¹ Abdíasmä 'cuä̧o̧pä̧cuȩ i̧jȩcuä̧chi̧nä̧cu̧. TÖ̧Ä̧NÄ̧HUA̧ Diosmä pa̧'a̧nö̧ pä'ötó Edumnä ka̧cuä̧tö̧rö̧mä̧: Ujutumä ä̧ju̧cui̧nä̧tö̧jä̧ TÖ̧Ä̧NÄ̧HUA̧ ji̧yȩtȩ jäepa'a ja̧'hua̧ta̧'a̧nö̧ i̧mi̧nä̧ huȩnȩtö̧ ji̧'ä̧huä̧cua̧rö̧ hue'inö ttö̧ja̧ ttö̧'cä̧tȩnä̧ pa̧'a̧nö̧ pä'önö: "¡Ä̧rä̧mi̧'ä̧tu̧cui̧! ¡Tähuä jahuätucu turohuähuaja! ² Topittö, ttö̧ja̧ ttö̧'cä̧tȩttö̧mä̧ ji̧'qui̧cha̧hua̧ jö̧nä̧ jȩchä̧cua̧jä̧, ja̧'hua̧nö̧ jo̧mȩnä̧ ucurumä kö'cocotö ttäcuotö. ³ Cuami iso'quinä ucuo tecuäumä ucurutä uyaparehuä'ijäcujä̧, ucu inähuättö idoränä kö̧mä̧, ju'toju cuoju isode huȩnä̧rö̧mä̧ cuami iso'quinämä̧ pä'öjä: "¿Dijä̧ttö̧ ttörö pi̧jä̧ rȩjȩra̧'a̧cu̧ kä'ö i̧cuä̧cua̧mä̧? ⁴ Pare jä̧'i̧nö̧'a̧nö̧ mo̧ro̧jä̧ra̧'a̧ 'chacuächätucuttö'i̧nä̧ ja̧'hua̧ta̧'a̧nö̧ si̧ri̧'cö̧ ttö̧'cä̧tȩ cuä̧'ta̧ cu̧huȩnö̧ttö̧'i̧nä̧, juhua'attötä kä'ö chicuäcua̧jä̧, pä'ötó TÖ̧Ä̧NÄ̧HUA̧MÄ̧. ⁵ Nä̧u̧cuä̧rä̧tö̧ ucuru ttichöttömä, nä̧u̧cuä̧rä̧cuä̧huä̧ ttö̧ja̧ yodo ttichöttömä̧ (¡Ucutumä si'epötä icuähuäcuotöjä!), ¿Jahuätömä tta̧mö̧nä̧ pa̧ja̧tö̧tä̧mä̧ rö̧ä̧nä̧ ttu̧nä̧u̧cua̧'a̧ ja̧'a̧ tä̧ji̧? Uva ca̧ca̧tä̧tö̧ ucu cu̧ja̧'a̧cu̧ ttichöttömä, ¿Jahuätömä ocha jichacunämä ttuti'ö'a̧nö̧ ja̧'a̧ tä̧ji̧? ⁶ ¡Esaúrö suronä jȩpö̧ 'chottipinöta'anö̧ ja̧'hua̧ta̧'a̧nö̧ cuiäre rö̧ä̧nä̧ micuäu dajö rutähuä'inä'inä usinätö̧! ⁷ Cumöhuäyotömä o'catoi'önä todecuäcuinä̧tu̧cu̧, cui̧rȩjä̧ beipa'acu huȩä̧cua̧jä̧. Ttö̧ja̧ u̧ni̧chä̧rö̧ ka̧cui̧nä̧tö̧mä̧ ucurumä yaparetä jȩpi̧nä̧tö̧ ja̧'hua̧nö̧ jȩpö̧ tti̧dȩa̧'a̧nä̧tä̧ ttu̧ju̧ni̧'o̧nä̧cu̧jä̧. Cu̧cuä̧ cuätömä cuä̧tȩcuä̧tä̧ ki̧'ä̧dö̧ ttö̧ju̧ni̧nä̧cu̧jä. Ja̧u̧nä̧mä̧ huo̧jui̧'ä̧cuä̧huä̧mä̧ juiya'a. ⁸ Ja̧u̧nu̧ mo̧ro̧, TÖ̧Ä̧NÄ̧HUA̧MÄ̧ pä'ö,"¿Edom ttö̧ja̧ huo̧juä̧tö̧rö̧mä̧ si'epö chicuäcuotö ja̧'a̧ ja̧'hua̧ta̧'a̧nö̧ Esaú ahuaruhuä möä'canä ka̧cuä̧tö̧ ttu̧huo̧jui̧pö̧'i̧nä̧. ⁹ Cumöhuäyotö juruhuätö yecuäcuähuätä kä̧cuä̧u̧, Temás ttö̧ja̧'i̧nä̧ ja̧'hua̧nö̧tä̧ yotucu pönärö Esaú ahuaruhuä möä'canä ka̧cuä̧tö̧mä̧ cuä'äu icu si'epö tticuicuotö. ¹⁰ Cu̧jä̧hua̧ Jacobrö suronä jȩ'cui̧nö̧ jähuänämä, dä'ä ttuhuähuätä tto̧ȩpä̧rä̧cua̧jä̧ ja̧'hua̧nö̧ jo̧mȩnä̧ ju̧huȩnȩ jubötä bȩcui̧pä̧chä̧cua̧jä̧. ¹¹ Jäyänätö̧ cu̧jinö̧ mo̧ro̧mä̧, cuiäre korojä̧ ttö̧ja̧ ttȩmi̧pi̧nö̧ mo̧ro̧mä̧, ja̧'hua̧ta̧'a̧nö̧ ko̧ro̧jä̧ttö̧ ichäcuähuotö cuäpatenä do'ächinä̧tö̧ ja̧'hua̧nö̧ do'ächömä ji̧yȩtȩ Jerusalén jähuänä icu tottinömä jahuätö jö̧ta̧'a̧nö̧ huinöjä̧ ucumä. ¹² Ja̧'hua̧nö̧ ja̧'a̧nä̧ ja̧u̧ mo̧ro̧ cuesehuä cuijä̧hua̧rö̧mä̧, usurä emä̧hui̧nö̧ mo̧ro̧mä̧, ja̧'hua̧ta̧'a̧nö̧ Judá ttö̧ja̧rö̧ si'epö tticuinö mo̧ro̧'i̧nä̧ cuesehuä; a̧'cua̧ ttä̧huȩcu̧ mo̧ro̧mä̧ surojömä cucuocuä. ¹³ Usurä ttȩmä̧u̧ mo̧ro̧mä̧ chu̧mö̧huäyotö ttäpatenämä docuächä; si'epö tticu mo̧ro̧ usurä ttȩmä̧hua̧'a̧nä̧mä̧ cuesehuä, ttiäre'inä cuȩmi̧pä̧ si'epö tticuäji mo̧ro̧mä̧. ¹⁴ Mä̧nä̧ to̧mä̧rȩnä̧ 'cä̧i̧'o̧mȩ'i̧nä̧ cu̧jä̧mä̧dä̧, dö'ecuätörö be'epäjipö cuicua pä'ömä ja̧'hua̧ta̧'a̧nö̧ tta̧'cua̧ tta̧ttȩcu̧ mo̧ro̧, totte'ächa'anä ka̧cui̧pä̧jä̧tö̧rö̧mä̧ ttaboiyotörömä iyö cuicuätö. ¹⁵ Isopäi'önä TÖ̧Ä̧NÄ̧HUA̧ u̧mo̧ro̧ mo̧ro̧mä̧ tö'cö ja̧'a̧ pi̧jä̧nä̧ kä̧tö̧rö̧mä̧ o'catoi'önä̧rö̧tä̧. Jȩ'cuä̧'i̧jö̧ ta'anötä̧ jȩttä̧cua̧jä̧; ucu jȩ'cuä̧'i̧jö̧mä̧ ucurutä