¹ A̧'ȩmä̧ 30nä, kä̧hua̧tä̧ pa̧ja̧cuä̧nö̧ päi'omenä ja̧'hua̧ta̧'a̧nö̧ ji̧mö̧tȩ mo̧ro̧nä̧, cärenä pȩjä̧tu̧cu̧ ttö̧'cä̧tȩ Quebar aje jäyoto tö'cönänö̧ chö̧jo̧mȩnä̧ 'cuäopina̧'a̧. Mo̧ro̧jä̧ bahuecuächa'attö TÖ̧Ä̧NÄ̧HUA̧ i̧jȩpö̧ topinösä̧. ² Ja̧u̧ kä̧hua̧ttö̧ ji̧mö̧tȩ mo̧ro̧ päi'ö pänä̧mä̧ ru̧hua̧ Joaquínrö idepiyuttu rä'epö tticuina'attömä cinco a̧'ȩ jo̧mȩnä̧ päia'a ³ TÖ̧Ä̧NÄ̧HUA̧MÄ̧ Buzi i̧tti̧ sacerdote Ezequielrö ucuicuinö, caldeos pä̧ttä̧u̧ tti̧rȩjä̧ttö̧, Quebar ajettrömä tö'cönä̧nö̧ttö̧, ja̧'hua̧ta̧'a̧nö̧ ja̧u̧mä̧ TÖ̧Ä̧NÄ̧HUA̧ ujurunätä̧ ki̧nö̧ juȩnȩmä̧. ⁴ Ja̧'hua̧nö̧ ja̧'a̧ ttömä topinösä̧, ja̧'hua̧nö̧ tochomenä cä̧ru̧'coppa pä̧i̧cu̧nä̧ kärähuoppamä chu̧huo̧hua̧'a̧cu̧nä̧ttö̧ ichina'a; ajiya isoppamä ocuräcu, juoppatä jacuättö cu'upä rohuinö ja̧'hua̧nö̧ jo̧mȩnä̧ juoppa jacuättö o'cajuiyöttä kä̧dȩpi̧na̧'a̧, juhuoppa ajiya isoppa jacuä cuou ocurämä säruhuö kä̧dȩpö̧nä̧ ji̧na̧'a̧. ⁵ Juhuoppa kä'comä isotö tta'cuarö kö̧nä̧rä̧tö̧ 'cua̧ro̧ttö̧ ka̧cui̧nä̧tö̧. Pitömä pa̧'a̧nö̧ huinätö̧: Ya̧tȩ ttö̧ja̧sa̧ 'cua̧rö̧nä̧ huinätö̧ ⁶ Ja̧'hua̧nö̧ ja̧'a̧nä̧ yotucu pönämä tti'ämä pa̧ja̧cuä̧nö̧ jo̧mȩnä̧ ku̧nä̧ri̧nä̧tö̧ ja̧'hua̧ta̧'a̧nö̧ jahuätö isotö yotucunämä ttujuabiyämä pa̧ja̧cuä̧nö̧ abiyä jo̧mȩnä̧ ku̧nä̧ri̧nä̧tö̧. ⁷ Ötahuiyämä jue'inö, jaa̧'hua̧nö̧ ja̧'anä ö̧jä̧pi̧yä̧ dea'amä päcäyä i̧tti̧ ö̧noji̧yä̧ jä̧i̧nö'a̧nö ja̧'a̧nä juiyo säruhuina'a̧ bronce sayutu icuahua'a jä̧i̧nö'a̧nö. ⁸ Ja̧'hua̧nö̧ ja̧'a̧nä'i̧nä ku̧näri̧nö pa̧ja̧cuä̧nö jo̧mȩnä ujuabiyä deamä ttö̧ja̧ tumupi̧yä̧ jö̧nä jö. O'cajuiyönä pa̧ja̧cuä̧nötä̧ huinö, öänä̧i̧nä ujuabiyänäinä ja̧'hua̧ta̧'a̧nö̧tä̧ huinö . ⁹ Ujuabiyämä̧ mȩi̧na'a̧ kara'a ujuabiyäcú, ja̧'hua̧nö̧ ja̧'a̧ttö kä̧rächi'ömä tottoca'atä 'chinätö; ya̧cu̧nä ttöä oipa'cu. ¹⁰ Öämä ttö̧ja̧ i̧sa̧ öätä huinö. Pa̧ja̧cuä̧nö huottömä ttuhuo̧juo̧'a̧nä mu yähui öä jäinö.'anö huinätö, korotö pa̧ja̧cuä̧nö huotömä̧ päkäyä öä̧ cuä̧rönä huinätö ttöohuecu sotömä. Jahuata'anö