¹ Acab hua'ö icuinö o'co'a Moabmä Israel ttö̧ja̧cu̧ örohuähua pä'ö amocuädinödo. ² Ja̧hua̧nö̧ ja̧'a̧nä̧ Ocozíasmä Samaria'ra̧'a̧ kode ojusodettö ä̧'o̧ca huä̧mȩttö̧ päte'önä toäcuähuatenä mo̧'ä̧chi̧nö̧ idepänä rö̧ä̧nä̧ toe'önä. Ja̧hua̧nö̧ jä̧cu̧ huȩnȩ jiäcuähuä ttö̧ja̧rö̧ hue'ö kä̧nö̧, jahuätörö pä'inö: "'Chä̧nö̧ jä'epäjätucui Ecrón ötahuiyä ttö̧ja̧ ttö̧ä̧nä̧hua̧ dios Baal Zebubrö, pi̧yȩ na̧dä̧chö̧ttö̧ chö̧'i̧pä̧cua̧'a̧ ja̧ pä'ö." ³ Ja̧jua̧nö̧ ja̧'a̧ Dios huȩ'ä̧hua̧ Angel'i̧sa̧ ucuocu pä'inö Elías tisbita ttö̧ja̧ i̧sa̧rö̧: Samaria ttö̧ja̧ ttu̧ru̧hua̧ huȩä̧jä̧u̧ru̧ cu̧'o̧cui̧'a̧ ä̧rä̧mi̧'ö̧ täi, jahuätörö jäcuepaja: '¿Israel ttö̧ja̧ tti̧rȩjä̧nä̧ Diosmä toa'a tä̧ji̧, Ecron ttö̧ja̧ ttö̧ä̧nä̧hua̧ dios Baal Zebub'rötä jä'epö cui̧'chä̧tu̧cu̧nä̧? ⁴ Ja̧hua̧nö̧ ja̧'a̧nä̧ pa̧'a̧nö̧ pä'äji chu̧ru̧hua̧ Diosmä: "Cu̧'ä̧ppä̧ttö̧mä̧ ucumä cuä̧rä̧mi̧yä̧cua̧jä̧, ja̧hua̧nö̧ jo̧ca̧'a̧ juhuorötä hua'ö cuicuome jobö." Ja̧hua̧nö̧ pä'ipötä Elíasmä i̧hui̧nö̧. ⁵ Hue'ähuotö päjätö ru̧hua̧ ö̧ja̧'a̧cu̧ ppa̧ttä̧cho̧mȩnä̧, jä'epö ä̧ju̧cui̧nä̧u̧: ¿Tta̧'a̧nö̧ pä'ö ppa̧cu̧huä̧chä̧tu̧cuä̧ttö̧? ⁶ Jahuätö ädätö pättinä̧cu̧: "Ya̧tȩ Dios u̧mu̧huä̧ya̧ ujuturu po̧cui̧pö̧ pa̧'a̧nö̧ pä̧ä̧u̧jä̧: Tätucui jahuata'anö hue'äji ru̧hua̧rö̧tä ppa̧'ä̧chö̧ pa̧'a̧nö̧ ji'ähuätucuirö: "Diosmä pa̧'a̧nö̧ pä'äji pä'ö: ¿Israel rȩjȩnä̧mä̧ Dios toa'a tä̧ji̧, Ecrom ttö̧ja̧ ttö̧ä̧nä̧hua̧ dios Baal Zebub'rötä jättepiyacu pä'ö huecunä? Ja̧hua̧nö̧ ja̧'a̧nä̧ cu̧'ä̧ppä̧nä̧ cu̧'o̧mȩttö̧mä̧ cuä̧rä̧mi̧yä̧cua̧jä̧, iso päi'önä̧ ju̧huä̧ppä̧nä̧ cu̧'o̧mȩttö̧tä̧ hua'ö cui̧cuä̧cua̧jä̧." ⁷ Ja̧hua̧nö̧ ja̧'a̧ ja̧u̧ ru̧hua̧ pä̧i̧nä̧u̧: "¿Tta̧'a̧nö̧ hua̧ ja̧'a̧cuä̧ttö̧ ja̧u̧ Dios u̧mu̧huä̧ya̧ tocu'äjätucuäcumä, ucuturu