¹ Yesu ua talele muilu ua muene vaka kufuka vaye vahanene vuana vuavo muchihele. ² Uamuene mukentu umo ntuluue ua chihutu uo mbililemo tumbongo tuvali tua tundende tua vunengu. ³ Keho Yesu ua kuanyene nguendi, ''Chili njimileka nguange ou ntuluue ua chihutu nahana vyavingi kutuvakana voshe. ⁴ Voshe vaye vahanene vya kuthalako kuvufuko vuavo. Vuno ou nthiua, nahana vyoshe vyakel'e navyo mu vuhutu vuendi, nahana vyoshe vyana kele navyo vya kuli kuatha navyo.'' ⁵ Omo vamo vakuanyene mu tembele, vati kuvuaha kuayo na kuvuaha kua mavue na vuana vuva na hana, endi nguendi, ⁶ ''Nga vyuma evi vimumona, litangua likeja kakuethi livue nambe limo lyahi li ka thala lyalikuavo lya ku yeneka kulyumbila hantci.'' ⁷ Keho va muihuile yendi, nguavo, ''Mulongisi, nthimbu muka vika yomboloka vyuma evi? Vika vikakala vimuetho omo vyuma evi viyongola ku yomboloka?'' ⁸ Yesu ua kuanyeneko nguendi, ''Dhangameni eni keti vaka mikuithe. Vavengi vakeja mu lidhina lyange, nguavo, 'yange vene yikeye,' na,; nthimbu yili ha muhyehi.' Keti mukava shuame. ⁹ Muye momu kovua ndhita nama nguavo, keti muka jaje, omo vyuma evi vinapande kuyomboloka haku livanga, vuno kulenga kua chifuti nolo kanda chili hale.'' ¹⁰ Keho ua kuanyene navo nguendi, ''Chifuti chimo chikalua ndhita nachifuti chikuavo, na vamuene vukaluitha vamuene vukuavo. ¹¹ Kukakala mandunduma akama, nanjala namavedhi akulitambuitha. Kukakala vyuma vyakungangametha naku komouetha kuakama kukatunda muilu. ¹² Vuno nthimbu kanda vyuma evi viyomboloke, vaka mikuata naku miyandetha, vakamituale yeni kuvithinangonga vyoshe naku mihaka mundolongo, vaka mituala kulutue lya muene nakuli vanguvulu mukonda muli dhina lyange. ¹³ Vika kala vukaleho na ntcimbu yakutuala ua mudhimbu uachili. ¹⁴ Muye vene vihakeni kuvi mbunge vyeni keti muvuahethe kunyunga ntcimbu na kulyohiela kulutue lueni, ¹⁵ keho njikamihana majui namana vaye voshe vitodhi vyeni kuvakatha kumipayetha nambe kuka mi vyanetha vimu ka kuanya. ¹⁶ Vuno eni vaka mihana kuva kuluntu veni lalo, vana vanoko vavamala, vavu shoko nava vuthamba, naku kamihaka eni vamo kukutca. ¹⁷ Eni vamo vaka midhinda kuli voshe mukonda lidhina lyange. ¹⁸ Vuno keti vinkambu vyakumitue yeni vika dhimbala. ¹⁹ Koletheni eni mukamena ho myono yeni. ²⁰ Muye muka mona Yelusalema vanayidhengeleka kumasualale, keho dhivukeni ngueni kunonga kuayo kuli muhyehi. ²¹ Keho vaye voshe vali muyundeya vakateuela kumikinya, lingeni voshe vali muimbo lyakama vatunde mo, na voshe vaye vali hanja lya chifuti linga keti vakovelemo muimbo lyakama. ²² Mukonda matangua ano akudhangametha, nga vyuma vyoshe viye viva thonene vika jomboloka. ²³ Ngongo yeni voshe muli namivila yivali na voshe vaye vaka muetha ku matangua aje! Mukonda kukakala ndhili yakama hantci hoshe,na vukalu kuli vantu. ²⁴ Vamo vakavatciha kumikuale, navaye vaka vakavakuata kuvifuti vyoshe, naku Yelusalema vaka lyatangela kuli vaka vifuti noho ntcimbu yavaka vifuti yina puithamo. ²⁵ Kukakala chidhivukitho kulitangua, na ngonde, namu vintanga - ntanga, nahano hantci. Mishovo yoshe vakakala nalyova, mukonda kayando kaku dhima kua mema a Kalunga nakuohya kuamankimba auo. ²⁶ Kukakala lyala aua kulyova na muye mova kavandamena kuvyuma viye vika yomboloka muno muchifuti. Mukonda nandhili ya muilu vika ngangama. ²⁷ Keho muka mona Muna Muntu akayomboloka hamashelua na ndhili naku vyakula kuakama. ²⁸ vuno muye vyuma evi vika yomboloka, yimaneni naku kankula mitue yeni, mukonda muka kumi patula ha muhyehi.'' ²⁹ Yesu uava lekele chithimo, "Taleni kuchiti cha mukuyu, na viti vyoshe. ³⁰ Omo moutuikilila vimaho, muka vimona eni vavena na kudhivuka ngueni ndombo yili muhyehi. ³¹ Ambe lalo, muye momukamona vyuma evi vika yomboloka, dhivukeni ngueni vumuene vua Kalunga vuli muhyehi. ³² Eni chili njimileka nguange, ku mushovo ou kouka tunduko noho vyoshe vinapu mo. ³³ Muilu na hantci vika dhimangana, vuno mathona ange kaka dhimangana. ³⁴ Vuno tolilileni kuli yeni vavenya, ngocho vene dhimbunge dheni keti dhikale na vishoti vya kulya na kunua vya muono ou, naku litangua liye lyaku minyangumuna ngue mulye kumuashuka liheto. ³⁵ Omuo litangua liye likeja kuli nkala uoshe ali namuono kuletue lua chifuti hoshe. ³⁶ Vuno dhangameni ntcimbu yoshe, nakulomba linga mukakale nandhili muku tewa vyuma vyoshe viye vyatha kulingiua, na kuimana kulutue lua Muna Muntu." ³⁷ Ngocho litangua liye lyava longethele mungeleka, na kuvutciki uatuhukule uayile kumukinya ua Oliveta. ³⁸ Vantu voshe vedhile mungeleka kuchimene vaku mutolilile.