¹ Yesu lalo ua lekele vandonge vendi nguendi,''kuakele lyala umo uaku yela mukakufuka umo uakele na muntu uendi ua mu hakele havipanga akale mukuluntu ua vakuavo, vamovedhile va kuambuluile kulimuka kufuka nguavo ouye mukuluntu uetu you avihitha vufuko vuove. ² Keho mukakufuka ua muthanene na kukuanya nendi nguendi, 'vika vinjili na kuvuua kulyove? njileke vukuluntu vuove vuavati, mukonda koukakala mukuluntu lalo kuvi panga vyange.'' ³ Mukuluntu uakuvipanga ua lihuile vavyenya, ' Njikapanga vati,nomuo muene uange mua njitunditha vukuluntu vua vipanga vyange? kanjethi nandhili muku hinda na shuama lalo muku ka mu lomba. ⁴ Njima thivuka vinjipanga, muje movana njitunditha vukuluntu vua vipanga vyange, vantu linga vanjitambule kuvi njivo vyavo.' ⁵ Keho mukuluntu ua vipanga ua thanene vaka makongo kuli muene uendi umo-koumo nakuihula uambangelo nguendi, 'vingahi uatambula kuli muene uange?' ⁶ Endi nguendi, 'chihita chamadhi a oliva .' ''Ua mulekele nguendi, 'Nona mukanda ua makokongo, tumama vuathi-vuathi, naku thona makumi atanu.' ⁷ Keho mukuluntu ua muka vipanga ua kuanyene namukuavo nguendi, 'likongo lingahi liuakala nalyo?' ''Ua kuanyene nguendi, 'cihita ca vintchako vya lukokotua, ' tambula mukanda ua likongo, naku thona makumi atanu naatatu.' ⁸ Muene uashangalele mukuluntu uavipanga muka vipanga muomu uapangele muakuvihya. Mukonda vanike vamu chifuti chino vana tuvakana kuvihya kupanga na vantu vavo navakevo vanike vamutana. ⁹ Njimileka nguange, kaleni navavuthamba veni vavenya mukulinga vaka vufuko vakujuala omo vukaya ,keho vakaku tambula kuntcimbu yoshe. ¹⁰ Ou uvatcelela kuli evi vyavindende nevi vyakama vaka mutcelela lalo kuli evi vyakama, na uje kapanga vuchili kuli yevi vya vindende kapanga lalo vuchili kulyevi vyakama. ¹¹ Ambe koua tcelelele mukupangetha vaka kujeneka kutcelyela vufuko, yiya aka kutcelela kuvufuko vuachili? ¹² Ambe koua tcelelele mukupangetha vyuma vyavantu, yiya akakuhana vimbongo vyove vavena? ¹³ Uahi ngamba atha kupangela dhimyene vavali, mukonda akadhindaho umo naku yongolaho mukuavo, ndi akatyama kuli umo lika nakuethela mukuavo. Kuuatha kupangela Kalunga na vufuko.'' ¹⁴ Keho vaFaliseo, vaje vayonguele vimbongo, vavyuvuile vyoshe evi, navo vakevo vamutcopele . ¹⁵ Uavalekele nguendi, '' Eni vaka kulithambuetha yenivavena kumesho avantu, vuno Kalunga adhivuka vimbunge vyeni. Mukonda echi chakama hakati kavantu navua navua kumu tambela ua Kalunga. ¹⁶ Mashiko nava polofete viakele kamane yoano uedhile. kutunda hathimbu yiye, mudhimbu uachili uavu muene vua Kalunga uavambuluilile, nkala uoshe uahanene kuthininika mungila yavyo. ¹⁷ Vunoni lilu na hanthi vya vyathi kudhimangana ngocho navimo vyahi vika tunda kumathona amashiko. ¹⁸ Nkala uoshe ou akondola mukentu uendi akambate uaye nalingi vukuidhi, na uoshe ou aka muambata uje ya nakondola yishamona amulingitha chikuidhi. ¹⁹ "Kuakele mumala umo mukakufuka uadhalele vidhala vya kuvenguluka nevi vyakutoka vya kulelema ua jolelele nkala litangua mukonda ua vufukile . ²⁰ Kuakele muka kuyanda umo ualidhina Lazalu uandandele hachikolo, uakele na vimbandu, ²¹ uayonguele vamu lithe vulalumuina vua uile kutafula ya mukakufuka. Natutali vakele na kumulyatha havimbulu vyendi. ²² Omuo muatcile muka kuyanda tungelo vamuambatele vamutualele kuje kua kele Avilahama. Mukakufuka nendi uatcile lalo va mushitikile, ²³ Omo ueshukile mu muhela ua vakakutca, uakankuile mesho endi uamuene Avilahama kua hale na Lazalu mu mpati yendi. ²⁴ Ngoco ualilile na kuanyene nguendi, 'Tata Avilahama, njuvuileko ngodhi tuma Lazalu, ambuitiki nchongo yamunye uendi mumema atontuethe handaka yange, mukonda ange kuno konjili mukayando kamu lengi ua tuhya.' ²⁵ Vuno Avilahama nguendi, 'Munange, vuluka nguove ove uauanene vyachili omu muuakele namuono, na Lazalu ua uanene vyuma vyakuviha. Ngocho honi ngechi vamudhembeleka, ove uli mukayando kakama. ²⁶ Keho kuli evi vyoshe, hakati ketu neni vana hakeho chimbongo chakama, naumo uahi ajavuke eje kuli yeni kahiti, uahiko umo atha kujavuka atunde oko linga eje kuli yetu.' ²⁷ "Mukakufuka ua kuanyene nguendi, 'Njina kukandelela, Tata Avilahama, linga umutumeko umo kunjivo yaTata- ²⁸ Mukonda ndjakala na vakuendje vange vavamala vatanu-linga aka valungule muakama, linga navo keti vakeje kumuhela uno ua kayando.' ²⁹ "Vuno Avilahama ua kuanyene nguendi, 'Vali na Mosesa navapolofofeto; vecheleni linga vavatolilile.' ³⁰ "Mukakufuka uakuanyene ko nguendi, 'Kuahi, Tata Avilahama, vuno nga umo mukakutca aya kuli vakevo, vaka tenguluka.' ³¹ "Vuno Avilahama ua handekele nendi nguendi, 'Ambe kuva tolilila Mosesa navapolofeto, nambe kuli umo a kashituka kukutca kuvaka mutolilila.'''