korotö paja̧cuä̧nö huotömä mucá öä cua̧rö̧nä huintö. ¹¹ Töäpiyämä jahua'anöta̧ huinätö, jahua'anö ja̧'a̧näi̧nä ttujabiyämä ju'tojucutä setächinäu̧, ya̧cu̧nä ttujabiyä punä ku̧nä̧ri̧nätö korobäcu meä̧u̧nä,koro ttujabiyämä ttidepä a̧tto̧pi̧na̧'a̧. ¹² Ya̧cu̧ punä chinätö ttä'cacutä, jahua'anö ja̧'atö A̧cua̧ru̧hua̧ oipome pä̧teitä 'chinätö tto'ca'acumä yautecutä ppa̧ta̧cho̧ca̧'a̧. ¹³ Isotö a̧'cua̧rä̧tö̧ pa̧'a̧nö̧ huinätö̧, ocurä cuoarä tejäda'a jä̧'i̧nö̧'a̧nö̧ huinätö̧, tejähuare jä̧'i̧nö̧'a̧nö̧'inä, ja̧'hua̧ta̧'a̧nö̧ ocurä kä̧dȩparämä isotö a̧ö̧cua̧rä̧tö̧ ttö̧'cä̧tȩnä̧ cueächina'a, juhua'atäcu cu'upä urohua'a jä̧'i̧ja̧'a̧nö̧ ji̧na̧'a̧. ¹⁴ Isotö tta̧'cua̧rö̧ ku̧nä̧rä̧tö̧mä̧ tto'ca'acu'inä, ttä'cacu'inä a̧'cua̧pö̧nä̧ cue'ächinätö̧ ja̧'hua̧ta̧'a̧nö̧ cu'upä urohua'a jä̧'i̧nö̧'a̧nö̧ huinätö̧. ¹⁵ ja̧'hua̧nö̧ ja̧'a̧ tta̧'cua̧rö̧ ku̧nä̧rä̧tö̧rö̧ topinösä̧; tta̧'cua̧rö̧ ku̧nä̧rä̧tö̧ ttipeyä jo̧mȩ rȩjȩ käräu jähuä ka̧cui̧na̧'a̧. ¹⁶ Pa̧'a̧nö̧ ji̧na̧'a̧ ja̧u̧ käräu jähuämä ja̧'hua̧ta̧'a̧nö̧ kada'ca 'chu̧huä̧ro̧mȩmä̧: ja̧u̧ käräu jähuämä ji̧yȩcu̧nä̧mä̧ berilo pättö jä̧'i̧ja̧'a̧nö̧ ji̧nö̧ ja̧'hua̧nö̧ ja̧'a̧ttö̧ pa̧ja̧cuä̧nä̧ käräu jähuämä yo̧rä̧tȩhui̧nö̧ ja̧'hua̧ta̧'a̧nö̧ 'chu̧huä̧ro̧mȩmä̧ käräu jähuämä 'ca̧ta̧u̧nä̧ ji̧na̧'a̧. ¹⁷ Kärähuobu kärächö cho̧mȩnämä, 'chi̧na̧'a̧ pätetö ku̧nähuo̧ca̧'a̧cu̧ isotö tta̧'cua̧rö̧ ku̧nä̧rä̧tö̧ tti̧'cha̧'a̧cu̧tä̧. ¹⁸ Ja̧hua̧nö̧ ja̧'a̧nä̧ kärähuome ju'toju ja̧'a̧nä̧'i̧nä̧ ro̧huä̧pi̧ji̧na̧'a̧ juobu kärähuobu jäyänämä ttö'äriyä ka̧cui̧na̧'a̧. ¹⁹ Isotö tta̧'cua̧rö̧ ku̧nä̧rä̧tö̧ ttupporächi'omenämä, kärähuobö'inä pporächi'ina'a̧ jahuätö ttippeyänä. Isotö tta̧'cua̧rö̧ ku̧nä̧rä̧tö̧ rȩjȩttö̧ cättecuächomenämä ja̧hua̧ta̧'a̧nö̧ kärähuobu'inä cäecuächina'a̧. ²⁰ Tta̧'cua̧ru̧hua̧ upporächomemä, jahuätö'inä chi̧nä̧tö̧, kärähuobö'inä ppeyänä cäecuina'a̧ Isotö tta̧'cua̧rö̧ ku̧nä̧rä̧tö̧ tta̧'cua̧ru̧hua̧ käräu̧ obunä ttö̧ja̧'a̧ttö̧. ²¹ Isotö