¹ Repué ri é kusa Pablo a rejá Atenas i aseba Korinto. ² Aí elé a kunosé a Judío ñamao Akila, un ombe ke pó lasa sendá ri Ponto; elé a tén chito ri tiembo ke a miní ri Italia kú birigueta Prissila, pokke Klaudio abia mandao ke tó má Judíos a bae ri Roma. Pablo bae a ané, ³ i pokke elé asendá ri memo makaneo, elé a kelá kú ané i a makanea, pué ané asendá aseró ri possá. ⁴ Antonse Pablo a chitía endi masiruma ri Judíos kara Sabado. Elé a conbesé a, Judíos i Griegos. ⁵ Poro kuandí Silas i Timoteo a bajá ri Masedonia, Pablo asendá impulsao pó epiritu a ndá fecha ri Rioso a má Judíos ke Jesús aseba Kristo. ⁶ Kuandí má Judíos tá poné oponé i a insutá, Pablo a sakurí má chepa pó ané i a chitía a ané, " Sendá pola pó ensima ri kabea ri ané memo; i sabeba ná nú. Denje aora endi lande i bae a má gende edukao." ⁷ Antonse elé bae ri aí i bae a possá ri Tisio jutto, ombe ke adorá a Rioso. Possá taba a lao ri masiruma ri Judíos. ⁸ Krispo, kambimbante ri masiruma ri Jusíos i tó possá a kree endi Ño. Chochá ri Korintos ke a kuchá a Pablo a kree i abe bautisao. ⁹ Ño a chitía a Pablo endi bisió ri okkurana; " Nú tén miero, sinú jablá i nú kayá. ¹⁰ Pokke i tá kú bo, i narié tá tratá ri dañá, pokke i tén chochá ri gende endi é siurá." ¹¹ Pablo a bibí aí pó lingó año i silingó meses, insiñando palabra ri Rioso endi ané ¹² Poro kuandí Galio a conbetí endi gobernaró ri Akaya, má Judíos a levandá kondla ri Pablo i a yebalo pa silla ri juisio; ¹³ ané a chitía, " É ombe a conbesé a má gende pa adorá a Rioso ke tá kondla ri ley." ¹⁴ Toabia kuandí Pablo taba kasi pa chitía, Galio a chitía a má Judíos: "Enú má Judíos, si ri belá belá é kusa sendá nú kaiko o sendá delito, sendá jutto chitía é kusa kú enú. ¹⁵ Poro kumo é kusa sendá ri palabra i nombe i ley ri suto memo, resolbé enú memo. I nú resea sendá jues ri é kusa." ¹⁶ Galio asé ke ané rejá silla ri juicio. ¹⁷ Poro tó ané a kujé a Sóstenes, gobernaró ri masiruma ri Judíos, i a ndá bindaso lande silla ri juisio. Poro Galión a impottá nú é kusa ke ané asé. ¹⁸ Pablo, repué ri kelá aí pó chochá ri ría, a rejá má numano i a enbarká pá Siria kú Prissila i Akila. Elé a motilá kabea sí pokke abia tomao un boto. ¹⁹ Kuandi ané a yegá a Éfeso, Pablo a rejá aí a Prissila i Akila, poro elé a bae a masiruma ri Judíos i a debatí kú má Judíos. ²⁰ Kuandí ané a pirí a Pablo pa elé kelá má tiembo, elé a chitía ke nú. ²¹ Poro kuandí elé a tá depedí ri ané, a chitía: " I a bobbé uto be a enú si asina sendá boluntá ri Rioso." Repué a subí endi bakko i a bae kurilenbo ri Éfeso. ²² Kuandí Pablo a yegá a siurá ri Sesarea, a subí i a salurá a ilesia ri Jerusalén i repué a bajá a Antiokia. ²³ Repué ri abé pasá tiembo aí, Pablo a bae i güe pa uto siurá endi regió ri Galasia i ri Frigia i ndá animo a má risipulo. ²⁴ Un ombe Judíoo ñamap Apolos, ke nasé endi Alejandría, a miní a Éfeso. Elé a chitía kú kutú endi má Ekrituras. ²⁵ Apolos taba insiñao ri kumo Ño Jesús a kelé ke má gende a tén ke bibí, i kú bilanté bilanté, elé a insiñá é kusa a má gende. Poro, elé nú taba insiñando tó é kusa asekka ri Jesús, pokke elé númá a sabé ri bautimo ri Juan. ²⁶ Apolos a kumensá a chitía sin miero endi masiruma ri Judíos. Poro kaundí Prissila i Akila a kuchá elé, ané a yamalo pó uto lao i a chitía ri Kaddume ri Rioso ri belá belá. ²⁷ Kuandí elé a resea pasá pó Akaya, má numano a ndá animo a elé i a kribí a má risipulo endi Akaya pa ke lesibí a elé. Kuandí elé a yegá, elé ayulá ri manela ngande a tó má gende ke a kree pó grasia. ²⁸ Apolos taba chitía kú kutú kú má Judíos miendla un chochá ri gende taba kuchá, i elé a polé motrá a tó ané pó merio ri má ekritura ke Jesús sendá Kristo.