¹ Mumwedi waunta mbiri kutunda po vakavyukire va lira lya Israeli kuvitata vyavo, opo vapongire vantu navantje kumwe vakare yira ghumwe tupu muJerusalem. ² Jeshua mona Jozadak ntani nava pristeri vaunyendi, na Zerubbabel mona Shealtiel, ntani navaunyendi avashapuka nakudika shidjambero sha Karunga wa Israeli vatape ndjambo dakushora yira momo tupu vavitjanga mu Veta ya Moses muntu wa Karunga. ³ Makura avatungu shidjambero mpopo shakalilire pamuhovo, morwa vakalire naghoma wavantu ovo vatungiro mushirongo shinya. Kava tapanga ndjambo dakushora kwa Hompa pama ruvede ghangurova. ⁴ Kava dananga nka Shipito shaVikorogho yira momo shashwa kushoroka nakutapa ndjambo dakushora kehe liyuva kutwara muntjangwaveta,kehe shiruwana muliyuva lyasho. ⁵ Ndjambo dakushora kadikaranga kehe liyuva, vitapa vya mwedi waghupe , ntani navitapa vyavipito vya Hompa ovyo vyakarereropo vyo vamutambitira, nka nandjapo davitapa vyakutunda kunavantje ovo vatapiro kwaHompa nashihoro shashiwa. ⁶ Avavareke kutapa vitapa vyakushwakerera kwa Hompa muliyuva lyakuhova lyamwedi waghu nta mbiri,mpiri ngoli vadilire kuvareka kutunga ntembeli. ⁷ Mbunga ayitapa maliva kuvaruwani vamawe ntani nakuvashongi vavitondo, ano ndya, vya kunwa, na maghadi avatapa kuvantu vamu Sidon na Tyre, vavhure kukayita vitondo vya Sedeli kutunda kuLibanoni viyende kuJoppa kupitira mulifuta, momo avipulitilire Sayiresi, hompa wa Persia. ⁸ Mumwedi waghuviri wamwaka wauviri kutunda opo vayire muntembeli yaKarunga mu Jerusalem, Zerubbabel mona Shealtiel, Jeshua mona Jozadak, navaunyavo vamwe, vapristeri nava Levi, ntani novo vatundiro mughupika vavyuke kuJerusalem avavareke kuruwana. Avatapa shiruwana kuva Levi vakuvarekera pamwaka ro mbiri shikandwite vayendite viruwana vyantembeli yaHompa. ⁹ Jeshua navanavendi ntani navaunyendi, Kadmiel navana vendi (ovo vakaliro ruvaro rwa Hodaviah), vana va Henadad ntani navana vavo navaghunyavo- navantje kwakalire va Levi vakukupakerera kumwe mukutakamita ovo varuwanino muntembeli yaKarunga. ¹⁰ Vatungi avatura litateko lya ntembeli yaHompa. Ano vapristeri avayimana mumarwakani ghavo namarumbendo, nava Levi, vana va Asaph, mukupanda Hompa navimburumbumba vyavo, kutwara momo lyavarawilire liwoko lya David ,hompa wa Israeli. ¹¹ Avatangauka nakupandura Hompa ashi, "Hompa muwa! ano shihoro shendi sha kwaIsraeli shakunaruntje." Vantu navantje avayiyili unene mpopo vahulira vatange Hompa morwa litateko lyantembeli vanalitateke. ¹² Ano ngoli shingi shava pristeri, va Levi, ntani namatimbi ghalira lyalididi, vakurona ovo vamonino ntembeli yakuhova, avalili unene pakumona litateko lya ntembeli yino vanalitateke. Ngoli shingi shavantu ovo vakaliropo kwayiyilire unene naruhafo. ¹³ Mukonda ye vi, kapi pakalire wakuvhura kuhangura liywi lakushamberera naliywi lyakulira lyamumbunga, mukonda shi mbunga kwadamikire kuyiyira unene, maywi ghavo kwagha yuvilire ure.