¹ Ja̧u̧ Salomontä̧ ji̧na̧'a̧ o'catoi'önä̧ Israel ttö̧ja̧ ttu̧ru̧hua̧mä̧. ² Pitö ji̧na̧'a̧ ja̧u̧ u̧mu̧huäyotö curäruhuä tturuhuotömä̧: Sadoc i̧tti̧ Acaria'inä̧ Dios i̧huȩnȩ jiäcuähuä i̧sa̧ ji̧na̧'a̧. ³ Elihoref'inä̧ Ahias'inä̧ ji̧na̧'a̧do, Sisa ki̧tti̧mö̧mä̧, jahuätömä̧ juȩyu̧cuä̧ ttö̧ja̧ ji̧na̧'a̧. Josafmä Ahilud i̧tti̧ ji̧na̧'a̧ ja̧u̧mä̧ mo̧ro̧ 'cuäopu jȩtto̧ huȩyu̧cuä̧ ttö̧ja̧'i̧sa̧ ji̧na̧'a̧. ⁴ Benaia'mä̧ I̧oiada i̧tti̧ ji̧na̧'a̧ curä ruhuä tu̧ru̧hua̧.Sodoc'inä̧ Abratar'inä̧ Dios i̧huȩnȩ jiäcuähuä ttö̧ja̧ ji̧na̧'a̧ mo̧ro̧jä̧tö̧'i̧nä̧ pi̧jä̧ttö̧'i̧nä̧ 'cä'co päteö adihuä ttö̧ja̧. ⁵ Acaria'mä̧ Natan i̧tti̧ ji̧na̧'a̧ curä ruhuotö tu̧ru̧hua̧ pinö ja̧u̧mä̧. Sabud'mä̧ Natan i̧tti̧ ji̧na̧'a̧ Dios i̧huȩnȩ jiäcuähuä i̧sa̧ ja̧hua̧ta̧'a̧nö̧ ru̧hua̧ tö'cönä a̧hua̧ru̧hua̧. ⁶ Ahisar'mä̧ isode tta̧huä̧rä̧cuä̧huä̧ i̧sa̧ ji̧na̧'a̧. Adomiram'mä Abda ki̧tti̧ ji̧na̧'a̧ ja̧u̧ aditähuä päi'önämä u̧mä̧tö̧ amö'cö aditätörö hueähuä i̧sa̧ ji̧na̧'a̧. ⁷ Salomon'mä ku̧nä̧ri̧nö̧ to̧mu̧rȩ ta'arenö (12) huotö ruhuotörö Irael ötahuiyä ttö̧ja̧rö̧ huetta pä'ö ru̧hua̧rö̧ ppä'ädönö̧, jahuätö ji̧na̧'a̧ ru̧hua̧ u̧cuä̧ jui'ö ö̧jö̧ juiyönä i̧yo̧pä̧rö̧ ppä̧'ä̧dä̧rä̧tö̧mä̧ ojusodenä. ⁸ Ya̧cu̧nä̧ iyi'änä̧tö̧ recuärö̧jö̧ juiyönä ya'ate kä̧hua̧ jo̧mȩnä̧ a̧'ȩ jo̧mȩnä̧. Pi̧yȩ ja̧'a̧ jahuätö tti̧mi̧mä̧: Ben Hur'mä ki̧nö̧ Efrain i̧rȩjä̧ de'iyunä; ⁹ Ben Decar'inä Macaz Saalbim'inä, Bet Semes ja̧hua̧ta̧'a̧nö̧ Elón Bet Hanán'inä; ¹⁰ Ben Hesed'inä hueähui'inäcu̧ pinö̧ Arubot ötahuiyänä (ja̧u̧ru̧ma̧ pätecuächina'a̧ Soco ja̧hua̧ta̧'a̧nö̧ o'cajuiyönä Hefer rȩjȩ'i̧nä̧); ¹¹ Bȩn