¹ Makura mu Engeli aneyeda mukuro wa kupupa mema gha liparu, gha makenu ghaku vembera yira mungwa wa kilisita. Mukuro kwa pupa ghutunde ku shipundi sha ghuHompa oku ashungira Karunga na Ndjwighona ² ntani mukuro kwa pupa ghupite mukatji ka livhango lyamu shitata. Kuntere ya mukuro ku maruha maviri naghantje kwa karako vitondo vya liparu, vyaku yima nyango rukando murongo-na-ruviri mu mwaka, ntani kehe mwedi kuyima ko nyango ya peke. Ntani mahako ghaku shitondo ghaku verura vantu vamu virongo. ³ Kapi nka mwa kalire mafingo gha Karunga mu shitata. Shipuna sha ghuHompa sha Karunga ntani na shipuna sha Ndjwighona ngashi kara kumwe navo mu shitata, ntani vantu vendi ngava raperera ku kwendi naku ruwana ghukareli Karunga. ⁴ Vavo ngava mona Hompa Karunga ku shipara na shipara, ntani lidina lyendi ngava litjanga pa vipara vyavo. ⁵ Ntani Matiku kapi ngagha karamo mu shitata; ntani vavo kapi nka ngava hepa ramba yaku tapa ghukenu ndi shite sha liyuva mukonda shi ghuyerere wa Hompa Karunga ngaghu payima naku tema ngaghu tape shite na ghukenu ku kwavo ntani namu shitata. Ntani vavo ngava pangera naku paruka liparu lyaku naruntje naku naruntje. ⁶ Makura mu Engeli aghamba ku kwande ashi, ''Odino nkango da ghushili ntani dihuguvare ovino vina hepa kutikamo. Hompa, Karunga kwa tapa nkango dendi dipitire mu mpepo yendi yava porofete, kuna tumu mu kareli wendi Engeli atape naku yuvita naku neyeda vantu vendi kwavi ngavi shoroko mu nkwangu.'' ⁷ Yesus aghamba naku tantera vantu vendi ashi, ''Tererenu! Ame kuna ku kwangura kuya! Muntu wa lirago ndjeghu waku yuvha naku limburuka kwadino nkango da ghuporofete odo vatjanga mu mbapira.'' ⁸ Ame, Yohanesi, na yuviro yino mbudi naku mona mamoneko ntani naku tjanga navintje. Opo na yuvire dino nkango ntani naku mona vya weno, ame anu ku gandere ku mpadi dendi anu tongamene pa ngoro kumeho yamu Engeli ogho atapiro mbudi naku neyeda vino na vintje. ⁹ Mu Engeli aghamba ku kwande ashi, ''Nakadidishi ku ruwana vyaku fana weno! Ame mukareli wa Karunga tupu yira ove, ntani nava ghunyoye navantje ntani na vaporofete, vaku limburuka naku yuvita nkango odo vatjanga muno mu mbapira. Tongamena naku raperera kwa Karunga!'' ¹⁰ Ntani ghuye aghamba ku kwande ashi, ''Kapishi ghuhoreke dino nkango da ghuporofete odi vatjanga muno mu mbapira, mukonda shi shirugho papepi shina kara navintje ngavi tikemo. ¹¹ Vantu vaku ruwana ghudona na ghurunde, va twikire ku ruwana ghudona na ghurunde wavo. Vantu vaku nyata, vatwikire ku ruwana ngoli nyata yavo. Vantu vaku ruwana ghuhungami vatwikire ku ruwana ghuhungami wavo. Vantu vaku kushuka vatwikire ngoli ku ruwana ghukushuki wavo. ¹² Jesus aghamba ashi, ''Tererenu! Ame kuna kuya papepi na kara. Ame kuna kara na mfuto yande, yaku futa kehe ghuno ku twara muviruwana vyendi. ¹³ Ame Alufa ntani ame Omega, Ame waku tanga ntani Ame waku hulilira, Ame waku hova ntani Ame waku manita. ¹⁴ Vantu va lirago mbovo vaku kusha vyuma vyavo vikare vina kene mposhi vavo ngava kangena mu livero vayende munda ya shitata navo ngava kalye nyango yaku shitondo sha liparu lya naruntje. ¹⁵ Pandje ya shitata ngava kayura po vantu vaku ruwana vihuna, vantu va vapure na varodi na vanganga, na vantu va rushonda, nava rudipayi vantu, na vakareli va Karunga va vintjwantjo, na vantu vaku ghamba vimpempa, ntani na vantu vaka goma vaku veta kuviri, vavo kapi ngava ka ngena mo mushitata. ¹⁶ Ame, Yesus, Ame na tumo mu Engeli wande ku kwenu nga tape yino mbudi ya ghushili ya ghumbangi ku mbunga Kirisite nadintje. Ame ndandani yamu lira lya Dafiti, ntani Ame ntunguru yaku tema naku payima ghunene ku ngura-ngura ya yinene.'' ¹⁷ Mpepo ya Karunga na vantu vendi vaku fana yira mukadi wa likwareko kwa ghamba ashi, "Ya kuno!'' Ntani kehe ghuno ana ku yuvho yino mbudi naye aghamba ashi, ''Ya kuno!'' Kehe ghuno wakufa linota, naye ngaye kuno ntani kehe ghuno ana shano, naye ngaye kuno, nga nwe mema ghaku tapa liparu lya naruntje maghoko-ghoko. ¹⁸ Ame Yohanesi kuna kutapa ghumbangi na marondoro ghaku hamena dino nkango da ghuporofete odi vatjanga muno mu mbapira kwa kehe ashi; kwato ku wedererako kwa yino mbudi, Karunga ngaka tapa matengeko na mahepeko kwa kehe ghuno waku wederera kwavi vatjanga muno mu mbapira. ¹⁹ Kehe ghuno waku tepura kuno ku nkango da ghuporofete odo vatjanga muno mu mbapira, Karunga naye ngaka tepurako ku ghupingwa wendi wakulya ku shitondo sha liparu lya naruntje ntani Karunga ngaka sheshupita nkondo dendi daku pangera mu shitata sha Karunga shaku pongoka ku twara yira momu vatjanga muno mu mbapira yino. ²⁰ Yesus oghu atapiro yino mbudi ya ghushili yi kare ghumbangi ku vantu navantje, ghuye kwa ghamba ashi, ''Ghushili! Ame kuna kuya papepi na kara.'' Yohanesi aghamba ashi, "Amen! Ya ku kwetu, Muyogholi wetu Yesus! ²¹ Nkenda ya Muyogholi wetu Yesus Kirisitus yikare papenu na muvantje. Amen!