¹ Vavengi vatambuile vipanga muku vihaka kumo vanetheka kuambulula vyuma viye vina kupuamo mukati ketu. ² Mova hitile kuli yetu vaye vakele vakulivanga vanapu dhimbangi, na dhingamba dha muntcimbu. ³ Chinapu lalo kuli yange, mukonda njinendetha vuino vyuma vyoshe mukutameka, mukuthona vuino muku kutceleletha yove, ua kathingimiko kakama Teuofilu, ⁴ Kulingila nove udhivukeko vimo kuvyuma vyovana longetha. ⁵ Hamatangua a Helonde muene uava Yundeya kuakele umo Sasendote ua lidhina Zakaliya uaku mushovo ua Ambinjah; mukentu uendi Elizambeta nendi uakele umo ua mushovo ua Alone. ⁶ Voshe vakele vava ngulu kumesho aa Kalunga. ⁷ Vuno kovakele na munike mukonda Elizambeta uakele nchimi, voshe vakele vana kulupa kuntcimbu yavo. ⁸ Keho ntcimbu yahetele Zakaliya uedhile kumesho a Kalunga, mukuambata vipanga vya vuSasendote muku tepetha vipanga vyendi. ⁹ Kushuama ku hanguithithi ya kukakulu ya kaSasendote ou atha kupanga, vavengi vamuhanguile muku kovela mutembele ya Kalunga muku tcimika vihemba. ¹⁰ Mbunga yoshe ya vantu valombelele hanja hantcimbu yiye yova tcimikile vihemba. ¹¹ Ntcimbu yiye Kangelo ua Kalunga uamu yombolokelele na kuimana kumutambela ua chilyo cha chintako cha vihemba. ¹² Zakaliya muamu muene , uakele na vitanga, Na lyova lyamu uanene. ¹³ Vuno Kangelo ua handekele nguendi, "keti uvue lyova, Zakaliya, mukonda mukulomba kuove njina kuvu. Mukentu uove Elizambeta aka kuhana munike ua lyala. Uka muluka lidhina lyendi Youano. ¹⁴ Uka yolela na kulithamba, na vavengi vaka yolela haku muthema kuendi. ¹⁵ Aka kala uakama kumesho a Muene. Keti akanue vya kushasha nambe vya kukoluetha, keho aka shula na mpundhi yaku yela tunde muimo lya vayina. ¹⁶ Vavengi va mushovo ua Yisaleli vaka uhiluitha kuli muene uavo Kalunga. ¹⁷ Akaya kulutue lua chihanga cha Kalunga namu mpundhi yakuyela na ndhili ya Eliya, mukutengulula dhimbunge dhava yishe kuvana vavo navaka lithino kumana avo aangulu linga vali vuahethele kuli Kalunga vantu vaye vana mu vuayethela. ¹⁸ Zakaliya ua handekele na kangelo nguendi, "Vati nji vidhivuka evi? Ambe ange lyala njina kulupa na mukentu uange nakulupa muakama kumyaka." ¹⁹ Kangelo ua kuanyekeko na kuhandeka nendi nguendi," Yange Ngambiliyele, njinemana ku luholo lua Kalunga. Va njitumine nji handeke nove, nji kunehele ou mudhimbu ua chili. ²⁰ Taleni! muka holoka komuatha kuhandeka, noho litangua olyo vyuma vina yomboloka. Evi mukonda koua tolilile kulijui lyange, viye viva kapuithamo hantcimbu ya chili." ²¹ Keho vantu va tatelele Zakaliya. Vakomokele nguavo nakuata nthimbu yakama mu tembele. ²² Keho mua tuhukile hanja, ka handekele navo, Vavulukile nguavo ua muene chimona endi tee ali mu tembele. Ua kele na kuvaleketha na mavoko ua holokele kulu. ²³ Chedhile omo matangua endi avipanga ahuile, ua yile kunjivo yendi. ²⁴ Kunima ya matangua aye, mukentu uendi Elizambeta uakele na limo lya vingonde vitatu ua lishuekele