¹ To̧mu̧rȩ ya'atenö a̧'ȩ päi'omenä, kä̧hua̧ttö̧ ä̧cuo̧mȩnä̧ mo̧ro̧ päi'omenä, TU̧RU̧HUA̧ i̧huȩnȩ rä̧bȩhui̧nä̧cu̧sä̧, pa̧'a̧nö̧ pä'ö: ² Ubo i̧tti̧, dä̧bu̧ pä'ö Tiro ttö̧ja̧mä̧ ttöjö'coca'ajä̧ttö̧ Jerusalen ttö̧ja̧rö̧mä̧, ¡Ye! ¡Ttö̧ja̧ dottächate apate surojo'epätöjä! ja̧'hua̧nö ja̧'a̧ttö̧ juatemä ttörötä ppa̧huä̧cha̧'a̧; Ttö jȩchä̧cua̧sä̧ jahuätö usurä ttȩmä̧u̧nä. ³ Ja̧'hua̧nö̧ ja̧'a̧ttö̧ TU̧RU̧HUA̧ pa̧'a̧nö̧ pä'ö: '¡Ä̧ju̧cuä̧tu̧cui̧! Tiro, Ttömä ucu jȩcu̧'u̧ kö'cocösä, yȩchä̧cua̧sä̧ recuätö ttö̧ja̧ ucuru ttöjö'cöjuiyönä dä'ähuotö ppahuäbi pä̧i̧cu̧nä̧ ppahua'a jä̧'i̧nö̧'a̧nö̧. ⁴ Ja'huätötä pparopö tticuäcuotö Tiro tto̧ȩpä̧rä̧'ca, jahuä'camä rȩjȩtä̧ pȩjä̧cuä̧. Ttötä si'epö chi̧cuä̧ci̧a̧sä̧ chi̧'i̧pö̧ juiyönä juȩnȩmä̧ inähua huä̧mȩ juiyähuä jä̧'i̧nö̧'a̧nö̧. ⁵ Dä'ähuoto kä'comä ki̧'i̧pä̧cua̧'a̧ i̧sä̧sä̧ joecuome päinätä̧, ttä'cö TTÖTÄ päda'attö, pa'anötä̧ päö TU̧RU̧HUA̧ TTÖÄNÄ̧HUA̧MÄ juä̧nȩnȩmä 'corotö ttämonä ttujurunä 'chottipapäötä jä̧cuo̧mȩ. ⁶ Cui̧tti̧mutu̧cu̧ nä̧tö̧ pättara'a ko̧cuȩtö̧rö̧mä curä'chunä 'cui'cuipu ttihuäcuotö, jahuätömä̧ ja̧'hua̧nö̧tä̧ TTÖRÖ ttucuo̧jä̧chi̧ä̧cuo̧tö̧ TU̧RU̧HUA̧TÄ̧ ja̧'a̧ pä'ö. ⁷ TU̧RU̧HUA̧MÄ pi̧yȩ pä'ö: Topi, kä̧hua̧ u̧huo̧jua̧'a̧cu̧tu̧ TTÖTÄ chi'cachäcua̧sä̧ Babiloniattö̧ ucuo ru̧huä ttu̧ru̧hua̧rö Nabucodonosorö Tiro ttö̧ja̧cu̧ örocua'cuapäö, ca̧ba̧yu̧tu̧nä ja̧'hua̧ta̧'a̧nö̧ caruquiyänä'inä, ttö̧ja̧ recuätörö cabayu̧tu̧nä̧ cuȩjȩttö̧rö'inä. ⁸ JA̧U̧TÄ̧ rohuäu cuäö icucuotö cuittimu̧ nä̧tö̧mä. JA̧U̧MÄ a̧di̧täcua̧ cuä'ö icua pä'ö ucuru tätäcua'ca ju'toju jä'ca ucutä mo̧cuä̧cha̧päö ja̧'hua̧nö̧ jö̧ o'ca'a käepäcua̧ ucurä'chu ucuru cuä'ö icua pä'ö. ⁹ Ja̧u̧mä̧ ö̧tä̧cua̧ maquinäcä cuiäre 'quiyönä ttoepäräcä