¹ Auhe ngu itavera kutja Jesu o ngu ri Kriste ua kuatua oku za ku Mukuru, Nu auhe ngu ma suvere Ihe ua tjo o ko suvere omuatje Ingui ngua kuatua i Je. ² Mu itji tu tjiua kutja ete tua suvera o vanatje va Mukuru, indi tji matu suvere Mukuru noku takamisa o matuako Ue. ³ Orondu ingui okuo oku ruvera Mukuru, kutja tu takamise o matuako Ue, nu o matuako Ue ka mazeu. ⁴ Orondu o tjina atjihe tji tja kuatua oku za ku Mukuru tji taara o uje. Nu imbui ouo o utoni mbu taara o uje, o ngamburiro jetu. ⁵ O uani ngu taara o uje, pendje na ingui ngu itavera kutja Jesu Kriste Eje o Muna ua Mukuru? ⁶ Ingui Eje ingui ngue jere no meja no mbindu, Jesu Kriste, ka ja ri no meja poruao, nunguari ja ri no meja no mbindu. Nu Ingui o Mbepo Eje o ngu hatoira, orondu o Mbepo o ngu nga ae ri o uatjiri. ⁷ Orondu pena vetatu mbe hatoira: ⁸ O Mbepo, no meja, no mbindu, nu imbi o vitatu mbi vi itaverasana mu tjimue. ⁹ Nu tji ma tu itavere o mahatoiriro uo vandu, o mahatoiriro ua Mukuru je ri kombanda oku kapita. Orondu inga ouo o mahatoiriro ua Mukuru nga hatoirire o hunga no Muna Ue. ¹⁰ Ingui ngu itavera mo muna ua Mukuru u na o uhatoi mbui mu Je o muini. Ingui ngu ha itavere mukuru ue Mu isapo o munavizeze, eje tjinga ae hina ku itavera o uhatoi Mukuru mbua hatoiririre o Muna Ue. ¹¹ Nu imbui o mburi o uhatoi, kutja Mukuru Ue tu pa o muinjo uaaruhe, nu o muinjo mbui u rimo Muna Ue. ¹² Ingui ngu na o Muna una o muinjo; ingui ngu hina o MUna ua Mukuru kena muinjo. ¹³ Mba tjangera o vina mbi kuene imba mbu mu itavera mo Muna ua Mukuru, kutja mu tjiue kutja muna o muinjo uaaruhe, no kutja mu itavere mena ro Muna ua Mukuru. ¹⁴ Nu imbui ouo o uvande mbu tu nao o hunga na E, kutja tji tua ningire o tjina atjihe otja ko mbango Je, Eje U tu zuva: ¹⁵ Nu tji ma tu tjiua kutja U tu zuva, atjihe tji tua ningire, otji tu tjiua kutja matu munu o vina imbi mbi tua ningire ku Je. ¹⁶ Nu auhe tji ma munu o muangu poo erumbi re ama tjiti o uvi mbu ha tuara ko ndiro, eje ma ningire, nu Eje me mu pe o muinjo ku imba mbe ha tjitire o uvi mbu tuara ko ndiro. Pena o uvi mbu tuara ko ndiro: hina kutja eje nga kumbire uo. ¹⁷ O uhasemba auhe o uvi, nu pena o uvi mbu ha tuara ko ndiro. ¹⁸ Matu tjiua kutja auhe ngua kuatua oku za ku Mukuru ka kara poku tjita o uvi, nunguari ingui ngua kuatua oku za ku Mukuru u ritjevera o muini, nu ingui o murunde ka tunu ku je. ¹⁹ Ete tu tjiua kutja o uete o va Mukuru, nu o uje auhe ua rara mo urunde. ²⁰ Nu matu tjiua kutja o Muna ua Mukuru ue ja, nu Ue tu pa o mapangununino uo kutja tu jenene oku tjiua Ingui ngu ri o uatjiri. Nu ete tu ri mu Ingui ngu ri o uatjiri, mo Muna ue Jesu Kriste. Ingui o ngu ri Mukuru ua tjiri nu o muinjo uaaruhe. ²¹ Vanatje, ritjevereje oveni ko visenginina.