ppa̧huä̧chi̧'ä̧cua̧'a̧. ¹⁶ Isopäi'önä chu̧jä̧'ca möä'ca surojö juiyä'cattö a̧huä̧rö̧ ku̧ji̧nö̧ ta'anö. Ttö̧ja̧ o'catoi'önä cättädi'oca'a ttahuäcuotö, au kä̧nö̧mä̧ rattädi'äcuotö ja̧'hua̧nö̧ jo̧mȩnä̧ ko̧co̧tö̧ pä'ijätö 'cua̧rö̧nä̧tä̧ tottepächäcuotö. ¹⁷ Ja̧'hua̧nö̧ ja̧'a̧nä̧ Sión möä'canämä, jitö ttödahuächome kä̧cua̧'a̧; jahuätömä surojö jui'ätötä jä̧cuä̧'a̧; ja̧'hua̧nö̧ jo̧mȩnä̧ Jacob öäre ji̧nö̧mä̧ pä'äjita'anö ppa̧huä̧di̧pä̧cua̧. ¹⁸ Jacob ahuaruhuämä ocurä jö̧nä̧ ttäcuotö, ja̧'hua̧ta̧'a̧nö̧ Jose ojusodemä ocuräma jö̧nä̧ ttäcuotö ja̧'hua̧ta̧'a̧nö̧ Esaú ojusodemä ojiyä sa̧ri̧ä̧chö̧ jä̧'i̧nö̧'a̧nö̧ jä̧cua̧'a̧ ja̧'hua̧nö̧ ja̧'a̧ttö̧ cuo'ö tticuäcuotö juhua'atäcu juiyönä̧tä̧ päi'önä. Esaú ahuaruhuättömä ya̧tȩ'i̧nä̧ ki̧'i̧pi̧nö̧mä̧ toäcua'a, ja̧'hua̧nö̧tä̧ jä̧cua̧'a̧ päina'attö̧ TÖ̧Ä̧NÄ̧HUA̧MÄ̧. ¹⁹ Neguev rȩjȩ ttö̧ja̧mä̧ uruhuotö päi'önä ttö̧ja̧cuä̧mä̧cuo̧tö̧ Esaú u̧ji̧no̧mȩ mö̧ä̧'canämä ja̧'hua̧ta̧'a̧nö̧ Sefejanämä filisteas ttö̧ja̧tä̧ ttö̧ja̧cuä̧mä̧cuo̧tö̧. Jahuätömä Efraín i̧rȩjä̧nä̧'i̧nä̧, Samaria rȩjȩnä̧'i̧nä̧ uruhuo päi'önä ttö̧ja̧cuä̧mä̧cuo̧tö̧; ju̧=uhua'atäcu Benjaminä, Galaad rȩjȩnä̧ u̧ru̧hua̧ päi'önä ö̧jä̧mä̧dä̧cua̧. ²⁰ Israel ttö̧ja̧ttö̧ su̧ro̧da̧u̧ ko̧rpjä̧ra̧'a̧ ttȩpi̧nä̧u̧mä̧ Sareptattömä otonänö Canaán rȩjȩnä̧ ttö̧ja̧cuä̧mä̧cuo̧tö̧. Jerusalénttö̧ ko̧ro̧jä̧ra̧'a̧ ttȩpi̧nä̧u̧mä̧ Sefarad pättome huȩju̧ Neguev ötahuiyänä ttö̧ja̧cuä̧mä̧cuo̧tö̧. ²¹ Ttö̧ji̧pö̧nä̧ ppä'ädinä̧tö̧mä̧ Sión möä'cara'acu 'cha'chettäcuotö Esau ö̧ji̧no̧mȩ ka̧cuä̧tö̧rö̧ ruhuonä huetta pä'ö ja̧'hua̧'a̧nö̧ ruhuomä TÖ̧Ä̧NÄ̧HUA̧NÄ̧ kä̧cua̧'a̧.