pparopö icua pä'ö. Ja̧'hua̧ta̧'a̧nö̧ ucutä cuaditä'ijönätä̧ rȩjȩcu̧ kä'ö icuähuäcua'a ucutä cuiä'ca ju'toju 'quiyönä adicuä'camä. ¹⁰ Cuäji cabayu ja̧'u̧tä̧ jä̧cua̧'a̧ rȩjȩ i̧sa̧ppȩ ttoepäcua̧mä̧. Ucu cuiäre ttoecuäbämä tti̧ȩpä̧cua̧'a̧ cahuayu huomenä tti̧ȩpä̧'i̧nö̧'a̧nö̧, cuäpatenä doächäcuähuomenä, ja̧u̧mä̧ doächi'äcua̧ bäreu ötahuiyä ra̧'ä̧tö̧ i̧chä̧tö̧ jä̧'i̧nö̧'a̧nö̧ cuiäre ttoecuäbämä täcö maächi̧na̧'a̧. ¹¹ Isotö pa̧ja̧cuä̧nö̧ ttö̧jä̧pi̧yä̧ ku̧nä̧rä̧tö̧mä̧ cuä̧ji̧mö̧ ca̧hua̧yu̧tö̧ ötahuiyä mä̧ni̧yä̧nä̧mä̧ o'cajuiyönä 'cuȩcu̧ tticuäcuotö. Ja̧u̧mä̧ cuä'ö icuäcua̧ cu̧mö̧huä̧yo̧tö̧ ö̧ta̧hui̧yä̧ ttöjarö curä'chu pätecu soä'chunä ja̧'hua̧ta̧'a̧nö̧ ucutä cujuru päi'önä ido'qui ucuo tecuähuo'quimä ma̧o̧po̧'ä̧chä̧cua̧'a̧ rȩjȩcu̧tä̧. ¹² Jahuätömä ucuo juiyönä jȩpö̧ ttȩmi̧pä̧cuo̧tö̧ ru̧hua̧ a̧'cua̧rö̧nä̧ cu̧ju̧nä̧rä̧'i̧jö̧mä̧ ja̧'hua̧ta̧'a̧nö̧ ucutä cumöjähuä'inä, ja̧'hua̧ta̧'a̧nö̧ kä'ö tticuäcuotö cuojusode rȩba̧nä̧'i̧nä̧ ja̧'hua̧ta̧'a̧nö̧ surojuottepäcuotö a̧'cua̧cuode cuoju isode'inä cuiäre ido'qui, cuiäre dauhuiyä'inä ja̧'hua̧ta̧'a̧nö̧ korojuäi surojuoächö'inä do'opö icuähuäcua'a ajiyara̧'a̧tä̧. ¹³ Ttö̧mä̧ 'co̧rö̧dö̧ chu̧ju̧nä̧cua̧sä̧ ucu rä̧cuä̧'i̧jö̧mä̧ ucu cuiäre arpas rämipä'ijö̧ ä̧ju̧cuä̧cuä̧huä̧ juiyäcua'a juhua'a yabomä. Ttötä jȩchä̧cua̧sä̧ ido'qui huäkä'co jönä, ucumä cu'ärohuächäcuanjä, yomete cu̧'ca̧tä̧huä̧ti̧yu̧ jä̧'i̧nö̧'a̧nö̧ setädö rö̧nä̧huo̧mȩ. ¹⁴ Ucumä yorisotä pä'äjita'anö̧mä̧ ja̧rȩä̧chi̧'ö̧nä̧mä̧ cuaditö juiyäcua̧jä̧, Ja̧'hua̧nö̧ ja̧'a̧ttö̧ Ttö CU̧RU̧HUA̧TU̧CU̧ Dios ucuocuinäcusä, pa̧'a̧nö̧tä̧ huȩnȩ huäjuetinö TU̧RU̧HUA̧ Diosmä. ¹⁵ Ttö, Cu̧ru̧hua̧ Dios, pä'ösäto Tirorö: Dä'ähuotö ötahuiyä ttö̧ja̧mä̧ ye'ecuocö