endi vavenya. Ua handekele nguendi, ²⁵ Muene nanji lingilavyo evi omo muahetele matangua aye uanji talele muku njitunditha shuama yange hakati ka vantu." ²⁶ Kungonde ya mu chitanu nayimo, Kalunga ua tumine kangelo Ngambiliyele kulimbo lije lya Ngalileya lya kuluka Nazareta, ²⁷ Ku muna mukentu yova lamene uje kanda alimone na lyala ku lyala ua lidhina Yosefe, muna Ndaviti, lidhina lya muna mukentu uacho Maliya. ²⁸ Keho ua kovelele kuli yikeye ua handekele nendi nguendi, "Hinduka, ove ua vedhuka navua navua! Kalunga ali nove." una vedhuka hakati kavakentu voshe. ²⁹ Keho chamutangele kulijui olyo na kukomoka nguendi vati namu hinduitha. ³⁰ Keho kangelo ua handekele nendi nguendi, "keti uvue lyova, Maliya, mukonda una uana kavumbi kuli Kalunga. ³¹ Tala uka kala nalimo uka thema munike ua lyala. Uka muluka lidhina lyendi "Yesu''. ³² Yikeye akakala uakama vaka muluka muna ua muka kutuvakana voshe. Keho Kalunga aka muhana chituamo cha vumuene vua yishe Ndaviti. ³³ Yikeye aka tumina njivo ya Yakomba kumyaka yoshe, navu muene vuendi vuka kala vua myaka yoshe''. ³⁴ Maliya ua handekele kuli kangelo, vika kala vati ange konja kele na lyala? ³⁵ Keho kangelo ua handekele nguendi, ''Mpundhi yachili yikeja hali yove. Na ndhili yamuka kutuvakana voshe yika kufuika. Keho ou uaku jela uo ukathema vaka mutumbula muna Kalunga. ³⁶ Tala, kavushoko kove Elizambeta nendi uakele nalimo te noku nakulupa. Eyi yikeyo ngonde yamu chitanu na yimo kuli yikeye, uye uova tumbuile ncimi. ³⁷ Mukonda vyahi vika muhona Kalunga. ³⁸ Maliya nguendi, "Tala, Ange nji ngamba ya Kalunga ua mukentu, Vikale ngue omo muna vyambulula yove. Keho kangelu uayile. ³⁹ Keho matangua aje Maliya ua yile vuathi ku chifuti cha ku mukinya, kuimbo lya Ngalileya. ⁴⁰ Keho ua yile kunjivo ya Zakaliya naku meneka Elizambeta. ⁴¹ Keho cha kele ngechi Elizambeta muovuile Maliya neja muku mumeneka, mbututu uakele muimo lyendi ua nyangumukile, Na Elizambeta ua shulile na mpundthi ya chili. ⁴² Ua tambakanene na lijui lya kama, ''ove una vedhuka hakati kava kentu. Una vedhuka vushuka vua muimo lyove. ⁴³ Mukonda vika vina lingilila kuli yange nguavo vayina ya muene uange veje kuli yange? ⁴⁴ Tala, lijui lyove lya kama lyaku meneka mulya hetele mu matui ange, Mbututu muimo lyange ua tungumukile na ku yolelela. ⁴⁵ Ua vedhuka mukentu uye uatavele nguendi vyuma vyoshe vyamu lekethele Kalunga tangua vikapuamo. ⁴⁶ Maliya nguendi, muono uange u shangala Kalunga. ⁴⁷ Na mpudthi yange yakuyela yiyolela muli Kalunga muovole uange. ⁴⁸ Mukonda na mono chihindu changamba yendi ua mukentu chachindende. Tala, tunde lelo ku memo oshe vaka njitumbula muka kuvedhika. ⁴⁹ Mokonda uoshe uye uakama napanga vyuma vya kama kuli yange na lidhina lyendi lya yela. ⁵⁰ Na ngodhi yendi ya kala limo ku limo lya voshe vaye vanjuvuila lyova. ⁵¹ Naleketha ndhili na livoko lyendi; Nashandola vaye voshe vaka kulituntula muvithinganyeka