¹ Wacuerinásáiri itacai yanaca Miqueas irí Moréset neserica, Náalii niaé Jotam, Acaz, Ezequías nacai, icueyii caté Judá iyacalená, íicánacaté Samaria, Jerusalén iyacalená. ² Peemiacue, macaita yácalenai. picuá pemiawa cáali, caita nacai macaita niae iyeyica iricú. pibatacue Wacuerinásáiri icalidacá pibayawaná iwali, pipunitacue, sisae mabayawanateise Wacuerinásáiri icapee. ³ Píicacué, Wacuerinásáiri imusuácawá sisaé iyacateiseca; Yá iiricuapinacawa, ibawa pinaca yaé chénuninameri iyeerica caalí inata. ⁴ Imalaida pinaca yaé analimeri iyerica yánibá; yae manacuali ibacaidaca pinacawa,iwalapinacawa iyuwa máini yeemacawa, quei nacai iyuwa unibá yúucocawa duli iwali. ⁵ Macaita ichabapinawa cami queina Jacob, imani iyuwa Wacuerinásáiri imana irí, caita nacai pibayawaná iwalise piacué Israelminanai. ¿chaana sica ibayawana ya Jacob? ¿camita Samaria taá? ¿chaana sica yaee chenunirica Judá neni? ¿camita Jerusalén taá? ⁶ Nuá, numani piná madecaná báwerí Samaria yasu cáali irí, caidé iyuwa nabanatei piná. nueda piná nucawa nasu ibá neibeideyicá iyú manacuali neré; yá nuana pinacá nadabacateisecawa. ⁷ Macaita yeneiwanasi namanirica numalaida pinácaní yemanamani; macaita yaé neéricá nalí nuema pinaca naichani. macaita nasu ídulu iwalise numani pina nalí baáweri. uwacaida queina niá úinaá iweni iyú, iyuwa napáidana uá inanai imanichuca inaá iyuwa baáwerí, caí pinaca nepoacawa. ⁸ Iná iwalise yae cáiwicá nuicacawa, ícaicha iyú; núacawá caide iyuwa caneri yaabaliricuiri aseiri, mabaleriwaca nacai; numaideida pinacá caide iyuwa yálidú, awisipinaca nua iyuwa capicapi. ⁹ íchauná camita piná yewa yawacuá, ideé pínacá yaánacá Judá neré. ideé pinacá yaánaca nuyácalé inuma iricú, Jerusalén neré. ¹⁰ picá picalidanií Gat neni; canata iwali píichaani; Bet Le Afra nutalienipinacawa cáali ichumalena neni, ¹¹ Pichabacuewa nenibá, weneiwica Safir neseyii, mabaletá, báiwaca. weneiwica iyeyii Zaanán neni caácu pimusuawa. Bet Esel awisicaina nia, nuedaquena naicha icueyica nia. ¹² Niá Marot iminaneica, nacuaca neemiawa casimáiri iyu tacaisi cayaberi, ya queina bawerica iricuacawa Wacuerinásáiri nese, Jerusalén inuma ibalé neeni. ¹³ Pidácuacú piasu yaálusi ipieriwa, cawayú iweré, Laquís iminanei, piá, Laquis,piacatá idaberi imani ibayawanawa ulií uá Sion iiduca, iná Israelminanai ibayawana nuana piwali. ¹⁴ Iná piá, piee irí aberí yaasusi pienapinacawa icha yae Moréset Gat; Aczib iyácalená ichiwaida pinaca niaé yacalenai icuerinaca Israel yasuca. ¹⁵ Nuá, yepuapinatá nuaneida nalí aberi yeederica aiba yasu, Maresa minanei; cayaberi wawasica Israel icha yepuapinacawa Adulan irí. ¹⁶ Pichunia piwitawa,piwita ibainawa,nawalisee niae sumanai isimaideyica piá, pimachunaida piwita, piawawa iyuwa niaé áawaca, penibe pinaqueiná yawa picha deculesiwata.