tti̧ttä̧huä̧cuo̧tö̧ ma̧cua̧'a̧ ä̧ju̧cu̧, huotö 'cä̧tȩnä̧ ttö̧tta̧hui̧yä̧ jönä cuä̧ttä̧huä̧jä̧u̧ ja̧'hua̧nö̧ ja̧'a̧nä̧ cuä'ö icuäjätö cuahuaruhuärömä. ¹⁶ O'catoi'önä dä'ähuoto ruhuotömä tti̧mȩjä̧huä̧cuo̧tö̧ ruhuo deäquiyättö ja̧'hua̧ta̧'a̧nö̧ ttö̧'ca̧tä̧huä̧ti̧yö̧ huä̧mȩ o̧ta̧ ko̧ttä̧dä̧cuä̧huä̧cuo̧tö̧ ja̧'hua̧ta̧'a̧nö̧ jacuä a̧'cua̧cu̧ o̧ta̧'i̧nä̧ ye'cu kä̧nö̧ ttö̧'ä̧mä̧dä̧cuo̧tö̧ rȩjȩ tti̧'ä̧u̧ kä̧nö̧ 'cuäopönä ye'ecuächö ucuru topö. ¹⁷ Ja̧'hua̧nö̧ ja̧'a̧ pi̧yȩ hua'are ra̧huä̧huä̧tä̧ ra̧ttä̧cua̧jä̧: ¡Ja̧'hua̧nö̧ jȩpö̧ surojuottepäcua̧jä̧. Ja̧'hua̧ta̧'a̧nö̧ to'epächinäju̧jä̧ dä'ähuotottömä, ötahuiyä ucuohuome öädihuä. ¡Ucumä cuahuaruhuäcu juruhuäujä̧ dä'ähuotottö ja̧'hua̧ta̧'a̧nö̧ ki̧nä̧u̧jä̧ hua'aretä o'cajuiyönä pi̧jä̧nä̧! ¹⁸ Jitämä ma̧cuä̧cha̧'a̧ttö̧mä̧, dä'ähuoto ötahuiyämä ttö̧ja̧ ttö̧ä̧nä̧huo̧tä̧ ye'ecu jitä kä'co o̧sa̧ toepächäja'a o'cajuiyönä ye'ecue'ö. ¹⁹ TU̧RU̧HUA̧ TÖ̧Ä̧NÄ̧HUA̧MÄ̧ pa̧'a̧nö̧ pä'ö: Ucuru ötahuiyä toächome 'cua̧rö̧nä̧ jȩcho̧mȩnä̧mä, koro ötahuiyä to'ächome 'cua̧rö̧nä̧, TTÖ täcuomettö ca'epö ucuru ttöjö'cö juiyönä jȩcho̧mȩnä̧, ja̧'hua̧ta̧'a̧nö̧ ajiyä cua̧ttä̧chi'önä su'ädomenä, ²⁰ ja̧u̧nu̧ jä̧cua̧'a̧ TTÖ chi'chäcua'amä täbocu ka̧cui̧nä̧tö̧rö̧, ja̧'hua̧ta̧'a̧nö̧ korotö jahuäju rejunä ka̧cui̧nä̧tö̧rö̧; jua'amä ttötä jȩchä̧cua̧sä̧ pi̧jä̧tö̧ rȩjȩtö'cö pai'önä täbocu to'epö kä̧nä̧ ttö̧ji̧nö̧'a̧nö̧. Ja̧'hua̧nö̧ ji̧na̧'a̧ttö̧ u̧cu̧mä̧ ppa̧'a̧chö̧'cö̧ cuä̧cua̧jä̧ ja̧'hua̧nö̧tä̧ cue'ächö cu̧jä̧cua̧jä̧ jahuätucutä. ²¹ Ucurumä surojötä chi̧'chä̧chä̧cua̧sä̧, ucumä jȩpo̧'cö̧cuä̧cua̧jä̧ po yabocumä. Ja̧u̧nu̧ o'ca'amä ttu̧sä̧cua̧jä̧, ja̧'hua̧nö̧ ja̧'a̧nä̧ ttö̧'o̧cui̧'i̧yä̧cua̧jä̧ yorö'isotä, ja̧'hua̧nö̧tä̧ pä'ö TÖ̧Ä̧NÄ̧HUA̧ Diosmä"