¹ Cho Njoabu bamulekele ngwabo , "Kenga, mwene anakulila na kulinyenga hali Ambusalome." ² Cho kuhyana chalije litangwa bachitengulwile kupwa kulinyenga ku bakanthzita boshe, mwafwa bakathzita hali lije litangwa bachithzibile omu bendekele ngwabo, "Mwene anakulinyenga hali munendi." ³ Cho halitangwa lije mashwalale bathebunukile mu nganda, ngwe banu baje banathzibitha shwamwa na kuthebunuka, omu batewa kunthzita. ⁴ Mwene walifwikile ku mesho nakulila na lijwi lya kukanguka ngwendi, "Munange Ambusalome, Ambusalome, munange, munange!" ⁵ Cho Njoabu wakobelele munjubo kuli mwene na kwendeka ngwendi, "Unathzibitha shwamwa ma shwalale bobe boshe lelo, aba banayobwele mwonyo wobe lelo, na myonyo ya bana bobe babanalume na babanakathzi, na myonyo ya banakathzi bobe, na myonyo ya banakathzi ba bindungo bobe, ⁶ mwafwa wathzema baje bakuthzinda, nakuthzinda baje bakuthzema. Mwafwa lelo unasholola ngwe bantwama na mashwalale ba ngocho kuli yobe. Lelo njinataba ngwange oshe ngwe Ambusalome nakala na mwonyo, cho etu boshe twathsile, echi ngwe chinakubwaheletha kumbunge. ⁷ Choni ngachije katuka uye nakwendeka mubuthunga ku mashwalale bobe, mwafwa njilithinga hali Njambi, oshe ngwe kuuiko, kukwethi munalume athala nobe buthsiki buno. Cho chikala chachibi manene kuli yobe kutubakana mabukalu oshe aje akusholokelele kutunda ha bukwenje bwobe kweta lelo." ⁸ Cho mwene wakatukile nakutumbama mu chikolo cha nganda, cho nabanu boshe babalekele ngwabo, "Kengeni, mwene natumbama muchikolo cha nganda," cho nabanu boshe bethzile kuli mwene. Cho ba Isalela batewele, munu woshe kwimbo lyendi. ⁹ Banu boshe bakele na kulibyanangana babenya mu miyati yoshe ya Isalela ngwabo, "Mwene natulwlile kumaboko abaka ng'ole betu, nakutulwila kumaboko aba Filisite, oloni natewe kutunda mu lifuti hamulonga wa Ambusalome. ¹⁰ Ambusalome, ou twawabethele hali yetu, nathsi mu nthzita. Cho mwomo bika kumwendekela chimo ha kwilwitha cha mwene?" ¹¹ Mwene Ndibiti watumine majwi kuli Zandoki nakuli Ambiyata baje tupilisitu ngwendi, "Endekeni ku bakulunu baku Yunda ngweni, 'Mwomu bika mupwa bakumanethelako kwilwitha mwene ku nganda yendi, hakupwa kwendeka chaba Isalela chinemanenako mwene, kumulwitha ku nganda yendi? ¹² Yeni bandolome bange, mushuni na chithsiya change. Mwomu bikoni mupwa bakumanethelako kwilwitha mwene?' ¹³ Cho endekeni kuli Amasa ngweni, 'Nkuma kuwethi mushuni na chithsiya change ndi? Njambi achilinge kuli yange, kwakelako lalo, oshe kuwethi umukulunu wa mashwalale bange kutunda lelo kuya kulutwe mu mwela wa Njoabu." ¹⁴ Cho watengulwile bimbunge bya banu ba Yunda boshe kupwa munu umo. Batumine majwi kuli mwene ngwabo, "Iluka, yobe hamo na banu bobe boshe." ¹⁵ Cho mwene welukile nakwija ku Yondani. Choni banalume baku Yunda bethzile ku Ngiliya na kuliwana na mwene cho bakanene mwene kuthambwela lya Yondani. ¹⁶ Shimei muna nGel, ka Mbenjamini, ou waundile ku Mbalulimu, wathzambwile hamo n banlume baku Yunda bakaliwane na mwene Ndabiti. ¹⁷ Kwakele likulukathzi lya banlume ba kutunda ku Mbenjamine naikeye hamo, Ziba ngamba wa Saulu, na bana bendi babanalume likumi nabatanu hamo na makumi abali a bingamba bendi. Bajabukile Yondani mu mesho a mwene. ¹⁸ Bajabukile bakanene nanga ya mwene kuthambwela na kulinga byoshe ebi athinganyekele kupwa bubwa. Shimei muna Ngela wathikamene hathi kuli mwene hajebene thimbukanda ashangumuke kujabuka Yondani. ¹⁹ Shimei wendekele kuli mwene ngwendi, "Kethi, shukulu, unjiwane na mulonga nameme kwanuka bubi buje ngamba yobe walingile halitangwa lije shukulu mwene watundile ku Yelusalema. Njalombo, mwene kethi abyake ku mbunge. ²⁰ Mwafwa ngamba yobe nathzibuka ngwe njabulumuna. Kenga, chikecho chinanenetha kwija lelo kupwa wakulibanga kutunda ku nanga yoshe ya Yosefwa kuthikumuka nakuliwana na shukulu ou mwene wange." ²¹ Oloni Ambishai muna Zeluiya wakumbulwile ngwendi, "Nkuma Shimei kapandele kuthsa hali echi, mwafwa wathingile ou bawabetha kuli Njambi?" ²² Cho Ndabiti wendekele ngwendi, "Chuma muka njilinga hali yobe, yeni bana ba Zeluiya, magana lelo