vyamu dhimbunge dhavo. ⁵² Natunditha vana va dhimyene kuvi tuamo vya vumuene ngechi na hakako vaye vavandende. ⁵³ Nekutitha vaka njala na vyuma vya chili vuno vaka kufuka navathi mupulungua. ⁵⁴ Uahanene vukuathi ku Yisaleli kuli ngamba yendi vika muvuluithe kumuetha ngodhi. ⁵⁵ (ngue muahandekele kuli vashokuanoko) kuli Avilahama navushoko vuendi ntcimbu yoshe. ⁵⁶ Maliya ua kele hamo na Elizambeta dhingonde dhitatu mukemo muahilukile kunjivo yendi. ⁵⁷ Keho muyahetele ntcimbu kuli Elizambeta ualilelukile mbututu, munike ua lyala. ⁵⁸ Vaka mahalembo na vavushoko vovuile nguavo Kalunga namumuetha ngodhi yendi yakama, mukemuo muva jolelele hamo nendi. ⁵⁹ Keho chakele ngechi ku litangua lyamu chitanu na a atatu vedhile muku lovola munike. Handende vamu luke nguavo "Zakaliya," muku luka yishe. ⁶⁰ Keho vayina vataveleko nguavo, "Kuahi. Va muluke Youano," ⁶¹ Vahandekele nendi nguavo, "Uahiko umo ueni ua va vushoko yiva luka lidhina eli." ⁶² Valekethele vileketho kuli ishe kutuala ngue omo muaviyonguelele yikeye. ⁶³ Yishe ualombele chitale cakuthona keho uathonene. "Lidhina lyendi yikeye Youano,"Voshe va komokele. ⁶⁴ Haye vene kanua kendi kashokolokele na ndaka yendi ya vutukile. Ua handekele na kushangala Kalunga. ⁶⁵ Lyova lyedhile kuvantu voshe vaye vova tungile navo. Namajui ano oshe a tcimanene ku chifuti cha mikinya ya Yundeya. ⁶⁶ Keho voshe va vyuvuile va vi takamethele mu dhimbunge dhavo, nguavo, munike ou akapua yiya? Mukonda livoko lya Kalunga lya kele nendi. ⁶⁷ Yishe Zakalia ua shulile na mpundhi yakujela, keho ua handekele vupolofeto nguendi, ⁶⁸ Vishangala kuli Muene, Kalunga ua Yisaleli, mukonda neja mukukuatha keho napuithamo kukula vantu vendi. ⁶⁹ Natu yeluila mbinga ya vuovoke vuetu munjivo ya ngamba yendi Ndaviti. ⁷⁰ (Ngue mua handekele na kanua kavu polofeto vuendi vuakuyela tunde kulaya). ⁷¹ vuovoke kuli vakua nkole na kulivoko lya vaka kutudhinda. ⁷² Aka linga echi linga aka muethe ngodhi kuli vayishe yetu naku vuluka chuvuathano chendi cha kuyela, ⁷³ chiva tcelelethele kuli yishe yetu Avilahama. ⁷⁴ Ku tufungila yetu kuovoka kulivoko lya vaka nkole yetu, linga tu mupangele na lyova lyahi. ⁷⁵ mukuyela namu vuchili ku mesho endi matangua etu oshe. ⁷⁶ Mukemo, nove vene, munange, va kakutumbula kapolofeto ua muka vukama , Mukonda yove ukaya kulutue lua chihanga chaMuene muku vuahetha vingila vyendi, na muku vuahethela vantu kuija kuendi, ⁷⁷ mukuhana mana a vuovoke ku vantu vendi muku vechela ku milonga yavo. ⁷⁸ Echi chikalingiua mukonda ngodhi ya Kalunga ketu yakama, mukonda mukemo mukakala kutuhuka kua litangua lya muilu kuye kukeja mukutuohiela. ⁷⁹ mukutuila cheke hali vaye va tumama mumithithi na chivule chakutca. Aka chipanga echi mu kutuamena mianja yetu mungila ya chivovo. ⁸⁰ Keho munike ua kulile na ndhili mu mpundthi ya kuyela, uakele mumpambo noho litangua lya kuyomboloka kuendi ku Yisaleli lyahetele.