Abinadad'mä, o'cajuiyönä Dor rȩjȩ huea pä'ö hueähui'inäcu̧(ja̧u̧ irecuamä Salomón ittiju Tafat pä'ö micuinäju̧ Salomón irecua jimicu'anötä̧); ¹² Baana'mä Ahilud i̧tti̧ ji̧na̧'a̧, ja̧hua̧'a̧nö̧ Bet Sean'mä ki̧na̧'a̧ Seretan jäyä Jezeel dȩa̧'a̧cu̧tto̧ rötädipö Bet Seanttö̧ Abel Meola jubu päi'önä oto ji̧na̧'a̧ Jocmeam ya̧nä̧ ji̧jä̧ jö̧ ta̧'a̧nö̧tä̧; ¹³ Ben Geberttömä Ramot'inä Galaadmä Manasesmä i̧tti̧ro̧ hueähui'ina'a ahuaruhuä o'catoi'önä; ka̧cui̧nä̧tö̧ Galaad'nä, ja̧hua̧ta̧'a̧nö̧ hueähui'inäcu̧ Agob i̧rȩjä̧'i̧nä̧ ja̧u̧mä̧, jua'amä ki̧na̧'a̧ Basan'nä, ttö̧ja̧ huämetucuä jo̧mȩ ötahuiyä räbiyä'inä bronce o̧juä̧ apatiyä ppe'tädäcuähuä o̧juä̧; ¹⁴ Ahinadab'mä Iddo i̧tti̧ ji̧na̧'a̧ Mahanaim'tö̧; ¹⁵ Ahimaas'mä, Neftalittö (ja̧u̧'i̧nä̧ irecua päi'önä ȩmi̧nö̧ Basemat'rö̧ Salomón ittijuru irecua päi'önä̧); ¹⁶ Husai'mä Baanä i̧tti̧ ji̧na̧'a̧ Aserttö ja̧hua̧ta̧'a̧nö̧ Beolottö; ¹⁷ Josafafmä Pärúa i̧tti̧ ji̧na̧'a̧, Isacarttö. ¹⁸ Simeimä̧, Ela i̧tti̧ ji̧na̧'a̧, Benjamíntö̧; ¹⁹ ja̧'hua̧ta̧'a̧nö̧ Gebermä̧, Uri i̧tti̧ ji̧a̧na̧'a̧, Galaad i̧rȩjä̧ttö̧, Basán ötahuiyä rȩjȩttö̧, ja̧'hua̧ta̧'a̧nö̧ ja̧u̧tä̧ ji̧na̧'a̧ chu'äcua̧ ru̧hua̧ huȩ'ä̧hua̧ ki̧nö̧mä̧ juä̧jä̧ rȩjȩnä̧. ²⁰ Judá isotö'i̧nä̧, Israel isotö'i̧nä̧ rö̧ä̧nä̧ recuinätö̧ rȩba̧ aje rö̧otonä̧ jäyä pä̧ba̧ jä̧'i̧nö̧'a̧nö̧ jahuätömä̧ cuä̧nö̧ au ka̧cui̧nä̧tu̧do eseutä. ²¹ Salomóntä̧ ji̧na̧'a̧ ruhuo hueinö̧mä̧ o'cajuiyönä̧ ruhuomä̧ ajettö rötädipö Filisteo tti̧rȩjä̧bu beipunä̧, ja̧'hua̧ta̧'a̧nö̧ Egipto rȩjȩ jäyä o'cajuiyönä̧tä̧. Jahuätö ttaditähuä micuämä̧ i̧yi̧nä̧tö̧do Salomónrö̧ o'cajuiyönä̧ tta̧'cua̧ro̧mȩ jubu. ²² Pi̧yȩ ji̧na̧'a̧ Salomón ucua pä'ö recuä rö̧ji̧nö̧mä̧ ru̧hua̧ kä̧nö̧ ttö̧ja̧sa̧ ya̧tȩnö̧ ja̧'a̧nä̧ tu̧mu̧ to̧mö̧rȩ jähuä jo̧mȩnä̧ oba 220nö̧ suädi'ina'ado ya̧mö̧ i̧sa̧ppȩmä̧ ja̧'hua̧ta̧'a̧nö̧ 220nö̧ oba su̧'pȩnö̧ ji̧na̧'a̧ ya̧mö̧ i̧sa̧ppȩmä̧ jibacunä̧mä̧. ²³ To̧mu̧rȩ jähuä ji̧na̧'a̧ pä̧cä̧yö̧ bärecuotö tä̧mu̧, ttö̧ja̧sa̧ ya̧tȩ jo̧mȩnä̧ ji̧na̧'a̧ pä̧cä̧yö̧ mȩji̧yä̧'che cuäjecuotö, ja̧'hua̧ta̧'a̧nö̧ ttö̧ja̧ ta̧ju̧ jo̧mȩnä̧ ovejastö̧'i̧nä̧, de'a ruhuä'i̧nä̧ toönä̧mä̧ cuervo'i̧nä̧, cabra'i̧nä̧, Bufalo'i̧nä̧, jua'atanö̧ de'a ruhuä ju'tojunä̧ co̧'ä̧rä̧tö̧ bärecuotö'i̧nä̧. ²⁴ Ja̧u̧tä̧ tta̧'ä̧ri̧nö̧ ja̧huä̧jä̧ rȩjȩ o'cajuiyönä aje ya̧nä̧ ji̧nä̧ päi'önä̧, Tifsattö rutädipö juiyo oto Gaza jubu, o'catoi'önä̧ aje pi̧jä̧nä̧ ruhuotö'i̧nä̧, ja̧'hua̧ta̧'a̧nö̧ ja̧u̧ ru̧hua̧ huȩnȩ juiyönä huinö̧ juȩnȩ jäyänä ka̧cuä̧tu̧cu̧mä̧. ²⁵ Judá'i̧nä̧, Israel'i̧nä̧ jueö huȩnȩnä̧tä̧ ki̧nä̧tö̧ ta̧ju̧nä̧ huäi uba dau appiyä oju ro̧mȩ dȩa̧'a̧ ja̧'hua̧ta̧'a̧nö̧ higuera dau dȩa̧'a̧, Higo dau dȩa̧'a̧ Danttö̧ rutädipu Beerseba jubu cä'ädö o'cajuiyönä̧ Salomón hueinö mo̧ro̧mä̧. ²⁶ Salomón ku̧nä̧ri̧nö̧do 40.000 mil jo̧mȩnä̧ cabayu̧tu̧ru̧ tto̧ȩcuo̧ca̧nä̧ öcaruquiyä do'ätörö, ja̧'hua̧ta̧'a̧nö̧ 12 milnö̧ cabayunä̧ huä̧nö̧ huo̧juä̧tö̧rö̧. ²⁷ Jahuätö ja̧huä̧jä̧ rȩjȩnä̧ ruhuo hue'ähuotö ji̧na̧'a̧ ru̧hua̧ Salomón u̧cuä̧ iyinä̧tö̧mä̧ ja̧'hua̧ta̧'a̧nö̧ o'catoi'önä̧ ttö̧ja̧ Salomón öäre mesanä̧ ichinä̧tö̧mä̧ kä̧hua̧ ya̧tȩ 'cuäopäji o'ca'a ya̧cu̧nä̧ iyinä̧tö̧do, ja̧'hua̧ta̧'a̧nö̧ yorö'iso recuämä̧ röjö juiyönä̧ ucua pä'ömä̧. ²⁸ Jahuätö i'cächinä̧tö̧ ihueye ji̧yȩtä̧ rutähuome rutinä̧tö̧ cebada'i̧nä̧, Heno'i̧nä̧, cahuayutu̧ ttu̧cuȩ caruquiyä doähuä isotö'i̧nä̧ cahuayunä̧ huä̧nö̧ 'chä̧cuä̧huo̧tö̧'i̧nä̧, ya̧cu̧nä̧ i'cächinä̧tö̧do ttujuru pa̧ja̧cuä̧cho̧mȩ jubutä. ²⁹ Diosmä̧ rö̧ȩnä̧ huo̧juä̧huä̧ iyinö Salomónrö̧ ja̧'hua̧ta̧'a̧nö̧ ttu̧huȩpä̧rä̧cuä̧huä̧'i̧nä̧, ja̧'hua̧ta̧'a̧nö̧ rö̧ä̧nä̧ rȩba̧ rö̧ä̧ba̧ aje de'ähuoto jäyoto pä̧ba̧ jä̧'i̧nö̧'a̧nö̧ rö̧ä̧nä̧ ttu̧huȩpä̧rä̧cuä̧huä̧'i̧nä̧. ³⁰ Salomón u̧huo̧ju̧mä̧ kä̧hua̧ räopa'acu ka̧cuä̧tö̧ ttö̧ja̧ ttu̧ttȩpä̧ro̧mȩttö̧'i̧nä̧ abonänö̧ huo̧jui̧nö̧ ja̧'hua̧ta̧'a̧nö̧ Egipto ttö̧ja̧ ttu̧huo̧juo̧mȩttö̧'i̧nä̧ abonänö pa̧ja̧cuo̧mȩ juiyönä̧. ³¹ Ja̧u̧mä̧ o'catoi'önä̧ pi̧jä̧nä̧ ka̧cuä̧tö̧ u̧mä̧tö̧ttö̧'i̧nä̧ abonänö huo̧jui̧nö̧do Etánttö̧, Ezraita, Hemán, Carcal, ja̧'hua̧ta̧'a̧nö̧ Mahol i̧tti̧mö̧ttö̧'i̧nä̧ abonänö huo̧jui̧nö̧do ja̧'hua̧ta̧'a̧nö̧ o'cajuiyönä u̧huo̧jö̧mä̧ pi̧jä̧nä̧ ka̧cuä̧tö̧ tti̧rȩji̧yä̧ sobucuächö rä̧mi̧pi̧na̧'a̧do. ³² Ja̧u̧ ttö̧ja̧sa̧mä̧ amöcuädö ucuocu huo̧juȩcu̧nä̧ 3.000 milnö̧ jo̧mȩnä̧ huȩyu̧ti̧nö̧do huȩnȩ 'quiecuä ja̧'hua̧ta̧'a̧nö̧ mil cinconö̧ jo̧mȩnä̧ ra̧huä̧huä̧'i̧nä̧. ³³ Ja̧u̧mä̧ dauhuiyä imi o'ä'chinödo, cedro dauttö rutädö kä̧mä̧di̧nö̧do oä'cha pä'ö isopo pähuä dauttö räbänä becuänö̧ baujuäi cä'ädö. Ja̧u̧mä̧ ji'ähuinödo de'a ruhuä cahuayutu̧ ttötö'cö'i̧nä̧ ju'tojunä co̧'ä̧rä̧tö̧ ttötö'cö'i̧nä̧, rȩjȩnä̧ do'ähuätö ttötö'cö'i̧nä̧ jacuotonä̧ cuo̧'ä̧rä̧tö̧ po̧i̧ ttötö'cö'i̧nä̧. ³⁴ Pi̧jä̧ pa̧ja̧cu̧nä̧ ruhuäcuiyä ttö̧ja̧ o'catoi'önä̧ ichinä̧tö̧do Salomón ucuocu u̧huo̧jö̧ ttä̧ju̧cua̧ pä'ö, pi̧jä̧ ruhuotö'inä̧ jahuätömä ä̧ju̧cu̧nä̧tö̧do u̧huo̧ju̧mä̧.