ukapwe muka ng'ole kuli yange? Lelo kukala munu batwala kukuthsa mu Isalela? Mwafwa kunjathzibukile ngwe lelo njinapu mwene wa Isalela ndi?" ²³ Cho mwene endekele kuli Shimei ngwendi, "Kuuthsi," Cho mwene wamukulahethele na chithingo. ²⁴ Cho Mefibosheti muna Saulu wathikumukile nakuliwana na mwen. kathikile nakuliwana na mwene, Kathzikile myanja yendi , nambe kukamba munjethzi wendi kutunda kulitangwa atundileko mwene kweta kulitangwa atundileko mwene kweta kulitangwa welukile kwimbo mu kwoloka. ²⁵ Cho omu ethzile kutunda ku Yelusalema na kuliwana na mwene, uje mwene wendekele kuli likeye ngwendi, "mwomo bika kawaile nange, Mefiboheti?" ²⁶ Wakumbulwile ngwendi, "Mwene wange shukulu, ngamba yange wanjikwithile, mwafwa njendekele ngwange, "Njikuta chimulu mangana njilondeho mangana njiye na mwene, mwafwa ngamba yobe apwa chilema. ²⁷ Ngamba yange Ziba wanjikwithile, yange ngamba yobe, kuli shukulu mwene wange. Oloni shukulu mwene wange apwa ngwe kangelo wa Njambi. Ngachijeoni, lingechi chinabwaha mu mesho obe. ²⁸ Mwafwa nanga ya tate yoshe bakele ba kuthsa ku mesho a shukulu mwene wange, oloni wakele ngamba yobe hakati kabaje balile ku metha yobe libenya. Mooko mukoni njili nayo injilingitha kutwalelela kulilila kuli mwene?". ²⁹ Cho mwene wendekele kuli ikeye ngendi, "Bikajo ulumbunwina nakutwalelelaho? Njathinganyeka ngwange yobe na Ziba mukapanga mahya," ³⁰ Cho Mefibosheti walikumbulwile kuli mwene ngwendi, "Eyo, mwecheleni ambate byoshe, hakupwa shukulu mwene wange neluka mubutunu kwimbo lyendi ibenya." ³¹ Cho Mbazilai uje ka Ngileyande wathikumukile kutunda ku Longelimu nakujabuka Yondani na mwene, cho wendele hamo na mwene kuthambwela lya Yondani. ³² Choni Mbazilai wakulubalele manene, myaka makumi atanu na atatu mukukola. Wakele na kwana mwene mwakulingila thimbu wakele ku Mahanaimu, mwafwa wakele wabufuko manene. ³³ Mwene wendekele kuli Mbazilai ngwendi, "Ija nange, cho njikubwahethela kwaku tumbama nange mu Yeluslema." ³⁴ Mbazilai wakumbulwile mwene ngwendi,"Matangwa angahijo anathalako mu myaka ya mwonyo wange, nambe njije na mwene ku Yelusalema? ³⁵ Njili na myaka makumi atanu na atatu mukukola, njatha kwandununa habubwa na bubi? Ngamba yobe atha kumakela ebi njikali nebi njikanu? Njatha kuthzibalalo majwi abaka kwimba babanalume na babanakathzi? Bikajo ngamba yobe apwila chitele kuli shukulu mwene wange? ³⁶ Ngamba yobe ashaka lika kujabuka Yondani na mwene. Bikajo byanjifwetela mwene na bwana bwa chifwechi? ³⁷ Njalombo echela ngamba yobe eluke kwimbo, mangana njikathsile munganda yange ibenya ku mbumba ya tate na nana. Oloni kenga, ngamba yobe Kimuhamu ou. Echela ajabuke na shukulu mwene wange, nakumupangela chije chisholoka bubwa kuli yobe." ³⁸ Mwene wakumbulwile ngwendi, "Kimuhamu aya nange, cho njikamupangela chije chikasholoka bubwa kutunda kuli yange, Njikachilingila ha mulonga wobe," ³⁹ Cho banu boshe bajabukile Yondani, na mwene wajabukile, cho mwene wathsembele Mbazilai na kumukwithula. Cho Mbazilai welukile kwimbo lyendi ibenya. ⁴⁰ Cho mwene wajabukile kuya ku Ngilingale, na Kimuhamu wajabukile nendi hamo, Mashwalalel baku Yunda banenele mwene, na Mbathzubwila imo ya mashwalale baku Isalela. ⁴¹ Haje bene banalume baku Isalela bashangumukile kwija kuli mwene na kwendeka kuli mwene ngwabo, "Bika binanenetha bandolome, banalume baku Yunda, kukwiba nakunena mwene na nanga yendi ku thambwela ya Yondani, na banalume boshe ba Ndabiti kwija nabo hamo? ⁴² Cho banalume baku Yunda bakumbulwile baje banalume baku Isalela ngwabo, "Mwafwa mwene apwa kabushoko ketu. Bikoni munalubalela hali echi? Tunaliho chuma chimo echi napandele kufwetela mwene? Indi natwanako bwana bumo?" ⁴³ Baje banalume baku Isalela bakumbulwile baje banalume baku Yunda ngwabo, "Tuli na malimi likumi akushoko ya mwene, cho tuli na mooko yakama kuli Ndabiti kutubakana yeni. Bikajo bimunatushawilile? Nkuma kuchakele kushaka chetu kulibanga kwilwitha mwene wetu tukamuthzibe?" Oloni majwi a banalume baku Yunda apwile akutenuka manene kutabakana majwi a banalume baku Isalela.