Rushumo rwa vapongoki. ¹ Hompa, vuruka Daviti naviruwana vyendi navintje. ² Vuruka omo aghanine kwaHompa, omo atwenyidilire munankondo nadintje waYakobu. ³ Aghamba ashi, ''Kapi nganingena mumundi wande ndi nganiyenda paghuro wande, ⁴ Mantjo ghande kapi ngagharara ndi nkope dande dipwiyumuke. ⁵ Dogoro nganiwanene Hompa livango, ndjugho yamunankondo nadintje waYakobu.'' ⁶ Kenga, twaviyuvire vyakuhamenako kuBeterehema; atuyiwana mumafuva ghaYeyalimu. ⁷ Ngatuyenda mundjugho yaKarunga; ngatukatongamena kuvilyato vyendi. ⁸ Rambuka, Hompa, kulivango lyoye lyakupwiyumukira ove ntani. ⁹ VaFilisteli voye ghuvadwateke ghuhungami ghoye; vapuli voye vashamberere ruhafo. ¹⁰ Mukonda yamuntu ghoye Daviti, washapalikoti hompa ghoye ogho watoghorora. ¹¹ Hompa kwaghanine mughushiri kwaDaviti, mughano waghushiri ashi kapi ngapira kuvitikitamo: ''nganishingika ghumwe wamuruvaro roye pashipuna shaghuhompa. ¹² Nkene vana voye vakuka veta dande nadimuragho edi nganivaronga, navana vavo ndi ngavashingira kughuhompa ghoyenaruntje nanaruntje.'' ¹³ Hompa kwatovorora Siyoni, kwahorerapo ngashingirepo. ¹⁴ ''Opano mpo palivango lyande lyakupwiyumukira nanaruntje. Apa mponganitunga, morwa nahorapo. ¹⁵ Ame nganimutungika navihepwa navintje. Nganikutita vahepwe namboroto. ¹⁶ Nganidwateka vaPristeli vaghuyerere, vapongoki ngavayiyira kudameka kuruhafo. ¹⁷ Papo nganiturapo mbinga yaDaviti yakutongamena ntani ramba yavapongoki vande. ¹⁸ Ngani dwateka vanankore vendi ntjoni, ene ngoli papendi nkata ngayirerema.