapande kulisholola kuli Shukulu katatu hamwaka na mwaka. ¹⁸ Kethi mukane maninga akutunda kuli uje kathitu munakombelela kuli yange na makende akutunga na chimbalwila. Cho lalo mathzi abimuna baje munakombelela ha biwano byange kumwapandele kuwalama buthsiki bwoshe na kweta lya mukwabo mutondo. ¹⁹ Munapande kunena bije bimbuto bya chili manene bije mukalibangela kuteja mu mahya eni nakubinena munjibo yange, munjibo ya Shukulu Njambi yeni. Kethi mukateleke muna membe mumahwe auje ina. ²⁰ Njikatuma kangelo kulutwe lweni akaminyunga omwo muli nakwenda, cho akamitwala ku mwela uje njamibwaethela. Ngechibene mutolilileni na kumwononokela. ²¹ Kethi mukamushangumuke, mwafwa kakamikonekela bubi bweni. Lithzina lyendi lili hali ikeye. ²² Ngwe mubuthunga bene mwononokela lizwi lyendi na kulinga byoshe bije njili na kumileketha, cho njikapwa mukankole kuli baka nkole beni cho lalo njikapwa waku thzinda baje baku thzinda yeni. ²³ Cho kangelo kange akaya kulutwe lweni cho lalo akamitwala mulifuti lije lya ba Amoli, ba Hiti, ba Pelezi, ba Kanan, ba Hibi naba Njebushi. Cho njika banyongetha. ²⁴ Kethi mukanthikamene binjambi byabo, nakubalemetha, nameme kulinga ngechomo bali nakulinga bakebo. Oloni, yeni nyongetheni binjambi babo nakuthihula mamanya abimanda abo aku lemethela nakuwa bathzola mu bimbathzubwila byabindondo. ²⁵ Munapande kulemetha Shukulu Njambi yeni, cho lalo aka kwithula makende na mema eni. Njika tunditha myonjo muli yeni. ²⁶ Naumo wai munakathzi akajeneka mwana nambe akajombwetha limbo mu lifiti lyeni. Njikami yoyetha hathimbu yakama. ²⁷ Njikatuma munjunju walyoba lyange hali baje banu boshe bali muje muchifuti mukashaka kukobela. Njika thsiya banu boshe baje mukaliwana nabo. Njika lingitha baka ng'ole beni kwalumuka mulyoba na kumitewa yeni. ²⁸ Njikatuma makanga njamba kulutwe lweni baje bakatewetha ba Hibi, ba Kanana, na Hiti thimbu kanda mwetemo yeni. ²⁹ Kunjikabashekemo hamwaka umolika embwe, cho lifuti likapwa bingundu, cho tuthitu bakamitumina manene lalo. ³⁰ Oloni, njikabatundithamo kamandondo kamandondo lika noho mukasheketela na kulimanena eni babenya athinoni mukathwana lije lifuti. ³¹ Cho njika tabula binginga bya lifuti lyeni nakubyametha kutunda ku Kalunga - Ndonga wa Lindisi nakweta ku Kalunga - Ndonga wa ba Filisitine, cho lalo nakutunda ku mambo na kweta ku Ndonga ya Yufuleti. Cho njika myana moko akamwa ya babenya lifuti lije. Cho mukabashekamo na kubatundithamo omo mukaya kulutwe. ³² Kethi mukalithzibathane nabo nambe kulithzibathana na binjambi babo. ³³ Kethi mukatabele baje banu bakayoye mu lifuti lyeni, ngwe mulingamo bakamilingitha bubi ku mesho ange. Ngwe mukalemetha binjambi babo, cho buthunga echi chikapwa chiliba chakuminyongetha.