¹ Pablo, un apostol ri Kristo Jesús po merio ri Rioso, ri akuedo ku promea ri mbila lo ke tá endi Kristo Jesús, ² pa Timoteo, moná amao: Nglasia, miserikodia ku pá ri Rioso ma tatá ku Kristo Jesús ño suto. ³ I agradesé a Rioso, a kiene lo ke ya siribí rese ansestro mi ku mende puro, miendla I ta kolá ri bo endi to momendo ku orasió mi, po tiembo prieto i po ría. ⁴ Miendla I kolá ri lagrima ri bo, I kelé guatiá bó, pa polé tá repleto ri jarochería. ⁵ I kolá ri fe ri bo ri belabelá, lo ke taba primeo ku aguela si Loida, ku maé ri bo Eunise. I ta kombesío ke tá bibi lendro ri bo. ⁶ Po e fecha I ta rekodá pa bo rebibi don ri Rioso po merio ri poné mano ri mi endi bo. ⁷ Pokke Rioso nú nda suto epiritu ri miero, Éle ndá suto lingó ku kutú, ku gongoroko i ku juisio. ⁸ Asina ke bo nú polé tene pena ri tetimonio ri ño suto, ni rí mi, Pablo, preso ri éle. Si bo nú repati akongoajamiendo ri ebangelio ri akuedo ku kutú ri Rioso. ⁹ E Rioso lo ke a sabba a suto, lo ke ñama suto ku un satto ñamamiendo. Éle asé e kusa, nú ri akuedo ku obra suto, sinú ku plan ri Éle ku nglasia ri Éle. Éle nda suto e kusa endi Kristo Jesús reje ande tiembo empesa. ¹⁰ Poro ma sabasió a rebelá po merio ri sabaró suto, Kristo Jesús, lo ke kabá ku muette i nda suto mbila uto bé pa nu kabápa polé lumbra po merio ri ebangelio. ¹¹ Po e kusa i sendá prerikaró, aposto ku piacha ¹² Po e fecha I tá akongojáo po e ma kusa. Poro I ten pena nú; pokke I a kunosé a Éle, endi lo ke I a kree. I ta kombensio ke Éle polé juala ma promea lo ke ánda Éle, ata akel ría. ¹³ Jualá ma fomma ri palabra juena, lo ke bo a kuchá ri mi, ku fe i ku gongoroko lo ke sendá endi Kristo Jesús. ¹⁴ E kusa kaiko, lo ke Rioso a mandá, jualalo po merio ri Epirtu Satto lo ke ta bibi lendro ri suto ¹⁵ Bo sabé, ke to ma jende lo ke tá bibi endi Asia a rejá mí. Endi kuagro lo ke tá Figelo ku hermogenes. ¹⁶ Ke ño ndale miserikodia pa posá ri Onesíforo, pokke po momendo éle se reanimá a mi, i éle se tené pena ri karena mi nú. ¹⁷ Po kontrario, kuandi éle taba endi Roma, éle a buka mi, i a topetá mi. ¹⁸ Ke Ño pemití krondrá miserikoddia ri Éle endi a ke ría. Ri to ma fomma lo ke éle yulá mi endi Éfeso Bo kunúselo kaiko