pö̧cui̧pö̧ i̧mi̧cu̧nä̧ jö̧ huȩnȩ ji'ähuäjimä?" ⁸ Ja̧hua̧nö̧ pä̧u̧ jahuätö ttädätinä̧cu̧: "Ja̧u̧ Dios u̧mu̧huä̧ya̧mä̧ i̧sa̧ uhuo'chettö adicua'a 'ca̧tä̧huä̧ji̧, juhua'a jö̧ ta̧'a̧nö̧ äcänä kärocuächönä i̧sa̧ i̧jȩta̧ttö̧ adicua'a rö̧nä̧rä̧ji̧ jö̧nä̧." Ja̧hua̧nö̧ pättäcu ru̧hua̧ ädätinä̧u̧: "Ja̧u̧mä̧ Elías tisbita ttö̧ja̧'i̧sa̧ ja̧'a̧." ⁹ Ja̧u̧nu̧ o'ca'a ru̧hua̧mä̧ hue'inö su̧ro̧da̧u̧ ttu̧ru̧hua̧rö̧'i̧nä̧, u̧mu̧huäyotö 50nö huotöcu Elías ö̧ja̧'a tti̧'cha̧ pä'ö. Ja̧u̧ su̧ro̧da̧u̧ ttu̧ru̧hua̧mä̧ huä̧mi̧pi̧nö̧ Elías ö̧jo̧mȩ möä'ca ju'tä. Ja̧hua̧nö̧ ja̧'a̧ su̧ro̧da̧u̧ ttu̧ru̧hua̧ pä'inö ja̧u̧ru̧: "Dios u̧mu̧huä̧ya̧, ru̧hua̧mä̧ hue'äji cui̧mȩyȩhua̧ pä'ö." ¹⁰ Ja̧hua̧nö̧ päcu Elíasmä ädätö pä'inö su̧ro̧da̧u̧ ttu̧ru̧hua̧rö̧: "Iso päi'önä Dios u̧mu̧huä̧ya̧ chö̧ttömä, ocurä mo̧ro̧jä̧ra̧ttö̧ mȩyȩhui̧'i̧, jahuata'anö 50nö huotö su̧ro̧da̧u̧ru'i̧nä̧, ttu̧ru̧hua̧rö̧'i̧nä̧ cui'i'i." Ja̧hua̧nö̧ päö ji̧yȩnä̧tä̧ ocurä mo̧ro̧jä̧ra̧'a̧ttö̧ mȩyȩhui̧'ö̧ chutä su̧ro̧da̧u̧ ttu̧ru̧hua̧rö̧'i̧nä̧, 50nö huotö u̧mu̧huäyotörö'i̧nä̧ cui'i'ina̧'a̧. ¹¹ Ja̧hua̧nö̧ ja̧'a̧ ru̧hua̧ Ocozíasmä pä'äji ta̧'a̧nö̧ ppa̧'ä̧dö̧ ka̧ra̧ su̧ro̧da̧u̧ ttu̧ru̧hua̧rö̧ hue'inö u̧mu̧huäyotö 50nö huotöcu Elías ö̧ja̧'a̧ tti̧'cha̧ pä'ö: Ja̧hua̧nö̧ ja̧'a̧ su̧ro̧da̧u̧ ttu̧ru̧hua̧mä̧ ucuocu pä'inö Elíasrö: "Dios u̧mu̧huä̧ya̧, ru̧hua̧mä̧ pa̧'a̧nö̧ pä'äji: 'Jurunä̧nö̧ i̧mȩyȩhuä̧cha̧ ji'ähuätucuirö jö̧nä̧."' ¹² Ja̧hua̧nö̧ ja̧'a̧ Elías ädätö pä'inö jahuätörö: Iso päi'önä Dios u̧mu̧huä̧ya̧ chöttömä,ocurä mo̧ro̧jä̧ra̧ttö̧ mȩyȩhui̧'i̧, jahuata'anö 50nö huotö su̧ro̧da̧u̧ru̧'i̧nä̧, ttu̧ru̧hua̧rö̧'i̧nä̧ cui'i'i." Ja̧hua̧nö̧ päö ji̧yȩnä̧tä̧ pä'äji ta'anö mo̧ro̧jä̧ra̧'a̧ttö̧ Diosttö ocurä mȩyȩhui̧'ö̧ cui'i'ina̧'a̧ chutä su̧ro̧da̧u̧ ttu̧ru̧hua̧rö̧'i̧nä̧, u̧mu̧huäyotö 50nö huotörö'i̧nä̧. ¹³ Ju̧huȩnȩ yabonö ru̧hua̧mä̧ hue'inö huäbodäcuänä päi'önä 50nö huotö su̧ro̧da̧u̧ru̧. Pide su̧ro̧da̧u̧ ttu̧ru̧hua̧mä̧ Elías ö̧jo̧mȩ 'chä̧nö̧ ä'ca jo̧mȩ ihue'quiyunä.pä̧mä̧dö̧ jä'epö pä'inö: "Dios u̧mu̧huä̧ya̧, jädepäcujä, ja̧'a̧tä̧ topi ttö cha̧'cua̧rö̧'i̧nä̧, pitö cu̧mu̧huäyotö 50nö huotö tta̧'cua̧rö̧'i̧nä̧ rö̧ä̧nä̧ adihua pä'ö ucu cuä'ca jo̧mȩttö̧. ¹⁴ Iso päi'önä̧tä̧, ocurämä mo̧ro̧jä̧ra̧'a̧ttö̧ mȩyȩhui̧'ö̧ äcuo̧mȩnä̧ ta̧ju̧ru̧ su̧ro̧da̧u̧ tturuhuotörö ttu̧mö̧huäyotöcutä cui'i'ina̧'a̧. Ja̧hua̧nö̧ ja̧'a̧nä̧ jitämä ja̧'a̧tä̧ topi ttö chö̧jö̧ adihua pä'ö ucu cuä'ca jo̧mȩttö̧." ¹⁵ Dios u̧mu̧huä̧ya̧ angel i̧sa̧ Elíasrö pä'inö: "Mȩyȩu̧ ja̧u̧cu̧tä̧ täi. Yecuecuä ja̧u̧ru̧mä̧." Ja̧hua̧nö̧ ja̧'a̧ Elíasmä̧ ä̧rä̧mi̧'ö̧ ja̧u̧cu̧ 'chi̧nö̧ ru̧hua̧ ö̧ja̧'a̧cu̧. ¹⁶ Ja̧hua̧nö̧ ja̧'a̧ Elíasmä Ocozíasrö pä'inö: "Pi̧yȩtä̧ ja̧'a̧ chu̧ru̧hua̧ Dios pääjimä: Baal Zebub Ecron ttö̧ja̧ ttö̧ä̧nä̧hua̧ diosrötä jättepäjiyacu pä'ö huȩnȩ jiäcuähuä ttö̧ja̧rö̧ hue'äjijä. Ja̧hua̧nö̧ ja̧'a̧nä̧, ¿Israel rȩjȩnä̧ Diosmä toa'a tä̧ji̧ ucu jäcuepö'anö hua̧mä̧? Ja̧hua̧nö̧ jȩcu̧'a̧ja̧'a̧ttö̧ cu̧'ä̧ppä̧ttö̧mä̧ cuä̧rä̧mi̧yä̧cua̧jä̧, ja̧hua̧nö̧ jo̧ca̧'a̧ iso päi'önä̧tä̧ ju̧huä̧ppä̧ttö̧tä̧ hua'ö cui̧cuä̧cua̧jä̧." ¹⁷ Ja̧hua̧nö̧ ja̧'a̧ ru̧hua̧ Ocozíasmä Dios Elíasnä ucuocuinö̧ta̧'a̧nö̧tä̧ 'coruju'ächinö. Ocozíasmä i̧tti̧ to'inö. Ja̧hua̧nö̧ ja̧'a̧ttö̧ hueä'ijomemä Joramtä ruhuonä huea pä'ö kä̧mä̧di̧nö̧. Todäre a̧'ȩ päi'ina̧'a̧ Judá ttö̧ja̧ ttu̧ru̧hua̧ Josafat i̧tti̧ Joram huea'amä. ¹⁸ Ocozías koro jȩi̧nö̧mä̧, ¿huȩyu̧cua̧'a̧ ko̧ca̧'a̧ tä̧ji̧ Israel ttö̧ja̧ tturuhuotö jȩtti̧nö̧ huȩyu̧tu̧ ku̧nä̧huä̧ cuyäru'tänä̧mä̧?