tta̧'cua̧rö̧ ku̧nä̧rä̧tö̧ ttupporächi'omenämä, kärächö obu'inä pporächina'a̧; I̧sotö tta̧'cua̧rö̧ ku̧nä̧rä̧tö̧ rȩjȩttö̧ kättecuomenämä, kärächö obu'inä jua'a ppeyänä cäecuina'a̧, Isotö tta̧'cua̧rö̧ ku̧nä̧rä̧tö̧ tta̧'cua̧ru̧hua̧ käräu̧ obunä ttö̧ja̧'a̧ttö̧. ²² Isotö a̧'cua̧rä̧tö̧ ttö̧huä̧mȩ ki̧na̧'a̧ reju i̧so̧ca̧ ttoecuome jä̧'i̧nö̧'a̧nö̧ ji̧na̧'a̧, U huä̧mȩmä̧ adiunä säruhuina'a ido'qui saruhuo'qui jä̧'i̧nö̧'a̧nö̧. ²³ Reju i̧so̧ca̧ ttoecuome dȩa̧'a̧ ya̧cu̧nä̧ isotö a̧'cua̧rä̧tö̧ ttöjuabiyänä ttö̧huo̧jua̧'a̧cu̧ 'tö̧ȩcuä̧chi̧na̧'a̧ ja̧'hua̧ta̧'a̧nö̧ mȩä̧huä̧chi̧na̧'a̧ ka̧ra̧ i̧sa̧ ujuabäcu mȩä̧huä̧chi̧na̧'a̧. Ya̧cu̧nä̧ isotö a̧'cuä̧rä̧tö̧ ja̧'hua̧ta̧'a̧nö̧ ku̧nä̧ri̧nä̧tö̧ ttöjuabiyä ttä'cacu ttottecua pä'ö jitötä ttidepä. ²⁴ Ja̧'hua̧nö̧ ja̧'a̧ ö̧ju̧cui̧nö̧sä̧ ttöjuabiyättö rä̧mi̧pi̧na̧'a̧. Aje rö̧ä̧nä̧ suhuäda'a jä̧'i̧nö̧'a̧nö̧, Dios ucuocua'a jä̧'i̧ja̧'a̧nö̧ ji̧na̧'a̧ jahuätö tti̧'cho̧mȩ pö̧nä̧mä̧. Kä̧ru̧'coppa rö̧ä̧nä̧ kä̧ru̧'co̧hua̧'a̧ jä̧'i̧nö̧'a̧nö̧ rä̧mo̧pi̧na̧'a̧. Su̧ro̧da̧u̧ rö̧ä̧nä̧ tti̧'cha̧'a̧ jä̧'i̧nö̧'a̧nö̧ rä̧mi̧pi̧na̧'a̧ tti̧'cho̧mȩ pö̧nä̧mä̧ jahuätömä ttujuabiyä jui'ädinätö̧. ²⁵ Rä̧mi̧pi̧na̧'a̧ ju'tojuttö reju i̧so̧ca̧ tto̧ȩcuo̧ca̧ttö̧ ttö huä̧mȩttö̧, ttö̧jä̧do̧mȩ pö̧nä̧ ja̧'hua̧ta̧'a̧nö̧ ttujuabiyä juittädomenä'inä. ²⁶ U huä̧mȩ ko̧ca̧nä̧mä̧ ruhuo deäcä a̧'cua̧juȩmä̧ Zafiro ido'qui jä̧'i̧nö̧'a̧nö̧ ji̧nä̧cä, ja̧'hua̧ta̧'a̧nö̧ ruhuo deäcänämä ttö̧ja̧sa̧ 'cua̧rö̧nä̧ hua̧ pi̧nö̧. ²⁷ Ji̧yȩtȩ a̧'cua̧juȩ cuoräu säruhuä jä̧'i̧nö̧'a̧nö̧ jö̧ topinösä̧, äcättömä ocurä cuoa'a jä̧'i̧nö̧'a̧nö̧ ji̧na̧'a̧; ttömä topinösä̧ äcättö dȩa̧'a̧cu̧mä̧ ocurä säruhuönä kä̧dȩpö̧mä̧ juhuȩnȩ o'cajuiyötä kä̧dȩpi̧na̧'a̧. ²⁸ Ajiya ichomenä huäyärobö ka̧'a̧ jä̧'i̧nö̧'a̧nö̧, rö̧ä̧nä̧ tȩya̧u̧ o'cajuiyö ttejäda'a jä̧'i̧nö̧'a̧nö̧. TÖ̧Ä̧NÄ̧HUA̧ usärö kä̧dȩpa̧'a̧ jä̧'i̧ja̧'a̧nö̧ ji̧na̧'a̧. Ja̧u̧ topömä chi'äcu ma'aminösä̧ ja̧'hua̧nö̧ ma̧dä̧mo̧mä̧nä̧ ya̧tȩ ucuocua'a ä̧ju̧cui̧nö̧sä̧.